Diosqa “sayk’usqatan kallpachan”
1 Mayninpiqa llapanchismi sayk’unchis llank’anapi huk ruwaykunapipas, astawanraqqa kay ‘sasa tiempokunapi’ askha sasachakuykuna kasqanrayku (2 Tim. 3:1). ¿Imaynatan Diospa kamachinkuna iñiyninchispi kallpachakusunman mana sayk’uspa predicashanallanchispaq? Jehová Diosman hap’ipakuspa, payqa “sinchi kallpayoqmi” (Isa. 40:26). Payqa yachanmi ima necesitasqanchista, makillataq qhawamuwashanchis yanapawananchispaq (1 Ped. 5:7).
2 Imaynatan Jehová Dios kallpachawanchis: Jehová Diosqa kallpachawanchis santo espiritunwan, chay kallpawanmi tukuy imaymanata kamaran. Chay espirituqa sayk’usqa kaqtinchismi ‘wakmanta kallpachawanchis’ (Isa. 40:31). Jehová Diospaq ruwayninchiskunata hunt’ananchispaq, ¿mañakushanchischu santo espiritunta? (Luc. 11:11-13.)
3 Sichus sapa p’unchay Diospa Simin Qelqata leesunchis, yuyaymanasunchis, huk qelqanchiskunatapas sapa kuti estudiasun chayqa, ‘mayu patapi sach’a hina, tiempollanpi ruruq sach’a hina, raphinpas q’omerllapunin kashan’ chay hina kasunchis (Sal. 1:2, 3).
4 Jehová Diosqa ‘kallpachallawanchistaqmi’ wayqe-pananchiskunawanpas (Col. 4:10, 11). Huñunakuykunapin kallpachawanchis rimayninkuwan, tapuykunata kutichisqankuwan, discursokunata qosqankuwanpas (Hech. 15:32). Astawanqa congregacionpi umalliqkunan kallpachawanchis yanapawanchispas (Isa. 32:1, 2).
5 Predicayqa kallpachawanchismi: Sayk’usqa kashaspapas predicashallaypuni. Predicayqa manan huk llank’aykuna hinachu sayk’uchiwanchis, aswanpas samachiwanchis (Mat. 11:28-30). Allin willakuykunata predicayqa yanapawanchismi Diospa Reinonta ñawpaqman churananchispaq, chaymi mana qonqasunchu wiñay kawsay suyakuyninchista Diospa qowananchis huk saminchaykunatapas.
6 Manaraq kay millay pacha tukushaqtinqa askharaqmi ruwananchis kashan. Chay hinaqa, ‘Diospa atiy qowasqanchisman hina’ mana pisipaspa llank’ananchis kashan (1 Ped. 4:11). Diospa yanapayninwanqa hunt’asunmi llank’ayninchista, “Payqa sayk’usqatan kallpachan” (Isa. 40:29).