¿Tukuy atisqaytachu ruwashani?
1. ¿Iman huk cristianota llakichinman?
1 ¿Hayk’aqllapas nirqankichu: “Maytan munayman Diospaq astawan llank’ayta”, nispa? Yaqapaschá yuyaqña kapusqaykirayku, onqosqaykirayku, familiaykita uywanaykirayku mana munasqaykita hinachu predicashanki, chaywantaq llakikushanki. Kinsa wawayoq cristianan nin: “Familiayta atiendesqayraykun sayk’usqa tarikuni, manan tiempoypas aypawanchu predicacionman rinaypaq, chaymi mayninqa ñoqa kikiypaq phiñakuni”, nispa. Chhaynapi tarikuspaqa reparananchismi maykamalla imatapas ruway atisqanchista. ¿Imaynatan chayta ruwasunman?
2. ¿Imatan Jehová Dios munan ñoqanchismanta?
2 ¿Imatan Jehová Dios munan? Llapallanchismi astawan Jehová Diospaq llank’ayta munanchis. Ichaqa manan lliw ruway munasqanchistachu ruwayta atisunman. Chaywanpas Diospaq astawan llank’ay munasqanchismi rikuchin llank’aq runa kasqanchista. Jehová Diosqa yachanmi maykama ruway atisqanchista, manataqmi mana ruway atisqanchistachu kamachiwanchis (Sal. 103:13, 14). Chhaynaqa, ¿imatan Jehová Dios munan? Tukuy sonqowan servinanchistan otaq atisqanchisman hina allinkaqta qonanchista (Col. 3:23).
3. ¿Imaynapin yachasunman tukuy atisqanchistachus ruwashanchis icha manachus chayta?
3 ¿Imaynapin yachasunman tukuy atisqanchistachus ruwashanchis icha manachus chayta? Jehová Diosmantan mañakunanchis imayna ruwashasqanchista allinta reparachiwananchispaq (Sal. 26:2). Hinaspapas iñiyninpi allin takyasqa amigonchiswanmi yanapachikusunman, paymi mana manchakuspa niwasunman imapi allinyananchis kasqanta (Pro. 27:9). Tiempoq pasasqanman hinan imapas cambian, chaymi mayninpiqa qhawarikunanchis kanqa imaynapi tarikusqanchista (Efe. 5:10).
4. ¿Imaynatan qhawarina predicanapaq yuyarichiykunata?
4 ¿Imaynatan qhawarinanchis yuyarichiykunata? ¿Rikurqankichu hayk’aqllapas carrerapi phawaqkunata rikuspa runakuna qaparisqankuta silvasqankutapas? Chaytaqa ruwanku phawaqta kallpachanankupaqmi manan pisikallpayachinankupaqchu. Chay hinatan ‘Diospa siminta [...] willashanallanchispaq’ huñunakuykunapi qelqanchiskunapi yuyarichiykunapas kallpachawananchispaq ruwakun (2 Tim. 4:2). Sichus Jehová Diosta servinapaq kallpachakushallasun chayqa, manan pay qonqanqachu ‘ruwasqanchista [...] munakusqanchistapas’ (Heb. 6:10).