Ama manchakuychu estudio qoyta
1. ¿Imaynatan runakunata ‘yanapashanchis’?
1 Jehová Diospa testigonkunaqa ‘yanapashallanchismi’ runakunata Diospa Reinonmanta willaspa (Pro. 3:27). Reinomanta allin willakuykunata uyariyqa allinpunin runakunapaq. Chayrayku allintapaschá predicashanki qelqakunata saqespa otaq maypiña tarikuspapas, ichaqa ¿kallpachakushankichu Bibliamanta estudiota qonaykipaq?
2. ¿Iman hark’awashasunman Bibliamanta estudiota qonapaq?
2 Mayninpiqa manchakusqanchisrayku mana estudiota qonchischu: nisunmanpaschá, manan allintachu estudiachiyman otaq manan tiempoypas aypawanchu, nispa. Qatimuqpi willakuykunan yanapasunki manchakuyniykikunata atipaspa estudiota qonaykipaq (Mat. 28:19; Hech. 20:20).
3. ¿Imaraykun allin wakichisqa kashanchis Bibliamanta yachachinapaq?
3 Manan atiymanchu: Yaqapaschá kayta yuyaykuwaq: mana estudioyoqtaq kani chayqa manan Bibliamanta estudiachiyta atiymanchu, nispa, charaykupaschá mana huk estudiotapas qallarinkiraqchu. Ichaqa yuyariy qallariy siglopi cristianokunapas ‘mana estudioyoq runakunallan’ karanku. Chaywanpas allintan Bibliamanta yachachiranku. ¿Maypitaq yacharanku? Biblia nin: “Jesuspa puriqmasin kasqankuta” (Hech. 4:13). Arí, Allin Yachachiq Jesusmantan yacharanku. Ñoqanchispas paymantan yachasunman, chay yachachikuyninkunaqa Diospa Simin Qelqapin tarikun. Mana estudioyoqña kanchis chaypas llapallanchismi Diospa ancha chaniyoq yachachikuyninkunata chaskishanchis (Isa. 50:4; 2 Cor. 3:5).
4. ¿Imatan yachanchis Amosmanta?
4 Mayninpiqa mana estudioyoq runakunatan Jehová Dios kamachiran allin yachayniyoq runakunata anyananpaq. Hukninmi karan Amós, paymi niran: “Manan profetachu kani, manataqmi profeta t’aqamantapaschu, aswanpas uywa michiqllan kakuni, k’ita higostataqmi” t’urpunipas, nispa (Amós 7:14). Chaywanpas, mana manchakuspan Amosqa torillokuna yupaychaq Amasiasman Jehová Diospa huchachasqanta willaran (Amós 7:16, 17). Chhaynallatataqmi ñoqanchistapas Dios yanapawasun Bibliamanta estudiota qonanchispaq (2 Tim. 3:17).
5. Askha llank’anayoqña kanchis chaypas, ¿imaraykun kallpachakunanchis estudiota qonapaq?
5 Manan tiempoy kanchu: Sinchi llank’anayoqña kashaspapas t’aqarankiñan tiempoykita sapa kutilla predicanaykipaq. Chay t’aqasqayki tiempopi estudiotawan qonki chayqa anchatan kusikunki. Diospa Simin Qelqan runakunaq kawsayninta t’ikran, chaymi kusichiwanchis (Heb. 4:12). Jehová Diospas kusikunqan runamasinchista tukuy sonqomanta ‘cheqaq-kayta reqsinankupaq’ yanapaqtinchisqa (1 Tim. 2:4). Angelkunapas kusikunqakun, sichus huk runa huchanta saqepuspa Diospa munasqanta ruwanqa chayqa (Luc. 15:10).
6. ¿Ima sumaq ruwaypin yanapakushanchis Diospa munaynin hunt’akunanpaq?
6 Diosmi ‘munan llapa runakuna qespichisqa kanankuta, cheqaq-kayta reqsinankutapas’ (1 Tim. 2:4). Ñoqanchistaq yanapakushanchis Diospa munaynin hunt’akunanpaq. ¡May sumaqmi chayqa! Chhaynaqa, ¡ama manchakuychu estudio qoyta!