Aguantaqmi kananchis
1 Apóstol Pabloqa 30 wata mastaraqmi tukuy sonqowan allin willakuykunata willaran, mayninpin ichaqa askha sasachakuykunapi tarikuran (2 Cor. 11:23-29). Chhaynaña kaqtinpas manan hayk’aqpas saqeranchu predicaynintaqa (2 Cor. 4:1). Payqa yacharanmi Jehová Dios kallpachananta (1 Tes. 2:2). Imaymana pruebata aguantasqanraykun payqa allin ejemplo karan, chaymi niran: “Ñoqamanta yachaqakuychis, imaynan ñoqapas Cristomanta yachaqakuni hinata”, nispa (1 Cor. 11:1).
2 Imaymanatan aguantananchis: Askha cristianomasinchiskunan sapa p’unchay aguantanku familiankuq, llank’aqmasinkuq, escuelapi yachaqmasinkuq burlakusqanta, churapakusqanta, mana uyariq tukusqankuta ima (Mat. 10:35; Juan 15:20). Yaqapaschá qanpas chhaynapi tarikushanki, otaq sinchi onqosqa kashanki, otaq sonqoyki kallpachashasunkiman imaymanakunata munapayanaykipaq hinaspa chayta aguantanayki kashan. ¿Imatan ruwawaq mana pisipanaykipaq? Ñawpaq tiempopi Diosta serviqkunaq hinallataq kay tiempopi cristianomasinchiskunaq ejemplonpin yuyaymananayki, paykunaqa imaymana sasachakuykunatan aguantaranku (1 Ped. 5:9).
3 ¿Imatawanmi ruwananchis mana pisipaspa predicashanallanchispaq? “Diospa qosqan llapallan tupapakuna p’achawan[mi]” churakunanchis (Efe. 6:10-13, 15). Chaymantapas Jehová Diosmantan santo espiritunta mañakunanchis, chhaynapi pruebakunata aguantananchispaq (2 Cor. 6:4-7). Hinaspapas Satanasta, kay pachaq munapayayninkunatawan atipananchispaqqa kasukunanchismi Diospa kamachikuyninkunata (Sal. 119:24, 85-88). Imaynan huk wawa munakuq taytanpa cartanta yapa-yapamanta leen, chhaynatan ñoqanchispas sapa p’unchay Bibliata leenanchis, chhaynapi Jehová Dioswan taytantin wawantin hina kananchispaq. Bibliata estudiaspaqa allin yuyaywanmi ima pruebatapas aguantasunchis, chhaynapitaq Diospa munayninman hina imatapas ruwaspa payman astawan k’askakusunchis (Pro. 2:10, 11).
4 Ancha allinpunin aguantayqa: Sichus apóstol Pablo hina mana pisipaspa predicashallasun chayqa, Jehová Diospa sonqontan kusichisunchis, chaymantapas aguantayqa manan ñoqallanchispaqchu allin kanqa, hukkunapaqwanmi (Pro. 27:11). Chay hinaqa tukuy sonqowan predicashallasun, chhaynapin rikuchisun iñiyninchis allin takyasqa kasqanta, probasqa qorimantapas aswan chaniyoq kasqantawan (1 Ped. 1:6, 7).