Uyariqninchiskunata yanapasun yuyaymananankupaq
1. ¿Iman yanapawasun runakunawan parlarinapaq?
1 ¿Iman yanapawasun runakunawan parlarinapaq? Imatapas pantasqata niwaqtinchisqa manan ninanchischu: “Chay nisqaykiqa manan allinchu”, nispaqa. Aswanmi yuyaymanachinanchis. Pablopas chaytan ruwarqan Tesalónica llaqtamanta judiokunata predicaspa. Chaymi ‘wakin judío runakunaqa iñipurqanku’ (Hech. 17:2-4). Ichaqa, ¿imaynatan chayta ruwasunman?
2. ¿Imaynatan Apóstol Pablo hina predicasunman?
2 Imachus reqsisqankumanta rimapayasun. Predicasqanchis runakunata yuyaymanachinapaqqa allintan reparananchis imachus yuyaykusqankuta. Huk kutinmi Pablo Diospi mana iñiq griego runakunata huñunakusqankupi rimapayarqan imachus creesqankumanta (Hech. 17:22-31). Ñoqanchispas predicananchispaq preparakuspaqa allintan yuyaykunanchis imapis runakuna creen, imakunatas cheqnikunku chaykunata (1 Cor. 9:19-22). Sichus uyariqninchis mana munanchu uyariyta chayqa, imachus yachay munasqanmantan rimasunman.
3. ¿Imaynatan yanapawanchis allin tapuykuna yuyaymanachinapaq?
3 Allin tapuykunata ruwasun. Sichus pitapas maymanpas chayananpaq telefonopi waqyaspa yanapayta munanchis, ichaqa mana yachanchischu maynintas rishan chayta, ¿atisunchu yanapayta? Manan. Chay hinallataqmi uyariqninchiskunawanpas. Sichus mana yachanchischu imachus yuyaykusqankuta chayqa, manan atisunchu paykunawan parlariyta. Jesusqa pitapas yuyaymanachiyta munaspaqa, ñawpaqtan yuyaykusqanta yachananpaq tapuq. Huk kutinmi huk runa khaynata tapurqan: ‘¿Imatan ruwanay wiñay kawsayniyoq kanaypaq?’ nispa, manaraq kutichishaspan Jesusqa tapurqanraq (Luc. 10:25-28). Pedroq pantasqa yuyaykusqanta reparachinanpaqpas chay hinatan ruwarqan (Mat. 17:24-26). Chhaynaqa uyariqninchiskuna imapipas iskayashanku otaq pantashanku chayqa, tapuykunawanmi yuyaymanachinanchis.
4. ¿Imaraykun uyariqninchiskunata yuyaymanachinanchis?
4 Pitapas yuyaymanachispaqa Allin Yachachiq Cristotan qatikushanchis, ñawpa tiempopi allin yachachiq runakunatawan. Hinaspapas uyariqninchiskunata respetowan qhawarisqanchistan rikuchinchis (1 Ped. 3:15). Chhaynapin wakmanta visitananchista munanqaku.