Leeqkunaq tapukusqan

¿Santo espirituq llapa ruruchisqanmantachu Gálatas 5:22, 23 textopi willashan?

Gálatas 5:22, 23 textopin willashan santo espíritu isqon sumaq ruwaykunapi yanapawasqanchista, chaypin nin: “Santo espiritun ichaqa ruruchin: munakuyta, kusikuyta, thaj kausayta, pacienciakuyta, sumaq sonqo kayta, allin sonqo kayta, iñiyta, llamp’u sonqo kayta, cuerpo kamachiq kayta ima”, nispa. Ichaqa manan chhayna kanallanchispaqchu Diospa espiritunqa yanapawasunman.

Chayta yachanapaq qhawasun imatas Pablo niran ñaupaq versiculokunapi: “Aychaq munasqan millay ruwaykunaqa: [...] qhelli jucha ruwaykuna, millakunapaq kaq ruwaykuna, mana p’enqarikuspa juchallikuykuna, ídolo adoraykuna, layqa ruwaykuna, cheqninakuykuna, churanakuykuna, qhawanakuykuna, k’araq phiñakuykuna, mana acuerdoman jaykuspa discutiykuna, taq’anakuykuna, waj t’aqata jatarichiykuna, envidianakuykuna, machaykuna, millay fiestakunapi puriykuna, llapa chhayna mana allin ruwaykuna ima”, nispa (Gál. 5:19-21). Colosenses 3:5 nisqan jina juj millay ruwaykunamantawanmi Pabloqa rimanman karan. Chhaynallataqmi Gálatas 5:22, 23 textopi rimallanmantaq karan juj sumaq ruwaykunamantawan. Chaymi chay textopiqa manan santo espirituq llapa ruruchisqan ruwaykunamantachu willasharan.

Chaytaqa yachanchis Gálatas llaqtapi iñiqmasikunaman qelqasqanta Éfeso llaqtapi iñiqmasikunaman qelqasqanwan comparaspan, chaypin niran: “K’anchaymi ruruchin tukuy sumaq sonqo kayta, chanin kayta, cheqaq kayta ima”, nispa (Efes. 5:8, 9). Yachasqanchis jina santo espirituqa “sumaq sonqo” kayta chanin kayta cheqaq kayta iman ruruchin. Manaña apóstol Pablo Gálatas 5:22,23 nisqanpi chanin kaymanta cheqaq kaymantawan qelqaranchu chaypas, chaykunapas santo espirituq ruruchisqanmi.

Chaymantapas Pablon Timoteota niran: “Kallpachakushallay chanin kanaykipaq, Dios sonqo kanaykipaq, allin iñiq kanaykipaq, munakuq kanaykipaq, aguantaq kanaykipaq, llamp’u sonqo kanaykipaqwan”, nispa (1 Tim. 6:11). Iñiywan, munakuywan, llamp’u sonqo kayllapiwanmi santo espirituq ruruchisqanpiqa tarikun. Timoteon ichaqa necesitallarantaq santo espirituq yanapayninta Dios sonqo kananpaq, chanin kananpaq, aguantaq kananpaqpas (tupanachiy Colosenses 3:12; 2 Pedro 1:5-7).

Chay jinaqa Gálatas 5:22, 23 textopiqa manan Diospa espiritunpa llapa ruruchisqan sumaq ruwaykunamantachu willashan. Diospa espiritunqa yanapawasunmanmi juj sumaq ruwaykunatawan ruwananchispaq, chhayna kananchispaq kallpachakuspan allin cristiano kasunchis, jinaspa p’achakusunchis “mosoq runa kaywan; chayqa Diospa munayninman jinan kamasqa karan cheqaq chanin kaypi, junt’aq sonqo kaypi ima” (Efes. 4:24).