Mana manchakuq, llanp’u sonqotaq kasun
1 Predicasqanchispiqa tupallanchismi Bibliamanta mana kaqta rimaq runakunawan. Mana manchakuspaña paykunata predicananchis chaypas, kallpachakunanchismi “llanp’u sonqo” kananchispaq, ahinapin mana pitapas phiñachisunchu (Rom. 12:18, NM; Hech. 4:29). ¿Imaynatan mana manchakuspa, llanp’u sonqowantaq Diospa Reinonmanta willasunman?
2 Tupachisqanchismanta rimasun: Llanp’u sonqo runakunaqa manan ch’aqwankuchu. Sichus runakunaq creesqanta uyarispa: “Manan chhaynachu” nisunchis pacha chayqa, manan uyariwasunchu predicasqanchista. Chay rayku, pipas pantasqata rimaqtinqa yaqapaschá tupachisqanchis kaqllamanta rimananchis kanqa. Chayta ruwaqtinchisqa, ichapas sonqonta llanp’uyachisunman uyariwananchispaq.
3 ¿Cheqaq-kayta qhepanchaychu kanman runakunaq pantasqa rimasqankuta ch’inlla uyariy? Manan. Cristianokunaqa manan sapa kuti pantasqa yachachikuyta uyarispa: “Manan chhaynachu” ninanchispaq kamachisqachu kanchis, aswanpas Diospa Reinonmanta allin willakuykuna predicananchispaqmi kamachisqa kanchis (Mat. 24:14). Predicasqanchis runachus pantasqa creesqanmanta willawasun chayqa, manan phiñakunanchischu, aswanpas makilla uyarinanchis imachus creesqanta yachananchispaq (Pro. 16:23).
4 Respetaqmi kananchis: Mayninpiqa mana manchakuspan cheqaq-kaymanta rimananchis. Ichaqa manan pitapas p’enqachinanchischu pantasqata creesqanmanta, yachachisqanmantapas, aswanmi llanp’u sonqo kananchis. Manataqmi k’amiq hinachu paykunata rimapayananchis. Cheqaq-kayta maskhaq runaqa manan uyariwasunchu hatunchakuq kaqtinchisqa, chaymi kallpachakunanchis huch’uyaykukuq, allin runa kananchispaq. Sichus predicasqanchis runata respetowan uyarisun chayqa, uyarinmanmi willasqanchista.
5 Apóstol Pabloqa allintan repararan runakunaq creesqanta, chaymi uyarinankupaq hina allin willakuykunata predicaran (Hech. 17:22-31). Payqa ‘lliw runapaq paykuna hina karan, imaynallamantapas wakinta Cristopi iñichinanpaq’ (1 Cor. 9:22). Noqanchispas pay hina kasunman sichus llanp’u sonqowan, mana manchakuspa allin willakuykunata willasun chayqa.