Manapunin hayk’aqpas qonqanachu familiapi otaq sapallapas Bibliata estudiaytaqa
1. ¿Imaraykun Umalliq T’aqa allinta qhawarishan Diospa llaqtanpi kaqkunata?
1 Apostolkunaq tiemponpi hinan kay tiempopi Umalliq T’aqapas allinta cuidashan Jehová Diospa llaqtanpi kaqkunata (Hech. 15:6, 28). ¿Imarayku? Manchay ñak’ariy cercallapiña kasqanrayku. Arí, chayaramushanñan kay millay pachaq tukukuynin, chaymi Reinomanta predicaqkunaqa sapankanchis allin hap’ipasqa kashananchis Jehová Diosman. ¿Imatan chaypaq ruwananchis? Qelqamanta Yachanapaq nisqa huñunakuyta manañataq sapaq wasikunapichu ruwasun chayqa, chay tiemponchistan hap’inanchis familiapi Bibliata estudiaspa Diosta hatunchanapaq, amayá huk ruwaykunapichu usuchisun. Chhaynapin Diospa Simin Qelqapi kaq yachachikuykunata allinta yachasunchis, unu hinataq kanqa ñoqanchispaq (Sal. 1:1-3; Rom. 11:33, 34).
2. ¿Imatan ruwananku chay ch’isi familiapi umalliqkuna, solterokunapas?
2 Chay ch’isin familiantin Diosta hatunchasun: Familiapi umalliqkuna, allinta hunt’aychis Diospa kamachisqasuykichista. Chaypaqqa sapa semananmi familiapi Bibliata estudianaykichis (Deu. 6:6, 7). Qankunapas, solterokuna, sichus mana pi familiaykichistapas cuidanaykichischu chayqa, chay ch’isinta sapallaykichispi allintapuni Bibliata estudiaychis. Biblian nin: “Tiempotaqa ama usuchiychischu”, nispa. Chayrayku t’aqananchispuni tiempota Bibliata estudianapaq, chaypitaq allinta piensananchis. Chhaynapin allin kallpachasqa kasunchis kay ‘mana allin p’unchaykunapi’ (Efe. 5:15, 16).
3, 4. ¿Imakunatan estudiasunman? ¿Imapaqmi chayta ruwana?
3 ¿Imakunatan chay ch’isin estudiasunman? Índice de las publicaciones Watch Tower nisqa libropi hinallataq CD-ROM Watchtower Library nisqa discopipas askha imaymana allin yachachikuykunan kan, chaykunawanmi yanapachikusunman familiapi estudiaspa allinta kallpachakunanchispaq. Chaymantapas estudiasunmanmi Qhawaq nisqa revistapi lloqsimuq wakin yachachikuykunata. Chaykunan kanman: “Familiakunapaq sumaq yachachiykuna”, “Tayta mamakuna wawankuta yachachinankupaq willakuykuna”, “Wayna sipaskunaq yachananpaq” nisqa yachachikuykuna. Chaymantapas estudiakunmanmi ¡Despertad! nisqa revistapi “Wayna sipaskunan tapukunku” nisqamanta otaq Diospa kamasqanmanta lloqsimuq yachachikuykunatapas.
4 Allin yuyaywan mana phawarispalla Bibliata leeyqa allinpunin, chhaynapin yuyayninchispi sonqonchispi ima hap’isun Diospa llapa allin yachachikuyninkunata kamachikuyninkunatawan (Heb. 4:12). Chaymantapas allinmi kanman mayninpi familianchiswan kuska videonchiskunata qhawaspa chaykunamanta rimay. Ichaqa manan chaykunallatachu estudiasunman; imaymanakunan kan estudianapaqqa. Chayraykun familianchispi kaqkunata tapusunman imakuna estudiay munasqankuta yachanapaq.
5. ¿Imanaqtinmi manapuni qonqananchischu familiapi sapallanchispas Bibliata estudiayta?
5 ¿Imaraykun manapuni qonqananchischu Biblia estudiayta? Bibliata estudiaspaqa Jehová Diostan astawan reqsisun, astawantaq payman k’askakusun. Chhaynapin listo kashasunchis Éxodo 14:13 textoq nisqanta kasunapaq, chay texton nin: “Ama mancharikuychischu, allinta sayaychis, kunanmi Señor Diospa qespichiwananchispaq ruwasqanta rikunkichis”, nispa. Cristiano tayta mamakunaqa “kay q’ewisqa waqllisqa miray ukhupi” tiyasqanchisraykun necesitanku wawankuta uywanankupaq Diospa yanapayninta (Fili. 2:15). Escuelapi qhelli ruwaykuna kasqanraykun wawakunapas necesitanku yanapanata (Pro. 22:3, 6). Casarasqakunapas astawanmi kallpachakunanku Jehová Dioswan allin hukllachasqa kanankupaq (Ecl. 4:12). Yachasqanchis hina, pisillañan tiempoqa kashan, chaymi tiempota hap’inanchis “ancha ch’uya iñiyni[n]chispi” allinta wiñashanallanchispaq (Jud. 20).