Familiapaq horario: Familiantin estudianapaq
1 Cristiano tayta mamakuna, wawaykichisman ima qosqaykichismantapas aswan allin regaloqa, Jehová Diosta munakusqaykichismanta yachachiymi. Chaytaqa ruwawaqchismi sapa semana “wasipi kashaspa” familiawan estudiaspaykichis (Deu. 6:5-7). Religionpa t’aqasqan familiapi tiyanki otaq sapallayki wawaykikunata uywashanki chaypas, atiwaqmi sapa kutin familiantin estudiayta, chhaynapi wawaykikunata yanapanki Jehová Diosman, qanmanpas achhuykunankupaq.
2 Familiantin estudio qallarinapaq. Ñawpaqtaqa yachakunanku kuska estudiayta. Sichus manaraq yachankichu ima p’unchay, ima hora estudianaykichista chayqa, ¿imaraykun mana familiaykita tapunkichu? (Pro. 15:22.) Wawaykikuna huch’uyllaraq kashanku chayqa, allinchá kanman pisi pisillata semanantinpi askha kutita estudianaykichispaq. Reparay mayqen horario allin kanman qankunapaq. Churay huk horata familiaykiwan estudianaykipaq, kallpachakuytaq hunt’anaykichispaq.
3 ¿Imatan estudiawaqchis? Wakinqa preparakunku Congregacionpi Estudiana Librota otaq Atalayatapas chay semanapi tupaq leccionkunata. Hukkunataq wayna sipaskunapaq hina temakunata estudianku. Iskay wawayoq tayta, niran: “Wawakunaqa sapa semana estudiota imata hinaraq suyakunku, Mi libro de historias bíblicas nisqa libromanta dramakuna ruwakusqanrayku. Chhayna yachachisqaqa allinta entiendenqaku sonqonkumantaq chayanqa, chaymi aswan allinqa askha parrafokuna estudiaymantaqa”, nispa.
4 Sapa semana estudiaychis. Familiaqa kusikuywanmi estudiota suyanan. Qonqaylla imapas kaqtinqa cambiakunmanmi estudiana p’unchayta, horatapas, ichaqa estudiotaqa ruwashanallapunin. Mayninpiqa, cambianapaschá kanqa estudiana temata. Ichaqa, cambio kaqtinpas pisi tiempollapaqmi kanan, chaymantaqa kaq horariollaman kutinan. Familiantin estudianapaq hora cambiakuqtinqa, tayta willananmi mosoq horapi estudiakunanpaq. Tayta mamakuna sapa kutin estudianankupaq kallpachakusqankuqa kusapunin. Wawaykichista “kasuchikuspa uywaychis, [“Jehová”, NM] Señormanta yachachispa”, chhaynapi rikuchinkichis paykunatapas munakusqaykichista hinallataq Jehová Diostapas munakusqaykichista (Efe. 6:4).