Allinta yachachinapaq kinsa yanapaykuna
1. ¿Imaraykun kallpachakushanallanchis allin yachachiq kanapaq?
1 Allin willakuykunata willaqkunaqa kusa yachachiqkunan kanku. Predicaspa, revisitata ruwaspa, estudiota qospapas importante yachachikuykunatan willamunchis. Hinaspapas ‘Diospa Simin Qelqamanta’ yachachisqanchisqa ‘yachaytan qon’ runakuna qespikunankupaq (2 Tim. 3:15). ¡May munaymi chay ruwayqa! Anchatan kallpachawanchis allin yachachiq kanapaq. Chaypaqmi kinsa yanapaykunata qhawarisunchis.
2. ¿Imaynatan entiendenankupaq hina yachachisunman?
2 Entiendenankupaq hina yachachiy. Ñoqanchispaqqa manan sasachu sapa kutin yachachisqanchis temakunaqa, uyariqninchiskunapaqmi ichaqa sasa entiendey kanman. Chaymi estudiota qospaqa ama nishutaqa imatapas willanachu. Allinta yachachiyqa manan nishuta rimaychu (Pro. 10:19). Hinaspapas manan llapa textokunatachu maskhanayki aswanpas yachachisqaykita yanapaq textokunallatan. Chaykunata leespataq reparachinayki imaynatas yachasqaykichiswan tupashan chayta. Jesuspas Orqo Patapi allin yachachikuykunatan willarqan (Mat., caps. 5-7). Chaywanpas entiendenankupaq hinan pisillapi rimarqan.
3. ¿Imaraykun rikch’anachiykunawan yachachinanchis? ¿Mayqenkunan aswan allin kanman?
3 Rikch’anachiykunawan yachachiy. Chaykunaqa yuyaymanachinmi, sonqonkumanmi chayan manataqmi qonqanqakuchu. Chhaynata yachachinapaqqa manan allin willaqraqchu kananchis. Jesusqa entiendenankupaq hinan willarqan (Mat. 7:3-5; 18:2-4). Dibujokunawanpas yachachisunmanmi. Preparakuspaqa imaynanmantapas yachachisunmanmi.
4. ¿Imaynatan yanapasunman tapuykunawan?
4 Tapuykunawan yachachiy. Tapuykunaqa estudiantetan yuyaymanachin. Chaymi tapuspaqa pacienciawan suyananchis kutichinankuta. Sichus ñoqanchis kutirqachisun chayqa, manan reparasunchu entiendeshanchus icha manachus chayta. Mana allinta kutichiqtinpas manan usqhayllachu kutichinanchis, aswanpas sumaqllatan huk tapuykunata ruwaspa yanapananchis (Mat. 17:24-27). Llapanchispas pantaq runakunan kanchis chaymi mana allintapunichu yachachisun. Chaymi Biblia kallpachawanchis astawan yachashanallanchispaq, chayqa ancha allinmi kanqa ñoqanchispaqpas uyariwaqninchiskunapaqpas (1 Tim. 4:16).