Qharikunata predicasun

1. ¿Imatan astawan necesitakushan Diospa llaqtanpi?

¹ Allin willakuykunaqa astawanmi mast’arikushan kay tukukuy tiempokunapi, chaymi astawan necesitakushan chay llank’aypi umallinankupaq Dios sonqo qharikunata (Mar. 4:30-32; Hech. 20:28; 1 Tim. 3:1-13). Ichaqa, wakin llaqtakunapiqa pisi qharikunallan Diospa llaqtanman haykumushanku. Wakin llaqtakunapitaq warmikunalla encargakunku wawankuta Diosmanta yachachinankupaq. ¿Imaynatan qharikunata yanapasunman Diosta reqsinankupaq hinallataq Llaqtanman haykunankupaqpas?

2. ¿Iman karan Pablowan Pedrowan qharikunata predicasqankumanta?

² Allintan maskhana: Sichus familiayoq qharikuna Dios serviyta qallarinku chayqa, familiankupas kaqllatataqmi ruwankuman. Chaymi pasaran huk carcelero runata. Paytan apóstol Pablowan Silaswan predicaranku carcelpi kashaqtinku. Chaymi chay carceleroqa familiantin bautizakapuran (Hech. 16:25-34). Kaqllataq Corinto llaqta sinagogapi umalli runa “Crispopas” Pabloq predicasqanta uyarispa “Señor Jesuspi iñirqan, wasinpi lliw kaqkunapiwan” (Hech. 18:8). Kaqllataqmi sucederan Cornelio sutiyoq capitán runatapas, payta predicananpaqmi Jehová Dios apóstol Pedrota kamachiran. Cornelioqa “Dios sonqo” runan karan, chaymi bautizakuran familiankunawan, confianza amigonkunapiwan (Hech. 10:1-48).

3. ¿Mayqen ‘kamachikuqkunatan’ qanpas predicawaq?

³ ‘Kamachikuqkunata’ otaq umalli runakunata predicaypas allinmi kanman (1 Tim. 2:1, 2). Huk kutinmi Felipe huk angelpa nisqanta uyarispa predicaran huk Etiopía runata, chay runaqa Etiopía reinaq tesoreronmi karan. Paymi profeta Isaiaspa qelqasqanta leesharan, chaymi Felipeqa Jesusmanta allin willakuykunata willaran. Hinaqtinmi chay runaqa cristianoman tukupuran. Llaqtanmanpas predicaspachá kutimpuran. Llaqtanpi kashaspapas predicaranpunichá reinata palacionpi kaqkunatapas. Paykunataqa manan facilllataqa pipas predicayta atinmanchu karan (Hech. 8:26-39).

4. ¿Imaynapin allin willakuykunata astawan qharikunaman uyarichisunman?

⁴ Maypichus kasqankumanmi rina: Askha qharikunan ch’isiyaqta llank’anku, chaymi allinpuni kanman tardenkunata, sabadonta, domingonta otaq feriado p’unchaykunapipas predicay. Hinallataq predicasunman maypichus qharikuna llank’anku chaykunapi. Cristiano qharikunapas astawanmi kallpachakunkuman llank’aqmasinkuta predicanankupaq. Wasin wasinta predicaspataq chaypi kaq wiraqochawan rimanankupaq tapukunkuman. Astawanqa chayta ruwankuman chay wasikunata predicakushallan chayqa.

5. ¿Imatan huk hermana ruwanan Diosmanta yachay munaq runata tarispa?

⁵ Sichus huk hermana huk runata predican, paytaq astawan Bibliamanta yachayta munan chayqa, chay hermanaqa manan sapallanchu chay runaman kutinan. Qosanwanmi otaq mayqen iñiqmasinchiswanpas kutinan. Chay runachus munashallanqa Bibliamanta yachayta chayqa, huk allin yachaq hermanon payta visitanman.

6. ¿Imatan ruwasunman “aswan askha runata Cristoman pusana[nchispaq]”?

⁶ Paykunapaq hina predicasun: Apóstol Pabloqa yacharanmi imaynachus predicasqan runakuna kasqanta, chaymi paykunapaq hina predicaran chhaynapi “aswan askha runata Cristoman pusana[n]paq” (1 Cor. 9:19-23). Ñoqanchispas allintan reparananchis imamantachus qharikuna rimay munasqanta, chayman hinataq preparakunanchispas. Wakinqa yaqapaschá rimayta munanku qolqeta imayna ganaymanta, allin gobierno necesitakusqanmanta, familiankuta imayna cuidaymanta, imapaqchus runa kawsasqanmanta, imachus qhepa tiempoman pasananmanta, hinallataq imaraykuchus Dios ñak’ariykuna mana tukuchisqanmantapas. Chayman hinachus predicanapaq preparakusun chayqa, aswan allintan paykunata yanapasun (Pro. 16:23).

7. ¿Imaynatan llapanchis yanapasunman huñunakuyman hamuq mana iñiq qosakunata?

⁷ Mana iñiq qosakunata yanapasun: Wakin mana iñiq qosakunaqa esposankuq allin ejemplonta rikuspan Dios serviyta qallarinku. Ichaqa manan esposakunallachu qosankuta yanapankuman iñinanpaq; huñunakuypi iñiqmasinchiskunapas yanapankumanmi (1 Ped. 3:1-4). Chaytan ruwankuman huñunakuyman hamuq mana iñiq qosakunata sumaqta chaskispa. Chay qosakunaqa yachayta munaspachá hamunku, munankumanpaschá Biblia estudiaytapas.

8. ¿Imaynatan wayqekuna yanapankuman Bibliapi mana interesakuq qosakunata?

⁸ Wakin qosakuna manaña interesakunchu Bibliapi chaypas, qhepamanqa munankumanpaschá estudiayta allinpaq qhawarisqanku hermanowan. Chaymi sucederan huk mana iñiq qosawan. Familianta sapa visitaqtinkun iñiqmasinchiskunaqa paywan rimaqku imamantachus rimay munasqanmanta. Tiempoq pasasqanman hinaqa Bibliamantañataq rimayta qallariranku; kunantaq chay qosaqa bautizasqaña kashan. Kaqllataqmi pasaran huk qosawanpas. Huk kutinmi huk hermano payta yanaparan wasinpaq cerco ruwaypi. Chayta ruwasqanraykun chay qosaqa Biblia estudiayta qallariran (Gál. 6:10; Fili. 2:4). Chhaynaqa, wayqekuna, kallpachakusunyá mana iñiq qosakunata yanapananchispaq.

9. ¿Iman kanman Diospa llaqtanman haykumuq qharikunata allinta preparaqtinchis?

⁹ Allintan yachachina: Sichus qharikunata yanapasun Diospa llaqtanman haykunankupaq, allintataq preparasun chaypi yanapanankupaq chayqa, Jehová Diospa “regalonmi” kapunkuman, arí, Diospa llaqtanpi umalliqkunan kankuman. Chhaynapin iñiqmasikunata yanapankuman tukuy ima ruway atisqankuwan (Efe. 4:8, NM; Sal. 68:18, NM). Paykunan Diospa ovejankunata tukuy sonqowan michinkuman (1 Ped. 5:2, 3). ¡May allinmi chayqa kanman llapa iñiqmasinchiskunapaq!

10. ¿Imaraykun ancha allinpuni karan Ananiaspa Pablota yanapasqan?

¹⁰ Yachasunchis Saulomanta. Paymi akllasqa karan mana judío runakunata predicananpaq. Manaraq cristianoman tukushaspan ichaqa cristianokunata qatiykachaq (Rom. 11:13). Chaymi Ananiasqa mana munaranchu payman predicayta Jesús kamachiqtin. Chaymantan ichaqa kasukuran, chaymi Saulota predicaran, paytaq Cristoq qatikuqninman tukupuran, qhepamantaq “Pablo” sutiwan reqsisqa karan. Pabloqa askha runakunatan yanaparan predicaspa. Kunankamapas paypa qelqasqan cartakunaqa lliwtan yanapawashanchis, chay cartakunan Diospa Simin Qelqapi tarikun (Hech. 9:3-19; 2 Tim. 3:16, 17).

11. ¿Imaraykun tukuy atisqanchista ruwananchis qharikunata predicananchispaq?

¹¹ Chay hinaqa, tukuy atisqanchista ruwasun qharikunata predicananchispaq, chhaynapin chay llank’ayta allinta hunt’asun. Jehová Diospa bendicionninwanqa atillasunmi chayta. Payqa yachanmi munaynin ruway munasqanchista, paypa kaqninkunata allinta cuiday munasqanchistawan.