Usqhaylla yanapaykuwaqninchis
1. ¿Imakunan espiritualpi pisiyachiwasunman?
1 Anna pananchis mana iñiq qosayoq karan, sinchi llank’anayoqtaq, chaymi paypaqqa sasapuni karan huñunakuyman riy, predicay, Diospa Simin Qelqa estudiaypas. Jehová Diostaña munakuran chaypas, chiriyapuranmi iñiyninpi. Ichaqa ancianokuna paymanta llakikuspankun espiritualpi yanaparanku.
2. ¿Imaynatan lliw cristianokuna usqhaylla yanapaykuq kankuman?
2 Congregacionpa yanapayninta chaskiqqa kikin Jehová Diosman hap’ipakusqantan rikuchin. Congregacionpi ancianokunaqa Jesusta qatikuspankun munakuywan kallpachanku, ruwaykunawan yanapanku espiritualpi yanapana kaqkunata (1 Tes. 5:14). Chayta ruwallanku Bibliamanta sonqochaq simikunata horqospa chaywantaq kallpachanku. Espiritualpi pisi kallpakunata yanapaypi ñawpariyqa, lliw cristianokunaq ruwananmi, manan ancianokunaqllachu. Llapanchismi yachanchis “tiemponpipuni rimasqa simiqa” ancha allinpuni kasqanta (Pro. 25:11; Isa. 35:3, 4).
3, 4. ¿Imataq hukkunata yanapayri, imaynata chayta ruwasunman?
3 Kikiykimanta ñawpariy: Yanapana kaqkunata munakuywan qhawarinapaqqa kikinchismanta ñawparinanchis, khuyapayananchis, yanapanapaq allin yuyaykusqataq kananchis. Jonatanqa amigonpa sasachakuypi tarikusqanta yachaspan “Davidpa kasqan Horesman rirqan, Diospi suyakuyninta aswanta kallpachaykuq” (1 Sam. 23:15, 16). Hukkunata yanapaspaqa sonqomanta sumaq simikunawan rimapayay, chhaynapin allinta kallpachanki. Kikin Jesusmi huk rikch’anachiywan rikuchiran kayta: huk wayqeta otaq panata espiritualpi yanapanapaqqa allin yuyaykusqa usqhaylla yanapananchis (Luc. 15:4). Sonqomanta hukkunata yanapaymi kallpachawasun yanapashanallapaq, manaña yanapasqanchis kaq rato allinyachinman chaypas.
4 ¡Maytan kallpachawanchis noqanchiswan kuska hukkunata predicanapaq invitayqa, astawanraq gruponchispi kaqkunata! Pitapas predicaypi yanapashaqtinchis kallpachayta atisun chayqa kallpachasunchis. Espiritualpi qhaliyashaqkunaqa anchatapuni kallpachakunku Jehová Diosta servinankupaq sumaq yanapayta chaskispa.
5. Mayninpiqa, ¿ima yanapayta ancianokuna allichankuman?
5 Huk allichasqa yanapaymanta: Unayña mana predicaqkuna otaq congregacionpi mana huñunakuqkunaqa huk yanapaytaraqmi chaskinkuman, chhaynapi iñiyninku kallpachasqa kananpaq. Yaqapaschá wakmanta Bibliata estudiankuman Adoremos al único Dios verdadero, Acerquémonos a Jehová otaq ¿Qué enseña realmente la Biblia? nisqa librowan. Payqa bautizasqañataq chayqa manan unaytañachu estudianan. Congregacionpi Comité de Servicio nisqa qhawashanallanmi pikunachus kay yanapayta chaskinkuman, chayta (“Sección de preguntas” nisqata qhawariy kaykunamanta: Nuestro Ministerio del Reino de noviembre de 1998, noviembre de 2000).
6. ¿Imaynatan huk pananchis espiritualpi kallpachakuran?
6 Qallariypi rimaranchis Annamanta, paymi ancianokunaq allichasqan yanapayta kusikuywan chaskikuran, chaymi espiritualpi poqosqa pananchiswan Bibliata estudiaran. Tawa kuti estudiasqallankun yanaparan Jehová Diosman kutirinanpaq. Wakmanta huñukuyta qallariran Jehová Diosmantapas rimayta munaran. Pananchisqa yanapallasqataqmi estudionkunaman apaspa, wasin-wasinta predicananpaq kallpachakunankama. Annaqa espiritualpi kallpachakunanpaqqa hukpa yanapanallantan necesitaran.
7. ¿Pikunan saminchaykunata chaskinku espiritualpi hukkunata kallpachaspa?
7 Yanapana kaqkunata kallpachayqa lliwtan yanapawanchis. Yanapay chaskiqqa kusikunmi Jehová Diosman kutirikusqanmanta, llaqtanwan llank’asqanmantapas. Ancianokunaqa q’ochukunku espiritualpi wiñasqankuta rikuspa (Luc. 15:5, 6). Congregacionpas astawanraq hukllachakun chaypi kaqkuna sumaqta qhawarinakusqanku rayku (Col. 3:12-14). Chay hinaqa Jehová Diosman rikch’akusunchis, paymi usqhaylla yanapaykuwaqninchisqa (Efe. 5:1).