“Kaytan ruwankichis yuyariwanaykichispaq”
Jesuspa wañusqanta yuyarisunchis 2 p’unchay abrilta
1. ¿Imatan yuyarisun 2007 wata 2 p’unchay abrilta?
1 2007 wata 2 p’unchay abrilta, teqsimuyuntinpi askha runakuna huñunakunqaku Jesuspa wañusqanta yuyarinankupaq. Jesusqa Taytanpa kamachikuyninta q’emispan wañuran, chaywanmi rikuchiran Satanaspa rimasqan yanqa kasqanta, Satanasmi niran: Runaqa Diosta servin imapas chaskinan raykulla, nispa (Job 2:1-5). Señorpa Cenanqa yuyarichiwallanchistaqmi kayta: Jesús ch’uya kashaspa wañuran ‘askha runa kacharichisqa kanan rayku’ (Mat. 20:28). Chaykuna raykun Jesusqa yachachisqankunata kamachiran: “Kaytan ruwankichis yuyariwanaykichispaq”, nispa (Luc. 22:19). Diospa hatun munakuyninmanta agradecekuspa, allichakushanchisñachu Jesuspa wañusqanta yuyarinapaq? (Juan 3:16.)
2. ¿Imaynatan sonqonchista allichasunman Jesuspa wañusqanta yuyarinapaq?
2 Sonqonchista allichasun: Chay p’unchaypaq hina sonqonchista allichanapaqqa yuyarinanchismi Jesuspa wañunan p’unchay qayllaykamushaqtin imakuna sucedesqanta (Esd. 7:10). Chay rayku Examinando las Escrituras diariamente 2007, nisqa folletopi, Calendario de los testigos de Jehová 2007, nisqapipas lloqsimun chay p’unchaykunapi Bibliata leenapaq programa. Chay programaqa calendarionchisman hina tupachisqa kashan. Ichaqa chay textokunaq willasqan hayk’aqchus ima p’unchaychus sucedesqanqa judiokunaq calendarionman hina kashan, paykunapaqqa p’unchayqa qallarin intiq haykusqanmanta paqarisnin intiq haykunankama. Kaykunata allinta qhawaspa programata ruwakun Examinando nisqa folletonchispi Calendarionchispipas. Jesuspa wañusqan Yuyarina p’unchay allinninchispaq kananpaqqa, chay t’aqasqa textokunata leenanchis, Diosmanta mañakuspataq yuyaymanananchis ancha munakuyninpi.
3. ¿Imaynatan yanapasunman iñiypi chiriyapuqkunata hoqkunatapas Jesuspa wañusqan Yuyarinaman hamunankupaq?
3 Hoqkunata mink’amusun: Febrero killa Reinopaq Servicionchispa suplementonpi rimakuran hatun campañapi runakunata mink’amunapaq Yuyarina huñunakuyman hamunankupaq. Allichakurankiñachu kay hatun llank’aypi yanapakunaykipaq? Ñachu listata ruwakurankiña pikunata mink’amunaykipaq? Ñachu paykunawan rimarunkiña? Ñaupaqmanta allichakuy huñunakuyman temprano chayanaykipaq, chhaynapi mink’asqaykikunata hoqkunatapas chaskinaykipaq. Paykunawan kuska tiyaykuwaq Bibliata takina librotapas qonaykipaq. Congregacionpi wayqe-panakunamanpas reqsichiwaqmi. Huñunakuy tukuytataq tapukuyninkunata kutichiwaq. Mink’awaqtaqmi discurso especialta uyarinankupaq, chayqa kanqa 15 p’unchay abrilta utaq qatiqnin semanallata. Ancianokunan allichananku iñiypi chiriyapuqkuna invitacionta chaskinankupaq, Jesuspa wañusqan Yuyarinaman discurso especialmanpas hamunankupaq.
4. ¿Jesuspa wañusqan Yuyarinaman hamuqkunata, imaynatan yanapasunman iñiyninkupi wiñanankupaq?
4 Iñiypi chiriyapuqkunata, yachay munaqkunatapas yanapay iñiyninkupi wiñanankupaq: Jesuspa wañusqanta Yuyarina huñunakuypi discurso qoqmi willanqa Bibliamanta yachachisqanchista, kallpachanqataq yachay munaqkunata Jehová Diosmanta astawan yachanankupaq. Chay willakusqantan mink’asqaykikunaman yuyarichiwaq iñiyninkupi astawan yanapanaykipaq. Manachus mink’asqaykikuna Bibliata estudiashankuraq chayqa, wasinkuman rispa qhawarichiwaq imaynatan mana qolqellapaq Bibliamanta yachachisqanchista. Aswanta iñiypi yachaypi wiñanankupaqqa huñunakuykunamanmi hamunanku (Heb. 10:24, 25). Chay rayku kallpachay huñunakuykunaman mana p’itiyta hamunankupaq. Sichus iñiyninpi chiriyapuq wayqe-panakuna Jesuspa wañusqan Yuyarina huñunakuyman hamunku chayqa, ancianokunan paykunata visitananku, hinaspa yuyarichinkuman discursopi allin yachachikuykuna uyarikusqanta, chaytaqa ruwananku Diospa llaqtanman kutimunankupaq.
5. ¿Imaynatan yanapawanchis Jesuspa wañusqan Yuyarina huñunakuyman risqanchis?
5 Jesuspa wañusqan Yuyarina huñunakuypiqa yuyaymananchismi Jehová Diospa, Jesuspa noqanchispaq ruwapuwasqanchista. Chhaynapin paykunata astawan munakusun, Diospa munayninman hinataq kausasunpas (2 Cor. 5:14, 15; 1 Juan 4:11). Chay hinaqa, kunanmanta pacha Jesuspa wañusqanta yuyarinapaq allichakunanchis, hoqkunatapas yanapananchis allichakunankupaq, chhaynapi ‘Señorpa wañusqanta willamushanchis’ (1 Cor. 11:26).