Hukkunapi interesakusun uyankuta allinta qhawarispa
1 Wasin-wasinta predicaspaqa, ñawpaqtaqa runakunaq uyantaraq qhawanchis rimananchispaq. Chhaynapin uyankupi reparanchis ima ninku hamusqanchismanta, kusisqa kasqankuta phiñasqa kasqankutapas. Chhaynallataqmi paykunapas qhawariwaspallanchis imaymanata reparanku. Pananchismanta huk warmi willakun: “Uyanpi sumaq thak-kayta qhawarispaymi uyariyta munarani. Yachayta munarani ima rayku ahina kasqanta”, nispa. Chhaynapin chay warmi allin willakuykunata uyariran.
2 Callekunapi, maypi runakunaq tariskusqanpipas predicanapaqqa uyankutaraq qhawarina chayman hina parlapayananchispaq. Huk wayqe payman asuykamuq runakunaq uyanta qhawallanmi. Chhaynapin, piwanpas qhawanakuspa, payqa asirikun hinaspa revistakunata munachin. Chayta ruwaspan askha runakunawan sumaqta rimayta qallarin, askha qelqakunatapas saqen.
3 Reparanchismi yuyaykusqankuta: Runakunaq uyanta qhawarispaqa reparanchismi imatachus yuyaykusqanta. Ejemplopaq, manachus entiendewanchis otaq rimasqanchiswan uyariqninchis mana tupachinchu chayqa, uyanpi reparasun. Reparallasuntaqmi ruwanayoq kasqanta, apurasqa kasqantapas. Chaykunata reparaspanchismi predicasqanchista chayman hina tupachisunman otaq pisiyachisunmanpas. Hukkunaq munakuyninkunata entiendespaqa paykunapi interesakushanchis.
4 Sonqomanta, mana iskayaspa rimay: Askha llaqtakunapi, pitapas sonqomanta rimanapaqqa uyantaraq ñawpaqta qhawana. Qhawasunchis imaynatan Jesús kutichiran yachachisqankunaq: “¿Pillañataq qespichisqaqa kanman?”, nispa tapukusqankuta. Biblian willawanchis: ‘Jesusqa paykunaq [uyanta] qhawarispa nirqan: Runakunapaqqa mana atikuqmi kayqa, Diospaqmi ichaqa tukuy imapas atikun’, nispa (Mat. 19:25, 26). Jesuspa uyanpi rikukuran mana iskayaq kasqanta chaymi, rimayninqa allin kallpachasqa karan. Chhaynallataqmi runakunaq uyan qhawayqa, yanapawasun Reinomanta allin willakuykunata sonqomanta mana iskayaspa willanapaq (2 Cor. 2:17; 1 Tes. 1:5).