Chaniyoqpaq qhawarisun sumaq llank’ayninchista
1 Ñawpaqmantapachan Jehová Diosqa kamachinkunaman sumaq llank’aykunata qoran: kuraqkunamanpas wawakunamanpas; warmikunamanpas qharikunamanpas; qhapaqkunamanpas wakchakunamanpas (Luc. 1:41, 42; Hech. 7:46; Fili. 1:29). ¿Imakunatan Jehová Dios qowanchis kay tiempopi?
2 Diospa sumaq qokuyninkuna. Jehová Diosqa sumaq yachachiyninkunatan qowanchis (Mat. 13:11, 15). Qoykuwallanchistaqmi huñunakuykunatapas chaypi siminchiswan payta hatunchananchispaq (Sal. 35:18). Chayrayku kallpachakunanchis huñunakuykunapi comentananchispaq, huk sumaq llank’aykunatapas tukuy sonqo ruwananchispaq. ¿Yanapakullanchischu Huñunakuy Wasi pichaypi allichaypipas? Chay ruwaykunapas Jehová Diospa qokuyninkunan.
3 Millonninpi runakunan mana yachallankupaschu mañakusqanku uyarisqachus icha manachus chayta, ñoqanchismi ichaqa yachanchis Tukuy atiyniyoq Diosninchis uyariwasqanchista (Pro. 15:29). Jehová Diosqa pay kikinpunin mañakusqanchista uyarin (1 Ped. 3:12). Paymanqa mañakullasunmanmi hayk’a kutitapas. ¡Ima sumaqmi Jehová Diosmanta “mana p’itiyta” mañakuyqa! (Efe. 6:18.)
4 ‘Diospa llank’aysiq masinkunan kanchis.’ Diosqa qowallanchistaqmi huk sumaq llank’ayta: Reinomanta allin willakuykuna willaypi ‘llank’aysiq masinkuna’ kananchispaq (1 Cor. 3:9). Chay llank’ayqa kallpachawanchismi, anchatataq kusichiwanchispas (Juan 4:34). Jehová Diosqa mana ñoqanchiswanpas ruwachinmanmi chay llank’aytaqa, ichaqa munakuq kayninpin chay llank’ayta ñoqanchisman qowanchis (Luc. 19:39, 40). Diosqa manan llapa runakunamanchu chay llank’anataqa qon, aswanpas kamachikuyninkunata hunt’aqkunallamanmi (Isa. 52:11). ¿Chaniyoqpaqchu hap’inchis chay llank’ayta? ¿Kallpachakunchischu sapa semana predicananchispaq?
5 Jehová Diospa qokuyninkunaqa kusisqatan kawsachiwanchis (Pro. 10:22). ¡Amapuni hayk’aqpas Diospa qokuyninkunataqa pisipaq qhawarisunchu! Aswanpas chaniyoqpaqpuni qhawarisunchis. Chhaynapin hanaq pacha Yayanchisqa sumaqta qhawariwasun, paymi “tukuy allin kaqkunatapas, tukuy chanin kaqkunatapas” qowanchis (Sant. 1:17).