Entiendey atiyllata yachachisun
1. ¿Imatan ruwana allin yachachiq kanapaq?
1 Allin yachachiqkunaqa entiendey atiyllatan yachachinku. Chhaynatan Señorninchis Jesucristopas yachachiran. Sichus pay hina “allin yachachiq” kayta munanchis chayqa, entiendey atiyllatan yachachinanchis (2 Tim. 4:2, NM; Juan 13:13).
2. ¿Imatan ruwananchis entiendey atiyllata yachachinanchispaq? ¿Iman kanqa chayta ruwaqtinchis?
2 Entiendey atiyllata rimasun: Orqo patapi yachachishaspan Jesusqa entiendey rimayllapi yachachiran ancha allin yachachikuykunata (Mat., caps. 5-7). Runakunaqa hanllarayasparaqmi qhepakuqku Jesuspa yachachisqanta uyarispa, chaymi Jesusta hap’imunankupaq riq guardiakunapas niranku: “¡Manan hayk’aqpas chay runa hinaqa pipas rimarqanchu!” nispa (Mat. 7:28, 29; Juan 7:46). Chhaynaqa Diosmanta allinta yachachinapaqqa manan sasa entiendey rimaykunawanchu nitaq sasa rikch’anachiykunawanchu yachachinanchis, aswanmi común runakunaq rimasqan rimaykunallawan yachachinanchis.
3. ¿Imanaqtinmi wakinkuna nishu askhata yachachinku? ¿Imaraykun mana chayta ruwanachu?
3 Ama nishutaqa yachachisunchu: Jesusqa repararanmi may tukuytachus qatikuqninkuna entiendey atisqankuta, chayman hinataqmi yachachiranpas (Juan 16:12). Chhaynallataqmi ñoqanchispas mana nishu askhatachu yachachinanchis familianchiskunaman, Bibliamanta yachay munaqkunaman, wawakunamanpas; aswanmi entiendey atisqallankuta yachachinanchis. Allintaña uyariwashasunman chaypas, manan askhataqa yachachinanchischu. Sichus sonqomantapuni Diosta reqsiyta munanku chayqa, astawanmi yachashallanqaku Jehová Diosmanta (Juan 17:3, NM; 1 Cor. 3:6).
4. ¿Imaraykun importante yachachikuykunallata yachachina?
4 Importante yachachikuykunallatan yachachinanchis: Jesusqa imamantapas yachachishaspaqa necesario kaqllatan yachachiq, chhaynapi yachachikuyninkuna ama sasa entiendey kananpaq. Huk kutinmi rimasharan ‘aya p’ampanakunapi lliw kaqkunaq kawsarimpunankumanta’, chay kutipiqa manan llapantachu willaran chay kawsarimpuqkuna imaynapichus tarikunankumanta (Juan 5:28, 29). Ñoqanchispas estudiota qoshaspaqa importante yachachikuykunallatan astawan yachachinanchis, manataqmi estudiachisqanchis qelqapi mana kaq yachachikuykunamantaqa willananchischu.
5. ¿Iman kanqa entiendey atiyllata yachachiqtinchis?
5 Jehová Diosqa entiendey atiyllatan tukuy necesitasqanchista yachachiwaranchis. ¡Maytapunin chaymanta agradecekunchis! (Mat. 11:25.) Chhaynaqa, ñoqanchispas pay hinan yachachinanchis, chhaynapin ancha kusikuyta tarisun Diosta servinankupaq runakunata yanapaspa.