Runakunata yanapasun Diosta uyarinankupaq
1. ¿Ima folletokunan lloqsimurqan Hatun Huñunakuypi, imaraykun allinpuni?
1 “Gobiernoyki hamuchun” nisqa Hatun Huñunakuypin iskay folletokuna lloqsimurqan: Diosta uyarispaqa wiñaypaqmi kawsanki hinallataq pisi letrayoq Diosta uyariy folleto. Chay folletokunaqa pisi letrallayoqtaq kashan chayqa, ratullan huk simikunaman t’ikrakun. Chay huñunakuypi chaskiqtinchisqa ñan aprobakamurqanña Diosta uyarispaqa wiñaypaqmi kawsanki nisqa folleto 431 simikunaman t’ikrakunanpaq.
2. ¿Pikunaq allinninpaqmi chay folletokuna?
2 ¿Pikunaq allinninpaqmi chay folletokuna kanqa? Qhawarisun imaynapi tarikuspa chaykunata utilizanapaq:
• Huk iñiqmasi predicaspa otaq hukmanta kutispa reparan chay runa mana leey yachasqanta otaq sasawan leesqanta.
• Huk iñiqmasi predican huk simita rimaq runakunaman, chay simipiqa manan qelqakuna kanchu, kaspataq pisilla kashan. Kallanmantaqmi huk cheqaspi runakuna rimasqanku simipi mana leeyta yachaqkuna.
• Huk iñiqmasi predican makiwan rimaq runakunata.
• Huk tayta manaraq leeyta yachaq wawanman Bibliamanta yachachiyta munan.
3. ¿Imayna ruwasqan kashan Diosta uyariy folleto?
3 ¿Imaynan chay folletokuna? Diosta uyariy folletoqa pisi letrayoqmi kashan. Sapanka página tukuypin kashan pisi simikunalla huk textopiwan, chaykunan willashan imamanta chay leccionpi rimasqanta. ¿Imaraykun pisi letrallayoq? Sichus pipas mana reqsisqayki simipi askha letrayoq folletota qosunkiman chayqa, ¿allintachu yanapasunkiman sumaq dibujokunayoqña kanman chaypas? Manachá. Chay hinallataqmi askha letrayoq qelqakunapas mana leeyta yachaqkunataqa mana yanapanmanchu. Chaymi kay folletopiqa dibujokuna astawanqa rikhurin, chaytan allinta yuyaykuspa ruwakamurqan. Chaypi yachachisqanta entiendenapaqmi huch’uy flechakuna kashan, chaykunan huk dibujomanta huk dibujoman señalan.
4. ¿Imayna ruwasqan kashan Diosta uyarispaqa wiñaypaqmi kawsanki folleto?
4 Diosta uyarispaqa wiñaypaqmi kawsanki, hinallataq Diosta uyariy folletopiqa kaqllan dibujokuna rikhurin. Chayqa ruwakamurqan sasachakuspa leeq runakunata yanapanapaqmi, otaq leeyta yachashaqkunapaq. Sichus Diosta uyariy folletowan yachachishanki chayqa, Diosta uyarispaqa wiñaypaqmi kawsanki folletowanmi yanapachikuwaq. Sapanka leccionmi iskay paginapi kashan, huk tapuywanmi qallarin chay tapuypa kutichiynintaq chay paginakunapi kashan. Dibujokunaq ladonpin huk willakuy rikhurishan Bibliamanta textokunapiwan. Askha paginaq tukuyninpin astawan willaq textokunayoq recuadrokuna kashan, chaytan estudiantewan t’aqwiriwaq entiendesqanman hina.
5. ¿Hayk’aqmi, imaynatan folletokunata munachisunman?
5 ¿Imaynatan utilizasunman? Atikusqanman hinan wasin-wasinta predicaspa mayqen folletotapas munachisunman, manaña chay killapi munachishasunmanchu chaypas (qhawariy “¿Imaynatan munachisunman?” nisqa recuadrota). Uyarikuq runaman kutispan, kay hinata qosunman: “Huk folletotan apamushayki”, nispa.
6. ¿Imaynatan chay folletokunawan estudiota qosunman?
6 Diosta uyariy folletopiqa manan tapuykuna kanchu, chaymi mana tapuywan kutichiywanchu estudiana imaynan Imatapunin librowan ruwakun hinata. Lliw llaqtamanta runakunan munanku willakuykuna uyariyta. Chaymi dibujokunata qhawachispa Bibliapi tarikuq willakuykunata willawaq. Paypas rimananpaq hina sumaqta yachachiy. Paginaq uranpi kaq textokunata leey, hinaspa kuska t’aqwiriychis. Rimananpaq hina tapuriy reparaytaq entiendeshanchus icha manachus chayta. Sichus Diosta uyarispaqa wiñaypaqmi kawsanki folletowan yachachishanki chayqa, dibujokunaq ladonpi kaq yachachikuykunata textokunatapas leeychis.
7. ¿Imaynatan estudiantekunata yanapasunman iñiyninkupi ñawparinankupaq?
7 Iñiyninpi ñawparinanpaq yanapay. Bibliamanta estudio qosqanchiswanmi estudianteqa Diosmanta astawan yachayta munaspa kallpachakunqa leeyta yachananpaq (Mat. 5:3; Juan 17:3). Chhaynaqa, Diosta uyariy folletowan estudiota qoshanki chayqa, tiempowanmi yanapawaq leeyta yachananpaq, hinaspa Diosta uyarispaqa wiñaypaqmi kawsanki folletowanñataq yachachiwaq. Mayqen folletotaña estudiaspa tukurqankichis chaypas, estudianteqa manaraqmi bautizakunanpaq hinachu kashan. Chaypaqqa, Imatapunin librotan estudianan otaq huk qelqatapas Bibliata allinta entiendenanpaq.
8. ¿Imaraykun agradecekunanchis mosoq folletokunamanta?
8 Sichus runakuna wiñaypaq kawsayta munanku chayqa, Ancha Hatun Kamachikuq Diostan uyarinanku (Isa. 55:3). Diosqa munanmi “llapan runakuna” mana leey yachaq runakunapas payta uyarinankuta (1 Tim. 2:3, 4). Anchatan agradecekunchis chay folletokuna chaskisqanchismanta, ¡chaywanmi runakunata yanapanchis Diosta uyarinankupaq!
[3 paginapi recuadro]
¿Imaynatan munachisunman?
Iskay kinsa paginata qhawachispa tapuy: “¿Munawaqchu khaynapi tiyakuyta? [Uyariy kutichisqanta.] Bibliaq nisqan hina, Diosmi prometen pisi tiempollamanta kay pachata huk sumaq paraisoman tukuchinanta, chaypiqa chinkapunqan wakcha kay onqoykunapas. ¿Imatan ruwasunman chhayna kawsayta chaskinapaq? [3 paginapi Isaías 55:3 textota sut’inchaq willakuyta leey.] Kaypin nishan Diosta uyarinanchis kasqanta. Ichaqa, ¿imaynatan uyarisunman?”. 4, 5 paginakunata maskhaspa tapuyta t’aqwiriychis. Tiempon mana kaqtinqa folletota saqey, hinaspa huk p’unchay kutinaykipaq rimanakuychis.