Allinta preparakusun Jesuspa wañusqanta yuyarinapaq
¡Maytapunin munashanchis Umalliqninchis Jesuspa wañusqanta yuyariytaqa! Chaypaqmi ichaqa allinta imatapas preparana (Luc. 22:19). ¿Imakunatan ruwana chay p’unchay manaraq chayamushaqtin?
◼ Maypichus ima horastachus aparikunan: Llapa iñiqmasinchiskunan allinta yachananku maypichus ima horastachus Jesuspa wañusqanta yuyariy aparikunanta. Chay huñunakuymanqa tempranon chayana, lloqsimpuspapas mana tanqanakuspallan lloqsimpuna. Qhepanchista huk congregación huñukuqtinqa astawanmi chayta yuyarina. Chaymantapas manan huñukushanachu punkukunapi, veredakunapi, carrokunaq sayananpipas.
◼ Invitanapaq hojakuna: Llapa predicaqkunan chaskinanku invitanapaq hojakunata, chaymantataq chayta allinta leespa ensayananku imaynatachus munachinqaku chayta. ¿Yachankiñachu pikunaman rakinaykita? Llapa chaskisqayki hojakunatan rakinayki.
◼ Necesitaqkunatan yanapana: Yaqapaschá wakin invitasqanchis runakuna otaq wakin cristianomasinchiskunapas chay huñunakuyman hamunankupaq carropi apanata otaq imapipas yanapanata necesitanqaku. Chhayna kaqtinqa kallpachakunanchismi paykunata yanapanapaq.
◼ T’antamanta vinomantawan: Umalliqkuna, yuyariychis, Intiq haykupusqan qhepatañan t’antatawan vinotawanqa haywakunan, manan ñawpaqtachu. Hanaq pachapaq akllasqakunamanta hukninchus onqosqa kasqanrayku chay huñunakuyman mana hamuyta atiqtinqa, paymanmi vinota t’antatawan apakunan. Chaymantapas chay p’unchaypaq hinan kanan t’antapas vinopas (qhaway 2003 watamanta 15 febrero killamanta La Atalaya nisqa revistapi 14, 15 paginakunapi 14, 17 parrafokunata).
◼ Huñunakuna Wasi: Jesuspa wañusqanta yuyariy Huñunakuna Wasipi aparikunqa chayqa, ñawpaqmantapachan allinta limpiana, chaymantapas liston kashanan platokuna copakuna ima; mesapas mantelpas limpion kanan. Sichus chay huñunakuy huk localpi aparikunqa chayqa, allintan churakunan parlantekunata chhaynapi discursota allinta uyarinankupaq. Ñawpaqmantapachan akllakunan acomodadorkunata hinallataq vinota t’antatawan haywaqkunatapas. Chaymantapas paykunamanqa allintan willana imakuna ruwanankuta, chay p’unchaypaq allin p’achasqa hamunankuta ima.
Ima p’unchaymantapas Jesuspa wañusqanta yuyariy p’unchaymi ancha allinqa, chaymi sapankanchis hinallataq llapa congregacionpas allin preparasqa kashananchis. Jehová Diospas yanapawasunpunichá munasqa Churin Jesucristowan runakunapaq imaymana ruwasqanmanta agradecekuqtinchisqa.