‘Askhata rurushallasun’
1 Huk kutinmi Jesús yachachisqankunaman niran: Ñoqan kani cheqaq uvas yura, Yayaytaq uvas chakra Llank’aq, qankunataq uvas yuraq rurusapa k’allmankuna kankichis, nispa. Chakra Llank’aqpa ruwananmanta rimaspan Jesús yachachisqankunaman niran: Uvas yuraman hukllachasqallapuni kaychis, nispa (Juan 15:1-4). Chaymi Jehová Diosman asuykuqkunaqa ‘cheqaq uvas yuraq’ rurusapa k’allmankuna hina kananku, chay uvas yuraqa Jesucriston. Askhatapunin ruruchishanallanchis ‘santo espirituq rurunta’, Reinoq ruruntapas (Gál. 5:22, 23; Mat. 24:14; 28:19, 20).
2 Santo espirituq rurun: Espiritualpi wiñasqanchisqa rikukunqa may allinta espirituq rurunman hina kawsasqanchispi. Espirituq rurun ñoqanchispi rurunanpaq, ¿kallpachakushanchischu sapa p’unchay Bibliata estudianapaq, chaypi yuyaymananapaqpas? (Fili. 1:9-11.) Ama manchakuspa Jehová Diospa espiritunta mañakusunchis, chhaynapi Diospa sumaq kayninkunaman hina kawsaspa payta hatunchasunchis, ñawpaqmanpunitaq purisunchispas (Luc. 11:13; Juan 13:35).
3 Espirituq rurunqa yanapawanchismi tukuy sonqowan predicananchispaq. Ejemplopaq, askha ruwanayoqña kanchis chaypas, munakuypas iñiyniyoq kaypas kallpachawasunmi tiempota horqospa sapa kutilla predicananchispaq. Chaymantapas thak kay, ancha pacienciayoq kay, allin runa kay, llamp’u sonqo kay, cuerpota kamachiypas yanapawasunmi contranchispi churakuq runakunata sumaqllawan kutichinapaq. Q’ochukuypas yanapawasunmi kusisqalla predicananchispaq manaña runakuna uyariwaqtinchispas.
4 Reinoq rurun: Ruruchinallanchistaqmi Reinoq ruruntapas, chayta ruwanchis ‘Diosman yupaychay sacrificiota qoshallaqtinchis, chay sacrificioqa Diospa sutinta sut’ita siminchiswan rimariyninchismi’ (Heb. 13:15). Reinoq rurunta ruruchinchis allin willakuykunata tukuy sonqowan predicaspa. ¿Kallpachakushanchischu predicayninchista yapananchispaq, chhaynapi Reinoq rurunta astawan ruruchinapaq?
5 Jesuspa nisqan hina, yachachisqankunaqa manan kaqtakamachu rurunanku karan (Mat. 13:23). Chayrayku, ruwasqanchistaqa mana tupanachinachu hukpa ruwasqanwan, aswanpas tukuy atisqanchista ruwananchis Jehová Diosta servispa (Gál. 6:4). Chayrayku Bibliaq yanapayninwan allinta qhawarikusun imayna llank’asqanchista, chhaynapin Jehová Diosta hatunchashallasun ‘askhata ruruspa’ (Juan 15:8, NM).