Kallpachakusun servicionchista yapanapaq
1 Apóstol Pablo cristianokunata Diospa ñanninpi purinankupaq kallpachaspan niran: “Aswan allintaraq ruwashallaychis”, nispa (1 Tes. 4:1, NM). Chayta nispanmi apóstol Pabloqa kallpachawashanchis servicionchista yapananchispaq, chay ‘llank’ayta allinta hunt’ananchispaqpas’ (2 Tim. 4:5).
2 Imanaqtinmi servicionchista yapanchis: Kamaqninchista aswan allinta serviyta munaspanchismi servicionchistaqa yapanchis, iñiyninchispi astawan wiñanchis, aswan allintataq predicanchispas. Sichus Diosta serviyta munaspa tiempota t’aqanchis estudianapaq Diospaq huk ruwayninchiskunata hunt’ananchispaqpas chayqa, servicionchista aswan allinta ruwasunchis (Sal. 1:1, 2; Fili. 4:6; Heb. 10:24, 25).
3 Chaymantapas kallpachakunanchismi qoykukuq kanapaq hukkunatapas yanapanapaq. Chaypaqmi Diosmanta mañakuspa Jesuspa ruwasqankunapi yuyaymanananchis (Mat. 20:28). Jesusqa anchatan kusikuran hukkunata servispa (Hech. 20:35). Ñoqanchispas pay hina kasunman runamasinchista munakuspa atisqanchisman hina servicionchistapas yapaspa (Isa. 6:8).
4 Tayta mamakuna, wawaykichispaq ejemplo kaychis: Huch’uy wawakunapas astawanmi Diosta servinkuman allin yachachisqa kaspaqa. Wawakunaqa makillan qhawashanku tayta mamankuq tukuy sonqo predicasqankuta, astawan Diosta servinankupaq imaymana ruwasqankutapas. Ejemplopaq, huk wayqenchismi wawallaraq kashaspa abuelonta yanapallaqpuni karan Diosta servinanpaq imaymana ruwasqanpi. Abuelonpa kusisqa tukuy sonqo llank’asqanta rikuspanmi kallpachakuran wayqe panakunata yanapananpaq. Payqa siervo ministerialña kapun.
5 Wayqekuna: “Pipas umalli kaytapuni munan chayqa, allin llank’aytan akllakun.” (1 Tim. 3:1.) Chayta nispan Bibliaqa llapa wayqekunata kallpachashan umalli kaspa congregacionpi astawanraq llank’anankupaq, umalli kanankupaqmi ichaqa kamachikuykunataraq hunt’ananku. Manan tukuy yachayniyoqraqchu kananku nitaq imaymana ruwaytaraqchu yachananku umalli kanankupaqqa; sichus ñawpaqta maskhanku Diospa Reinonta, tukuy sonqowantaq servicionkutapas ruwanku chayqa, hunt’ankumanmi umalli kanankupaq (Mat. 6:33; 2 Tim. 4:5). Chaymantapas hukkunapaqmi allin ejemplo kananku.
6 Llapanchismi servicionchista yapananchis: Kay cosechay tiempopin Jehová Diosqa askha runakunata llaqtanman huñumushan (Isa. 60:22). Chayraykun Jesuspa qatikuqninkunaqa astawan kallpachakunanku servicionkuta yapanankupaq. 2006 servicio watapin bautizakuranku 248.327 runakuna, otaq nisunman: Sapa p’unchay bautizakuranku soqta pachak pusaq chunka runakunamanta aswanraq. Chay hinaqa, llapallanchis kallpachakusun servicionchista astawan yapanapaq.