¿Diospa Simin Qelqata defendeshanchischu?
1 Kay pachapi runakunaqa pisipaqmi qhawarinku Diospa Simin Qelqata, cheqaq cristianokunan ichaqa Diospa Simin Qelqamanta allintapuni rimanchis. Yachanchismi ‘Diospa Simin Qelqakunaqa llapallan Diospa yuyaychasqan’ kasqanta, chaymi Jesucristo hina yuyaykunchis, paymi Jehová Diosmanta mañakushaspa niran: “Simiykiqa cheqaq-kaypunin”, nispa (2 Tim. 3:16; Juan 17:17). ¿Imaynatataq Diospa Siminta allintapuni defendesunman?
2 Textokunata yachananchis: Jesusqa Diospa Simin Qelqata allintapuni estudiaq karan. Chayrayku kay pachapi kashaspa Bibliamantapuni yachachiran (Luc. 4:16-21; 24:44-46). ¿Imaynatan umanchispi askha textokunata hap’isunman? Chaypaqqa sapa p’unchaymi Bibliata leenanchis, yuyaymanananchistaq mayqen textochus allin kanman predicanapaq chayta. Huñunakuypaq qelqakunata preparakushaqtinchisqa Biblianchispi maskhananchis mana copiasqa textokunata, yuyaymanananchistaq mayqen textomanta rimananchispaq. Huñunakuypipas discurso qoqpa textokuna leemusqanta maskhananchis. Sichus Bibliamanta textokunata umanchispi hap’isun chayqa, preparasqa kasunchis ‘cheqaq-kay simita allinta yachachinapaq’ (2 Tim. 2:15).
3 Bibliatapuni qhawachiy: Predicashaspaqa Bibliawanpuni yachachinanchis. Atikuqtinqa, sapanka predicasqanchis runaman leesunchis huk textota. Tapuwaqtinchis, otaq manan chhaynachu niwaqtinchisqa Bibliawanpunin kutichina. Sichus predicasqanchis runa ocupasqa kaqtinqa nisunmanmi: “Huk textollata leepusqayki, hukpiña kutimusaq” nispa. Atikuqtinqa, uyariqninchiswan kuska Bibliata leesunman.
4 Huk iñiqmasinchismi predicasqan runaman askha textokunata Bibliapi qhawachiran Trinidad yachachikuy mana cheqaq kasqanta sut’inchananpaq, hinaqtinmi runa niran: “Huch’uyniymantapachan iglesiaman rirani ichaqa manan hayk’aqpas Bibliawan chayta yachachiwarankuchu”, nispa. Chaymi Biblia estudiayta qallariran. Jesusqa niranmi: ovejaykunaqa kunkaytan uyarinqaku, nispa (Juan 10:16, 27). Allin sonqoyoq runakuna cheqaq-kayta reparanankupaqqa Bibliawanpuni yachachinanchis. Chay hinaqa, Diospa Simin Qelqa cheqaq kasqanta defendesunchis.