¡Diosmanta hamuq allin willakuykuna!

Chay mosoq folletowan revisitakunata ruwasun estudiokunatapas qallarisun

1. ¿Ima folletotan chaskirqanchis revisitata estudiota ruwanapaq hatun huñunakuypi?

¹ Ancha kusikuywanmi “Sonqonchista allinta waqaychasun” nisqa hatun huñunakuypi huk mosoq folletota chaskirqanchis revisitakunata estudiokunata qallarinapaq. ¡Diosmanta hamuq allin willakuykuna! folletoqa ¿Imatan Dios munan ñoqanchismanta? folletoq rantinpi lloqsimurqan kaq pisi yachachikuykunawan entiendenapaq hinataqmi, chay folletowanmi chayllaraq predicasqanchis runawan estudiota qallarisunman. ¿Imatan Dios munan ñoqanchismanta? folletoqa cristianokuna imayna kawsanankumanta Diospa kamachikuykunamanta iman astawan willarqan, chaymi wakin runakunapaqqa sasa entiendey karqan. Kay mosoq folleton ichaqa Bibliamanta allin willakuykunamanta astawan willashan (Hech. 15:35).

2. ¿Imaraykun ¡Diosmanta hamuq allin willakuykuna! folletota ruwamurqanku?

² ¿Imaraykun chay folleto ruwakamurqan? Pachantinpi iñiqmasinchiskunan munasharqanku entiendenapaq hina qelqakuna lloqsimunanta, chhaynapin astawan runakuna yachayta munanqaku Bibliamanta Imatapunin libroq yanapayninwan. Yaqa llapa runakuna sasachakunku huk librowan estudiayta, pisillapi willaq qelqawanmi ichaqa estudiayta munanku. Chaymantapas folletokunaqa askha rimaykunapin t’ikrakuyta atikun.

3. ¿Imaraykun hukniray chay folleto huk qelqakunamanta?

³ ¿Imayna ruwasqan kashan? Llapa qelqanchiskunaqa leenapaq entiendenapaq hinan ruwasqa kashan, chaymi runakuna kikillankumanta leespa entiendenku. Kay folleton ichaqa huk yachachiqpa yanapayninwan ruwakunan. Chaymi chay folletota munachispa huk otaq iskay parrafota t’aqwirispa ruwakunan. Chay folletoqa pisillapin willan, chaymi wasi punkunkupi otaq llank’anankupi t’aqwirisunman. Mayqen yachachikuymantapas t’aqwiriwaqmi, ichaqa aswan allinqa kanman qallariymantapacha t’aqwiriy.

4. ¿Imaynapin chay folleto yanapawanchis estudiantekunata Bibliawanpuni yachachinapaq?

⁴ Llapa qelqanchiskunapin tapuypa kutichiynin kikin parrafopi tarikun. Kay folletopin ichaqa tapuypa kutichiyninqa Bibliapi tarikun, ¿imarayku? Askha runakunan Bibliamantapuni yachayta munanku mana qelqanchispi kaqmantachu, chaymi textokunaqa mana copiasqachu. Chayraykun Bibliamantapuni leena kanqa. Chhaynapin estudiantekuna yachanqaku Diospa yachachikuyninkuna kasqanta (Is. 54:13).

5. ¿Imaraykun yachachiqkuna allinta preparakunanku estudiota qonankupaq?

⁵ Chay folletopiqa manan llapa textokunamantachu sut’inchashan. Aswanpas estudiantekunatan kallpachan tapukunankupaq, iñiqmasikunataq tukuy atisqankuta ruwananku yachachinankupaq. Chaymi sapanka yachachikuypaq allinta preparakunanku, ichaqa manan nishutaqa rimanankuchu. Anchataña gustawanchis Bibliamanta textokunata sut’inchay chaypas, estudiantekunan imachus entiendesqankuta willananku. Allin yuyaywan sumaqta tapurispan iman allinkaqta reparanankupaq yanapasunman (Hech. 17:2).

6. ¿Imaynatan chay folletota utilizasunman a) Diospi, Bibliapi mana iñiq runakunata predicaspa? b) wasin-wasinta predicaspa? c) kaqpacha estudiota qallarispa? d) revisitakunata ruwaspapas?

⁶ Chay folletotaqa huk qelqakunata hinan munachisunman manaña chay killapi munachikunmanchu chaypas. Wakin iñiqmasinchiskunaqa wasin-wasinta rispan chay folletokunawan estudiota qallarinkupacha. Hatun huñunakuypi nisqanman hina “anchata kusikunku chay folletowan revisitata ruwaspa” (qhawariy 5-7 paginakunapi kaq recuadrota).

7. ¿Imaynatan chay folletowan estudiota qallarisunman?

⁷ ¿Imaynatan chay folletowan estudiota qosunman? Yanachapi tapukuykunata leespan qallarisunman. Chay qhepamantaq k’iranpasqa textokunata maskhasunman, chaymantataq tapuykuspa sumaqta runakunata entiendechisunman. Manaraq qatiq parrafoman pasashaspataq hukmanta yana letrapi kaq tapuyta ruwasunman entiendenchus icha manachus chayta yachanapaq. Chayllaraq visitashaspaqa huk otaq iskay tapuykunallatan t’aqwirisunman. Chay qhepamanña pisi-pisimanta hunt’asqata t’aqwirisunman.

8. ¿Imatan yuyarinanchis Bibliamanta textota leespa, imarayku?

⁸ Bibliamanta textokuna “leey” nisqaqa yanapi kaq tapuykunatan sut’ita kutichin. Bibliamanta huk textota leespaqa manan ninanchischu: “Apóstol Pablo qelqarqan” otaq “qhawarisun Jeremiaspa profetizasqanta”, nispaqa; manachayqa runakunallapas chay yachachikuyta rikhurichinkuman hinatan entiendechisunman. Aswanpas nisunmanmi: “Diospa Simin Qelqa nin” otaq “qhawarisun Bibliaq nisqanta”, nispa.

9. ¿Llapa textokunatachu leenanchis?

⁹ ¿Llapa textokunatachu leenanchis icha “leey” nisqallatachu? Chaytaqa ruwana imayna tarikusqanman hina. Parrafopi rikhurisqan textokunaqa manan chay yachachikuyllata endiendechinallapaqchu, aswanpas allin willakuykunatan sut’inchan. Sichus estudiantekunaq mana tiempon kanchu otaq chay temamanta mana yachayta munanchu otaq mana leeyta atinchu chayqa “leey” nisqa textokunallata maskhay.

10. ¿Hayk’aqmi Imatapunin librowan estudiasunman?

¹⁰ ¿Hayk’aqmi Imatapunin librowan estudiananchis? Sichus sapa kutilla predicasqanchis runaman chay folletowan estudiota qoshanchis chayqa, Imatapunin librowan estudiayta qallarisunman otaq chay folletota estudiasunman tukunanchiskama. Ichaqa sapanka iñiqmasimanta kanqa hayk’aq qallarinanmanta. Librowan estudianapaq, ¿ñawpaq capitulomantachu qallarina? Imayna tarikusqanman hina mayqen capitulomantapas qallarisunman. Ichaqa may allinmi kanman estudiantekunapaq Imatapunin librowan wakin yachachikuymanta hukmanta t’aqwiriy.

11. ¿Imaraykun chay mosoq folletowan predicananchis?

¹¹ Kay pachapiqa imaymana millay willakuykunallatan uyarinchis, chaymi tukuy sonqowan Diospa Gobiernonmanta kay pacha kamachimunanmantapas allin willakuykunata willananchis (Mat. 24:14; 2 Ped. 3:13). Pikunachus chay willakuyta uyarinqaku chayqa kay textoq nisqantan ninqaku: “Ima munaymi orqo patankunata allin willakuykunata willaq hamushaqta rikuyqa, payqa allin willakuykunatan apamushan, payqa thak-kaypi kawsanankutan willakushan, payqa Diospa qespichiyninmantan willakushan, hinaspan Sión llaqtata nin: ¡Diosniykin kamachikushan!” nispa (Is. 52:7). Chayraykun tukuy atisqanchista ruwananchis Diosta maskhaqkunaman chay mosoq folletowan allin willakuykunata willanapaq.

[5 paginapi recuadro]

¿Imaynatan chay folletowan Diospi, Bibliapi mana iñiq runakunata predicasunman?

● Askha cheqaskunapin Diosmanta Bibliamanta mana uyariyta munankuchu. Chaymi imachus runakunata llakichin chaymanta rimasunman, yaqapaschá imaynatan allin kamachikuqta tarikunman, familiapaq sumaq yanapaykunamanta otaq ima suyakuytaq kan hamuq tiempopi chaytapas. Unayña chay runawan rimaspa qhawarichirqanchis Jehová Dios kasqanta Simin Qelqapas confianapaq hina kasqantapas chayqa, ¡Diosmanta hamuq allin willakuykuna! folletota munachisunman.

[6 paginapi recuadro]

Wasin-wasinta predicaspa

● “Askha runakunan tapukunku: ‘¿Imatan Dios munan runakunapaq?’ nispa. Chayta yachanapaqqa kaypi yuyaykuy, ¿cheqaqpaqchu Jehová Dios ñak’ariyta tukuchinqa? [Uyariy kutichisqanta.] Kay folletopin Bibliaykiwan kuska tapukuyniykita kutichinqa [chay folletota qosqayki qhepaman ñawpa yachachikuypa parrafonta leey, chaymantataq Jeremías 29:11 textota]. Kaypi nisqan hina Diosqa munanmi hamuq tiempopi sumaqta kawsananchista, ¿ima ninki chaymanta? [Uyariy kutichisqanta.] Munanki chayqa kay folletowan qhepakuy hukpi kutimuspa qatiqnin parrafotañataq t’aqwirisun imaynatas Dios ñak’ariyta tukuchinqa chayta” (sichus predicasqayki runaq tiempon kashanraq chayqa iskay parrafota textokunatapas t’aqwiriwaqchis. Qatiqnin parrafota t’aqwirinaykichispaq qhepaychis).

● “Askha kutitan Diosmanta mañakunchis astawanqa sasachakuypi tarikuqtinchis, ¿riki? [Uyariy kutichisqanta.] ¿Llapa mañakusqatachu Dios uyarin? [Uyariy kutichisqanta.] Kay folletopin willashan maypis chay tapukuypa kutichiyninta tarisunman chayta [qosqayki qhepamantaq 12 yachachikuypa ñawpa parrafonta t’aqwiriy, chaymantataq “leey” nisqa textokunata]. Maytan kusikunchis Diosman asuykunapaq invitawasqanchismanta, chaypaqmi ichaqa allinta reqsinanchis [2 yachachikuyta maskhaspa yanapi kaq tapuykunata qhawarichiy]. Munaqtiykiqa kay folletota saqeykiman hukpi kutimuspa Bibliawan kuska chay tapukuypa kutichiyninta t’aqwirinapaq”.

● “Hamuq tiempo imayna kananmanta runakuna llakisqa kashanku chaymi visitamushayku. ¿Hayk’aqllapas sasachakuykuna tukukunmanchu? [Uyariy kutichisqanta.] ¿Yacharqankichu Bibliapi ancha sumaq willakuykuna kasqanta? Qhawarisunchis ima ninmi Biblia chaymanta”. Folletota qosqayki qhepaman paginaq tukuyninpi qhawachispa tapuy mayqen temamanta yachay munasqanta. Akllasqan qhepamantaq qhawarichiy imaynatas chay folletowan estudiakunman chayta. Chaymantataq qatimuq temata hukpi t’aqwirinaykichispaq qhepaychis.

[7 paginapi recuadro]

Kaqpacha estudiota qallarinapaq

● “Runakunamanmi visitashayku Bibliamanta estudiota qallarinaykupaq. Kay folletopin 15 yachachikuykuna kashan, chaypin willawanchis imaynatas kay tapuypa kutichiyninta Bibliapi tarisunman chayta [folletota qhawachiy paginaq tukuynintawan]. ¿Hayk’aqllapas Bibliaykita entiendenaykipaq kallpachakurqankichu? [Uyariy kutichisqanta.] Kay folletoqa entiendenapaq hinallan kashan, ¿qhawarisunmanchu? [3 yachachikuyta maskhaspa 3 tapuypa parrafonta t’aqwiriychis. Chay qhepamantaq Apocalipsis 21:4, 5 textota leey. Atikuqtintaq qatiqnin parrafota textokunatawan t’aqwiriychis.] Munaqtiykiqa qhepakuwaqmi kay folletowan. Kallpachaykiku huk yachachikuyllatapas t’aqwirinaykipaq astawan yachayta munaspataq qatiqnintañataq t’aqwiriwaq. Hukpi kutimuspa ñawpaq temata qhawarisunman”.

[7 paginapi recuadro]

Revisitata ruwaspa

● “Anchatan kusikuni hukmanta tupaspay. Kay folletotan apamusharqani askha tapuykunata Bibliawan kutichinapaq [qosqayki qhepamantaq folletoq tukuyninta qhawachiy huk temata akllakunanpaq]. ¿Mayqen temamanta yachayta munawaq? [Uyariy kutichisqanta, akllasqan tematataq qhawariychis.] Qhawarisunchis imaynatas kay folletowan Bibliaq yanapayninwan chay tapuypa kutichiyninta tarisunman chayta”. Huk demostracionta ruwachiy imaynatas huk otaq iskay parrafota leenapaq textokunatawan t’aqwirisqankuta. Chaywanmi iñiqmasikuna rikunqaku Bibliamanta estudio qallariyqa mana sasachu kasqanta. Folletota saqesqayki qhepamantaq willay hukpi kutinaykipaq. Rimasqaykita tukuspataq akllakusqan temata t’aqwiriwaqchis otaq ñawpaq yachachikuyta qhawariwaqchis.