Jehová Diosqa saminchanmi yanapakuqta
1. ¿Imaynatan Davidpas Nehemiaspas rikuchiranku kikinkumanta allin ruwaq kasqankuta?
1 Israel soldadokunata Goliat asipayashaqtinqa manan mayqen soldadopas paywan maqanakuq lloqsiranchu. Aswanpas, mana maqanakuy yachaq oveja michiq waynan maqanakuq lloqsiran (1 Sam. 17:32). Judío runakunaqa Jerusalenman kutimuspa mana hatarichirankuchu llaqtaq perqankunata, aswanqa Persia llaqta reypa copan haywaqmi reypa wasinpi llank’ananta saqespa Jerusalenta riran, perqakuna hatarichiypi umallinanpaq (Neh. 2:5). Jehová Diosqa samincharanmi Davidta Nehemiastawan kikillankumanta allin kaqta ruwanapaq lloqsisqankumanta (1 Sam. 17:45, 50; Neh. 6:15, 16).
2. ¿Ima raykun cristianokuna yanapakuq kananchis?
2 Kay ‘tukukuy qaylla p’unchaykunapiqa’ manan kanchu yanapanakuy: runakunaqa ruwaynillanpi afanasqa kashanku, ‘kikinkuta munakuqllataq’ kankupas (2 Tim. 3:1, 2). Wakinqa imapas ruwaynillankupin yuyayninkuta churanku, chaymi mana reparankuchu hukkunata yanapay makinpi kasqanta. Cristianokunan ichaqa Jesusman rikch’akuyta munanchis, payqa kikillanmantan runakunata yanaparan (Juan 5:5-9; 13:12-15; 1 Ped. 2:21). ¿Imaynatan hukkunata yanapasunman, ima saminchaykunatataq chaymanta chaskinchis?
3. ¿Yanapakuq kaspaqa imatan ruwasun huñunakuykunapi?
3 Wayqe-pananchiskunata: Hukkunaman “espiritual yanapayta” qonchis huñunakuykunapi tapukuykunata kutichispa (Rom. 1:11, NM). Huñunakuypi tapuykunata kutichispaqa Jehová Diostan hatunchashanchis, yachachikusqata sonqonchispi yuyayninchispi allinta hap’inchis, anchatataq kusikunchis (Sal. 26:12). Escuela del Ministerio Teocraticopi discurso qoq mana hamuqtinqa, kikillanchismanta umalliqman asuykusunman mana hamuqpa rantinta ruwanapaq, chhaynapin allin yachachiq kasun.
4. ¿Imakunapiraqmi yanapakuq kasunman?
4 Qharikunaqa yanapakuq kasqankuta rikuchinkuman congregacionpi umalliq kanankupaq kallpachakuspa (Isa. 32:2; 1 Tim. 3:1). Asambleakuna allinta ruwakunanpaqqa llapanchismi yanapakunanchis asambleaq imaymana ruwayninkunapi. Superintendentewan tukuy sonqo predicaqtinchis otaq mikhunata qoqtinchispas kallpachanakunchismi (Rom. 1:12). Kikinchismanta yanapanchis wakcha wawakunata, viudakunata, onqosqakunata, wawachayoqkunata, hukkunatapas chayqa, anchatapuni kusikunchis, Jehová Diostaq allinta qhawawanchis (Pro. 19:17; Hech. 20:35).
5. ¿Huñunakuy Wasikunapi ima ruwaykunapaq yanapakuqkunata necesitakun?
5 Yanapakullasunmantaqmi Huñunakuna Wasi pichaypi allichaypipas tiemponchista kallpanchistapas qospa. Chaymantapas Diospa llaqtan yapakushantaq chayqa, aswan-aswantan necesitakushan mosoq Huñunakuy Wasikuna, chaykuna hatarichinapaq yanapakuqkunatapas. Huk wayqenchis warminpiwan Grupo de Construcción de Salones del Reino nisqaman yanapakuq riranku, paykunaqa manan imatapas yacharankuchu wasi hatarichiymanta. Chaypiñan paykunataqa yachachiranku kunantaq ladrillowan perqayta yachankuña. Pananchis nin: “Iñiqmasinchiskunawan kuska llank’aspaykun askha amigokunata tariyku. Sayk’usqaña ch’isiyayku chaypas, espiritualpiqa allintan kallpachakuyku”, nispa.
6. ¿Ima raykun predicay imamantapas aswan allin?
6 Predicaspa: Kay tiempopi aswan allin ruwayqa Reinomanta predicaymi. Pitapas Bibliaq nisqanta entiendenanpaq chayman hina kawsananpaqpas yanapaqtinchisqa, chay runaqa yachanqan imapaqchus kawsasqanta, kallpachakunqataq sasachakuykunata atipananpaq, yachallanqataqmi hamuq tiempopaq ima suyakuy kasqantapas. Bibliamanta yachachispaqa hukkunatan yanapashanchis wiñay kawsayta aypanankupaq (Juan 17:3, Edición 1988; 1 Tim. 4:16). Chaymi kawsayninchista qhawarikunanchis, chayman hina predicayninchista yapanapaq, yaqapaschá precursor auxiliar kaspa, regular kaspa, huk llaqtakunaman astakuspa, mana chayqa huk simita yachaspapas.
7. ¿Ima raykun ancha allinpuni kanman kikinchismanta yanapakuq kay?
7 Davidmi willaran Mesías kamachikuyta qallariqtin Diospa llaqtan ‘paymantakama qatikunanta’ (Sal. 110:3). Cosechay llank’aytaq usqhamushan chayqa, askhan llank’ana kashan yanapakunanchispaq (Isa. 60:22). ¿Ninkichu qan: “Ñoqan kaypi kashani, ñoqata kachaway”, nispa? (Isa. 6:8.) Sichus kikinchismanta yanapakuq kasun chayqa, Jehová Diosta kusichisun saminchaykunatapas chaskisun.