¿Allin ñawiyoqchu kanki?
1. ¿Imataq allin ñawiyoq kayri?
1 Runakunaqa ñawinkuq rikusqanman hinan imatapas ruwanku, chaymi Jesusqa nirqan: “Ñawiyki allin kaqtinqa lliw cuerpoykipas k’anchayniyoq kanqa”, nispa (Mat. 6:22). Allin ñawiyoq runaqa Diospa munaynintan ñawpaqman churan, manataqmi kay pachapi runakunaq ruwayninpi afanakuspachu Diospaq llank’ayninta pisiyachin.
2. ¿Imakunan waqllichiwasunman? ¿Iman yanapawasun chaykunaman mana urmanapaq?
2 ¿Allin ñawiyoqchu kani? Kay pachapi imaymana propagandakunata rikuspa, otaq hukkuna imaymanayoq kasqanta qhawarispan ñoqanchispas chaykunata maskhasunman. Chayraykun allin yuyayniyoq runaqa imata ruwananpaqpas otaq rantinanpaqpas ñawpaqtaraq allinta tanteakun, hinaspa tapukun: “¿Chaykuna yanapawanqachu icha manachu Dios serviyniypi?” nispa (Luc. 14:28; Fili. 1:9-11). Hinaspapas sapa kutillanmi qhawarikunanchis imakunatan kawsayninchispi pisiyachinanchis kanqa predicayninchista astawan yapananchispaq (2 Cor. 13:5; Efe. 5:10).
3. ¿Imatan iñiqmasinchis ruwarqan necesitasqallanwan kawsananpaq, imatan chaymanta yachanchis?
3 Huk iñiqmasinchismi precursora karqan, payqa kuskan p’unchayllata llank’aspapas aypachikunmanmi karqan, ichaqa ch’isiyaq llank’aytan decidirqan. Paymi qhepaman nirqan: “Yanqapaqmi imaymanayoq kanaypaq afanakusharqani kallpaytapas usuchisharqani. Manan pipas iskay patrontaqa serviyta atinmanchu. Chaymi tukuy munasqayta qhepaman churaspa decidirqani imachus necesitasqallaywan kawsanaypaq”, nispa. Chayta reparakusqanmi yanaparqan huk llank’ayta maskhananpaq, chaymi kunanqa llank’ashallan precursora hina.
4. ¿Imanaqtinmi kay tiempopi astawan allin ñawiyoq kananchis?
4 P’uchukay tiempopi tarikusqanchisraykun astawanqa allin ñawiyoq kananchis. P’unchaykunaq pasasqanman hinan p’uchukay p’unchayman qayllaykushanchisña, ichaqa ñan mosoq pachapas chayamushanña (1 Cor. 7:29, 31). Sichus allin ñawiyoq kasun chayqa predicayninchistan ñawpaqman churasun, chhaynapin qespichisqa kasun hinallataq uyariqninchiskunapas (1 Tim. 4:16).