Familianku wañupusqanmanta llakikuqkunata kallpachasun
1. ¿Imaraykun kallpachananchis familianku wañupusqanmanta llakikuqkunata?
1 Familianchis wañupuqtinqa sinchi llakikuymi astawanraqqa kawsarinpuymanta mana yachaqkunapaq (1 Tes. 4:13). Chaymi tapukunku: “¿Imaraykun wañupun? ¿Maypin kashan? ¿Hukmanta tupasaqchu?” nispa. Qatimuq parrafokunapi willakuykuna yanapawasun familianku otaq amigonku wañupusqanmanta llakikuqkunata kallpachanapaq (Isa. 61:2, NM).
2. ¿Unaytachu rimasunman familianku wañupusqanmanta llakikuypi tarikuqkunawan tupaspa?
2 Wasin-wasinta: Yaqapaschá pillapas niwasunman familiaymi wañurakapun nispa. Waqashanpaschá otaq wasinpi familiankuna sinchi llakisqa kashanku. Chhayna kaqtinqa pisillata rimasunman (Ecl. 3:1, 7). Nisunmanmi sinchi llakikunapaqmi chayqa nispa, saqesunmantaq wañuqkunamanta willaq tratadota, revistata otaq folletotapas chaymantataq ripusunman. Huk p’unchay kutispaña Bibliamanta rimaspa kallpacharisunman.
3. Atikuqtin, ¿ima textokunata leepusunman familianku wañupusqanmanta llakikuqkunaman?
3 Mayninpiqa chayllaraq visitashaspa astawanpaschá rimarisunman, ichaqa allinta reparananchis. Rimashaqtinchis pantasqata rimaqtinkuqa mana ninanchischu manan chhaynachu nispaqa, aswanpas Bibliapi rikuchisunman wañupuqkunapaq ima suyakuy kasqanmanta (Juan 5:28, 29). Yaqapaschá willasunman wañupuqkuna imaynapi tarikusqankumanta (Ecl. 9:5, 10). Hinaspapas Bibliapi qhawachisunman kawsarinpuymanta willakuykunata, chhaynapi kallpachasunman (Juan 11:39-44). Willallasunmantaqmi kawsarinpuypi Jobpa suyakusqanmanta (Job 14:14, 15). Manaraq ripushantinchis munachisunman ¿Qué nos sucede cuando morimos?, Cuando muere un ser querido nisqa folletokunata, huk folletotapas otaq tratadotapas. Saqellasunmantaqmi ¿Imatapunin Biblia yachachin? nisqa librota, chaymanta qhawachisunman 6 capitulota nisunmantaq hukpi kutimusaq astawan yachananchispaq nispa.
4. ¿Imaynatawanmi wañupuqkunaq familianta kallpachasunman?
4 Hukkunapi: Jehová Diospa testigonkunaq Huñunakunan Wasipi wañupuqpaq discurso ruwakuqtinqa hamunqakupaschá mana iñiq runakuna. Chay runakunamanmi qosunman wañupuqkunamanta willaq qelqakunata, chhaynapi kallpachakunankupaq. Wakin funerariakunaqa anchatan agradecekunku wañupuqkunaq familianman qonankupaq qelqakuna saqesqanchismanta. Mayninpiqa radiopin willakun pichus wañupusqanmanta, chayta uyarispaqa qelqasunmanmi cartata wañupuqpa familianta kallpachanapaq. Huk pananchismi cartata tratadokunatawan apachiran huk viudoman ususinmanwan. Hinan chay runaqa ususinpiwan pananchispa wasinta rispa niran: “¿Qankunachu kay cartata apachimuwarankichis? Astawanmi Bibliamanta yachayta munani”, nispa. Chay runaqa ususinpiwanmi Biblia estudiayta qallariran huñunakuykunamanpas riran.
5. ¿Imaraykun makilla kashananchis wañupuqkunaq familianta kallpachanapaq?
5 Eclesiastés 7:2 texto nin: “Aswan allinmi wañuqpa wasinman riy q’ochukuna wasiman riymantaqa”, nispa. Arí, familianku wañupusqanmanta llakikuqkunaqa astawanmi Bibliamanta uyariyta munanku kusikuyllata munaq runakunamantaqa. Chaymi makilla kashananchis wañupuqkunaq familianta kallpachanapaq.