Tapuykuna

◼ ¿Imarayku mana allinchu Internetpi mana reqsisqanchis runakunawan rimay?

Internetpiqa kanmi askha sitios nisqakuna runakuna rimanankupaq reqsinakunankupaqpas. Chay sitios nisqakunapin runakuna churankuman rikch’ayninkuta, pi kasqankuta, maypi tiyasqankuta, hukkunatapas. Chayta qhawarispan Internetman riqqa munasqan runawan rimayta qallarinman. Chay sitios nisqakunatan astawanqa maskhanku wayna sipaskuna, wakin iñiq wayna sipaskunapas chaypin maskhanku Jehová Diospa testigonmi kani niq runakunata.

Internetpi reqsisqanchis runaqa pakanmanmi pi kasqanta, yuyaykusqanta, Jehová Dioswan imaynapi kasqantapas (Sal. 26:4). Mana iñiq runapas Diospa llaqtanmanta qarqosqa runapas otaq Diospa llaqtanmanta t’aqakuspa contranpi rimaq runapas ninmanmi Jehová Diospa testigonmi kani nispa (Gál. 2:4). Chay sitios de Internet nisqakunapis erqechakunata violaqkunapas maskhashallanku erqechakunata.

Yachasunmanña chay runa Diospa llaqtanpi kasqanta chaypas, Internetpi paywan rimaspaqa waqllinmanmi rimasqanchis. ¿Imarayku? Manataq kikinchischu payta reqsinchis chayqa mana p’enqakuspan rimasunman. Chaymantapas wakinqa ninmanpaschá Internetpi rimasqaykutaqa manan yachanqachu tayta mamaypas ancianokunapas ni pipas, nispa. Askha iñiqmasinchiskunaq wawankunan chhaynata yuyaykuspa qhelli rimaykunata rimanku (Efe. 5:3, 4; Col. 3:8). Wakintaq chay sitios de Internet nisqakunapi fotonkuta churanku hukkunaq qhawapayananpaq hina, mana allin sutikunawan reqsichikunku otaq churallankutaq qhelli kawsaymanta takikunata.

Chayrayku tayta mamakunaqa makilla qhawananku wawanku Internetpi ima ruwasqankuta (Pro. 29:15). Manan wasiman pusasunmanchu mana reqsisqanchis runataqa, nitaqmi wawanchiskunatapas paywan kuskata saqesunmanchu. Chay hinallataqmi, mana allinchu kanman kuraqña wayna sipasña kaspapas Internetpi mana reqsisqanchis Jehová Diospa testigonmi kani niq runakunawan rimayqa (Pro. 22:3).