¿Imaynatan yanapasunman mana iñiq qosakunata?
1. ¿Cristianakunallachu munanku qosanku iñiq kapunanta? ¿Imarayku chayta ninchis?
1 ¿Hayk’a cristianakunaq qosankun huñunakusqanchis iñiq t’aqapi mana Testigochu kanku?a Chay cristianakunaqa maytachá munankuman qosanku Testigo kapunanta paykunawan kuska Diosta yupaychanankupaq. Ichaqa Jehová Dios hinan llapallanchis munanchis “llapan runakuna qespichisqa kanankuta, cheqaq-kayta reqsinankutapas” (1 Tim. 2:4). ¿Imatan ruwasunman iñiqmasinchispa mana iñiq qosanta yanapanapaq?
2. ¿Imaynatan tratananchis mana iñiq qosakunata?
2 Ñawpaqtaqa imakunapi yuyaykusqankutan reparananchis. Huk religionniyoqña kanku chaypas, askha qosakunan familiankuta munakunku kallpachakunkutaqmi allin tayta kanankupaq. Yaqapaschá mana allintachu Testigokunata reqsiwanchis otaq amigonkumanta mana allin willakuykunata uyarispa mana allinta qhawariwasunman. Wakinqa mana allinpaqmi qhawarinku esposakuna familiankuwan kanankumantaqa “religionninkupi” unay tiempo kasqankuta. Chaykunan paykunata hark’ashanman iñipunankumanta, chaymi ñoqanchisqa munakuywan respetowan tratananchis, chhaynapin mana manchakusunchu paykunawan rimayta (Pro. 16:20-23).
3. ¿Imata ruwaspan mana iñiq qosakunata yanapasunman?
3 Paykunapi interesakunanchis. Mana iñiq qosakunataqa allinkuna ruwasqanchiswanmi mayninpi yanapasunman manan Bibliamanta rimapayaspachu (1 Ped. 3:1, 2). Imamantapas astawanqa paykunapi tukuy sonqomanta interesakusqanchistan rikuchinanchis. Warmikunan cristianokunaq esposankuman asuykunkuman, qharikunataq cristianakunaq qosankuman. ¿Imaynatan chayta ruwankuman?
4. ¿Imaynatan rikuchisunman mana iñiq qosakunapi interesakusqanchista?
4 Iñiqmasinchispa qosanta mana reqsispaqa, ñawpaqtan payman willananchis qosanta yanapay munasqanchismanta. Yaqapaschá qallariypiqa qosanta rimaykuqtiyki mana reparaqpas tukusunkichu, ichaqa manan chaywanqa pisikallpayanaykichu. Sumaqta tratasqanchista, paypi interesakusqanchista reparaspaqa yaqapaschá pisi-pisimanta Testigokunata allinta qhawariwasun (Rom. 12:20). Iñiyninpi poqosqa wakin iñiqmasinchiskunaqa familiantintan wasinkuman cenayman invitanku. Chaypin mana iñiq qosawan allinta reqsinakunku hinan Testigokunamanta mana allin yuyaykusqankunapas chinkapun. Chaypiqa mana iñiq qosaman imakunachus interesasqanmantan rimanku, qhepakunatañan allinta reqsinakuspa Bibliamantaqa rimankuman. Hinaspapas huk cristianokunawan reqsinakuspaqa, yaqapaschá mayqen huñunakuyninchismanpas kikillanmanta riyta munanman, chaypiñan yachanman esposan imakuna yachasqanmanta. Sichus manaraq Bibliamanta yachayta munanchu chayqa, khaynatan kallpachasunman: “Allintan esposaykita yanapashanki” nispa.
5. ¿Imatan umallikuna ruwankuman mana iñiq qosakunata yanapanankupaq?
5 Umalliqkunan astawanqa kallpachakunanku mana iñiq qosakunaman asuykunankupaq, qhawarinankutaqmi imapas tumpalla predicanankupaq. Yaqapaschá huk cristianaq qosan mana hayk’aqpas Bibliamanta uyarikuyta munarqanchu, ichaqa hospitalpi tarikuspa otaq sinchi onqosqa kaspaqa uyarikunmanmi Diospa Gobiernonmanta allin willakuykunata. Sichus cristianaq familian sinchi llakipi tarikunman chayqa umallikunan makilla kallpachananku. Yaqapaschá pipas familianmanta wañupunman, chay sucedeqtinqa umallikunan mana iñiq qosatawan invitaspa Bibliawan familiantinta sonqochankuman.
6. ¿Imaraykun mana iñiq qosakunata yanapananchis?
6 ¡Imaynataraqchá iñiqmasinchiskuna kusikunkuman qosanku iñiqmasinchisman tukupuqtinqa! Ichaqa manan paykunallachu kusikunkuman, Jehová Diosmi astawanqa kusikunman hinallataq angelkunapas llapa iñiqmasikunapas (Luc. 15:7, 10). Manaña iñiqmasinchischu kapunman chaypas, kusikusunmanraqmi kallpachakusqanchista Jehová Dios allinpaq qhawarisqanta yachaspa, payqa ‘manan pitapas chinkananta munanchu, huchata saqespa payman llapa kutirikunankutan munan’ (2 Ped. 3:9).
[Uranpi willakuy]
a Mana iñiq qosakunamanta rimasun chaypas, kaypi willakusqanqa qosakunapaq esposakunapaqwanmi kashan.
[6 paginapi willakuy]
Mana iñiq qosakunataqa allinkuna ruwasqanchiswanmi mayninpi yanapasunman manan Bibliamanta rimapayaspachu