Hukkunapi interesakusun munakuq kaspa respetaq kaspapas
1 Jehová Diosqa Tukuy Munayniyoqña chaypas, munakuywan respetowan tratan huchasapa runakunata (Gén. 13:14; 19:18-21, 29). Kay sumaq kayninkunata qatikusun chayqa, aswan allinta willasun allin willakuykunata (Col. 4:6). Kayqa manan sumaqta respetowan rimayllachu.
2 Wasin wasinta: ¿Imatan ruwasunman mana allin ratopi runakunata visitaspanchis otaq imaymana ruwanayoq kashaqtinpas? Chay hina kaqtinqa pisillata rimananchis otaq hukpiña kutimusaq, nisunman. Chaymantapas, manan saqenanchischu qelqanchiskunata “manan munanichu” niqkunamanqa, ahinapin rikuchishanchis respetaq kasqanchista. Wasinkutapas respetananchis, chaymi lloqsispaqa punkunkuta wesq’ana, wawanchiskunatapas chayta yachachinanchis. Hinaspapas, wasipi mana pitapas tarispaqa qelqanchiskunata saqesunmanmi mana runakunaq rikunallanpi. Runata respetasqanchismi tanqawasun imaynatachus noqanchispaq runakunaq ruwananta munanchis, chay hinallatataq paykunapaq ruwananchispaq (Luc. 6:31).
3 Callepi: Callekunapi predicaspaqa runakuna respetasqanchista rikuchisun purinankupi ama sayaspa, nitaq vendeqkunaq kasqanpi montorayaspapas. Chaymantapas respetasqanchista qhawarichisunmi tiempoyoq hina kaqkunallaman predicaspa, sinchi apurasqakunaman predicanamantaqa. Mayninpiqa callepi bulla kaqtinqa kallpawanpaschá rimananchis kanman, ichaqa ruwananchis respetowan mana reparachikuq hinalla (Mat. 12:19).
4 Munakuywan imatapas ruwaspanchismi hukkunata yanapasun cheqaq-kayta reqsinankupaq. Iskay panakuna predicaq rishaspanku huk warmita carromanta uraykamushaqta rikuranku, onqosqata hinataq rikurankupas. Chaymi sayaykuspa tapuranku: ¿Yanapaykikumanchu?, nispa. Chay warmiqa muspharanraqmi chay iskay mana reqsisqakuna paypi interesakusqanmanta, yachaytataq munaran ima rayku chhayna munakuq kasqankuta. Chay ruwasqankun yanaparan predicanankupaq. Warmitaq maypi tiyasqanta willakuspa “visitamuwaychis” niran. Estudiayta qallariranku. Pisi tiempomanta huñunakuyta qallariran, kunantaq huk runakunaman cheqaq-kayta predicashan. Chay hinaqa, Jehová Diosta qatikusun munakuq kaypi, respetaq kaypipas.