Reinomanta willayqa ancha chaniyoq privilegion
1 Sapa p’unchaymi waranqa waranqanpi runakuna chaskinku Jehová Diospa munakuywan kawsanapaq imaymana qosqanta (Mat. 5:45). Ichaqa, pisi runakunalla Kamaqninchista agradecekushanku Reinonmanta allin willakuykunata willaspa (Mat. 24:14). ¿Hayk’atan chaninchanchis kay hatun privilegiota?
2 Reinomanta willayqa Diosta hatunchan, llakisqa runakunamantaq thak-kaytapas suyakuytapas qon kunan sasachakuykunayoq tiempopi (Heb. 13:15). Kay willakuyta kasukuqkunapaqqa wiñay kawsaymi suyashan (Juan 17:3). Kay pachapi ¿Ima llank’aytaq otaq profesionpas chay saminchaykunata qowasunman? Apostol Pabloqa servicionta ancha munakusqanta rikuchiran chay servicionta allinta ruwaspa. Paypaqqa qori hinan karan (Hech. 20:20, 21, 24; 2 Cor. 4:1, 7).
3 Ancha hatun privilegionchista chaninchasun: Predicacionta ancha munakusqanchistaqa rikuchisun allinta llank’aspa. ¿Orqonchischu tiempota huk temata allichananchispaq, uyariqninchiskunaq sonqonkuman chayanapaq hina? ¿Kallpachakusunmanchu aswan allinta Bibliawan yachachinapaq, runakunatapas tapuykunawan yuyaymanachinanchispaq? ¿K’apaktachu llank’ashanchis qowasqanchis territorionchista? ¿Yachanchischu imaynatan qallarisunman qosunmanpas Bibliamanta estudiokunata? Ñawpa otaq kunan tiempo hawisqa cristianokuna hina, yachanchismi kay ruwayqa ancha chaniyoq kasqanta, chaymi kuyurichiwanchis yawraq sonqowan servinapaq, kay privilegiotapas chaninchanapaq (Mat. 25:14-23).
4 Yaqapaschá machupayaymanta sasachakuykuna, onqoykuna, otaq huk sasachakuykunapas ñak’arichishasunki; hinaña kaqtinpas, yawraq sonqowan predicanapaq kallpachakusqaykiqa ancha chaniyoqmi Jehová Diospaqqa. Diospa Simin qelqan cheqaqtapuni niwanchis, payqa anchatapuni chaninchan servinapaq kallpachakusqanchista, hinaña hukkunaq qawariyninpaqqa mana chaniyoq hina kaqtinpas (Luc. 21:1-4).
5 Reinomanta willayqa anchata kusichiwanchis. 92 watayoq pananchis niran: “Ancha kusikuymi noqapaqqa 80 wata Diosta tukuy sonqoywan servisqayta yuyariyqa. ¡Manapuni imamantapas pesapakunichu! Kawsayniypi waqmanta qallariyta atiyman chayqa, kaqllatapuni ruwayman, ‘Diospa munakuyninqa kawsaymantapas aswan chaniyoq kasqanrayku’”, nispa (Sal. 63:3). Noqanchispas rikuchisun Diospa Reinonmanta willananchispaq qowasqanchis privilegiota anchatapuni chaninchasqanchista.