Huk simi rimaqkunata maskhasun

1. ¿Imaraykun iñiq t’aqakunaman territoriokunata asignakun rimasqanku simiman hina?

¹ Pentecostés fiestapin 33 watapi Jesuspa qatikuqninkuna santo espirituta chaskisqanku qhepata “wak rimaykunapi rimayta qallarirqanku” chay fiestaman chayamuq runakunaman (Hech. 2:4). Chayraykun 3.000 runakuna hina bautizakurqanku. Chay runakunaqa rimasqanku simimantapas yaqapaschá yachallarqankutaq hebreo otaq griego simikunata. Chaywanpas Jehová Diosqa munarqanmi allin willakuykunata rimasqanku simipi uyarinankuta. Chayqa sucedenman karqan runakuna rimasqanku simipi aswan allinta uyarikusqankuraykun. Chaymi iñiq t’aqakunaman rimasqanku simiman hina territoriokunata asignakun (qhawariy Organizados librota pág. 107, párrs. 1, 2). Huk grupo iñiqmasikuna huk simi rimaqkunaman predicanku chay simita atiendeq iñiq t’aqaq territorionpi, qayllanpi kaq cheqaskunapipas.

2. a) ¿Imatan ruwana huk simikunata rimaq runakunaq direccionninta yachanapaq, imaraykun allinpuni kanman? b) ¿Imaynatan iñiq t’aqakuna yanapanakunkuman askha simi rimaq territoriopi llank’aqtinku? c) ¿Imatan ruwasunman huk simita rimaq runa astawan yachayta munaqtin?

² Sichus huk simillata rimakusqan cheqaspi predicanchis chayqa, llapa wasikunapin predicasunman. Tiyasqanchis cheqaspi kallanmantaq huk simikunata rimaqkuna chayqa, yaqapaschá huk iñiq t’aqakunapas chaypi predicallankumantaq. Sichus tarisunman huk simi rimaqta chayqa, direccionninta mañakusunman chay simipi predicaq iñiqmasikuna visitanankupaq. Ichaqa yuyarinanchismi: chay simimanta kaq iñiq t’aqa otaq grupon chay runakunataqa maskhananku (qhawariy “Yanapanakusun” nisqa recuadrota). Chhaynaqa, chay iñiq t’aqapi otaq grupopi iñiqmasikunan maskhananku, censananku chay simi rimaqkunata. Kunanmi qhawarisun imaynatas ruwasunman chayta.

3. ¿Imatan qhawarina huk simi rimaqkunata censanapaq? ¿Llapa cheqaspichu kaqllata maskhana?

³ ¿Imaynatan maskhasunman? Hayk’a tiempotachus huk simi rimaqkunata censanapaqqa kaykunatan qhawarina: ¿hayk’a runakunan chay simita rimanku? ¿Hayk’a predicaqkunan iñiq t’aqapi otaq grupopi kashanku? ¿Hayk’a direccionkunatañan huñukun? Chaywanpas manan llapa cheqaspichu kaqllata maskhana, aswanpas iñiq t’aqan qhawarinan may cheqaskunapin chay simi rimaqkuna aswan askha tiyanku chayta; qhawarinallataqmi atisqanchisman hina atiendenapaq. Chayta ruwanapaqqa allintan qhawarinanchis, chhaynapin aswan askha runata yanapasun Jehová Diospa sutinta waqyakunankupaq (Rom. 10:13, 14).

4. a) ¿Imaynatan organizana huk simi rimaqkunata maskhanapaq? b) Willay imakunatas ruwasunman huk simi rimaqkunata maskhanapaq chayta.

⁴ Kallpachakusqanchis mana yanqapaq kananpaqmi umallikuna astawanqa superintendente de servicio chayta imayna aparikunanta qhawarinqa (1 Cor. 9:26). Sichus territorionchispi huk nacionmanta rimayniyoq runakuna kanman chayqa, umallikunan allin iñiyniyoq iñiqmasita ninqaku chay llank’ayta qhawarinanpaq, huk umallita otaq yanapakuq qharita. Askha iñiq t’aqakuna grupokunapas allinta maskhanankupaq chayta qhawarinku, yaqapaschá direccionkuna maskhanapaq qelqapi otaq Internetpi. Chay qhepamanmi telefonopi waqyanku otaq visitanku chay direccionkunata listankupi churanankupaq. Sichus umallikuna allinpaq qhawarinku chayqa, iñiqmasikunatan ninkuman chay maskhaypi grupota yanapanankupaq (qhawariy “¿Imatan ruwasunman huk simi rimaqkunata maskhanapaq?” nisqa recuadrota).

5. a) ¿Imakunatan yachananku censaq lloqsiqkuna? b) ¿Ima nisunmanmi runakunata?

⁵ Censaq rinapaqqa ñawpaqmantan allinta yuyaykunanchis imayna ruwananchista. Chayta ruwanapaqqa predicacionman lloqsinapaq hinan p’achakunanchis, chaywanqa Dios serviyninchistan aparishallanchistaq. Chaymantapas chay simipin imayna rimanata ensayana, chayta ruwaymi iñiqmasikunata yanaparqan kusisqa llank’anankupaq chay simita allinta yachanankupaqpas. Hayk’a tiempo censasqanchistaqa yupananchismi, ichaqa manan yupanachu mapakunata otaq lista ruwasqanchistaqa. Chay simita rimaq runata tarispaqa tukuy atisqanchistan ruwana predicanapaq. Manaña interesakunmanchu chaypas, usqhayllan superintendente de servicio nisqaman willana otaq paypa asignasqan iñiqmasiman, ahinapi territoriomanta listaman churananpaq. Importanteña censay chaypas, allin yuyaywanmi ruwana Dios serviyninchista allinta hunt’ananchispaq (qhawariy “¿Ima nisunmanmi runakunata censaspa?” nisqa recuadrota).

6. ¿Ima sasachakuykunan kanman roqt’ukunata maskhaqtinchis?

⁶ ¿Imaynatan roqt’ukunata maskhasunman? Roqt’u runakunata maskhanapaqqa kallpachakunanchismi. Paykunaq sutinku, p’achanku, rikch’ayninkupas kaqllan huk runakunaqwan chaymi mana reparasunmanchu roqt’u kasqankuta. Chaymantapas, familianku amigonkupas cuidankun, chaymi mayninpiqa mana imatapas willayta munawasunmanchu. Qatimuqpi yuyaychaykunan allinta yanapawasun roqt’ukunata otaq huk simi rimaqkunatapas tarinapaq.

7. a) Roqt’ukunata maskhaspa, ¿imatan tapusunman? b) ¿Iman yanapawasun tapusqanchista sumaqta kutichiwananchispaq?

⁷ Huk iñiq t’aqa otaq makiwan rimaq grupopas mayninpiqa vecinokunatan tapunku tiyasqanku cheqaspi kanchu icha manachu roqt’ukuna chayta. Yaqapaschá llank’anankupi, escuelankupi makiwan rimanku otaq familiankupipas kan roqt’ukuna. Otaq rikurqankupaschá “kaypin kan roqt’u wawakuna” nisqa letrerota. Chaytaqa allin yuyaywanmi tapunanchis mana chayqa mana allinpaqmi qhawariwasunman. Ichaqa sichus sumaqllata, respetowan, allin yuyaywantaq tapunki chayqa sumaqtan kutichisunki. Wakin iñiqmasinchiskunataq Bibliamanta DVD nisqata otaq huk qelqanchiskunata qhawachispa willanku ima suyakuy kan roqt’ukunapaq chayta. Chaypi tiyaq runa mana willayta munawasunmanchu chayqa, saqesunmanmi huk qelqata otaq huñunakuyman invitacionta roqt’u runapaq.

8. ¿Imaynatan huk iñiq t’aqakuna yanapankuman makiwan rimaq iñiqmasikunata?

⁸ Yaqapaschá makiwan rimaq iñiq t’aqa huk iñiq t’aqaq yanapayninta mañakunman watapi huk otaq iskay kutipi huk cheqaspi askha tiyaq runakunata censanankupaq. Predicanankupaq huñunakuypin makiwan rimaq umalli willanqa imayna ruwanankuta, hinaspa huk demostracionta ruwachinqa. Sichus t’aqa-t’aqapi rinqaku chayqa, sapanka t’aqapin makiwan rimaq huk iñiqmasi mapantin rinqa, chaypitaq willanqa maypi censanankuta.

9. ¿Imatan ruwananchis roqt’ukunata tarinanchispaq?

⁹ Roqt’ukunatan maskhallasunmantaq kusirikusqanku, huñukusqanku cheqaskunapi. Llapa predicaqkunan allin yuyaywan p’achakunanku. Llapankuwan rimanankumantaqa hukwan otaq iskayllawanmi rimasunman. Sichus sumaqta parlata tupachisun chayqa direccionnintan mañasunman.

10. ¿Imaynatan qhatunakunapi roqt’ukunata maskhasunman?

¹⁰ Hinaspapas mapakunatan ruwasunman maypis qhatunakuna kan chayta yachanapaq, ima horapi allin kanman visitanapaq chaytapas. Chay mapapin churasunman hayk’a grifokuna, pensionkuna, hotelkuna huk qhatunakunapas kan chayta. Sichus sapanka mapa kaq qhatunamanta willashan chayqa iñiqmasinchiskunan aswan allinta predicayninkuta ruwanqaku. Hotelpi atiendeqman pisillapi willaspan saqesunman DVD nisqata, qelqakunata, huñunakunapaq invitaciontapas chay hotelpi qorpachakuq roqt’ukunapaq. Wakin qhatunakunapin tapullasunmantaq chaypi llank’aqkuna otaq rantiqpas makiwan rimaq kanchus chayta. Sichus chay cheqaspi roqt’ukunapaq escuela kan chayqa, saqesunmanmi DVD nisqata huk qelqakunatapas bibliotecankupaq.

11. ¿Imaraykun censo ruwasqanchista predicayta hina qhawarinanchis?

¹¹ Ancha allin llank’ay. Huk simi rimaq runakunata maskhayqa sasan. Wakin cheqaskunapiqa manan kaqllapichu tiyanku, chaymi censasqanchis papelta cambiashanalla. Hinaspapas askha cheqaskunapi huk simi rimaqkunata maskhasqanchistan predicacionta hinaña qhawarinchis. Jehová Diosmi kamachiwanchis llapa runakunata predicananchispaq (Hech. 10:34). “Payqa munanmi llapan runakuna qespichisqa kanankuta, cheqaq-kayta reqsinankutapas.” (1 Tim. 2:3, 4.) Chayraykun huk simi rimaq ‘cheqaq allin sonqoyoq’ runakuna maskhaypi Jehová Diosta, iñiqmasinchiskunatapas yanapananchis (Luc. 8:15).

[5 paginapi recuadro]

Yanapanakusun

Sichus huk simi rimaq iñiq t’aqa otaq grupo yanapanata necesitanman chayqa, watukuq umallin rimanakunman qayllapi kaq iñiq t’aqakunapi umallikunawan. Ichaqa manan nishu karupi kaq iñiq t’aqakunawan rimanakunankuchu, chaymantapas qhawarinankun sichus chay cheqaskunapi huk simi rimaqkuna askha kashanku chayta. Chay iñiq t’aqakunapi iñiqmasikunamanmi willakunqa chay simita rimaq runata tarispaqa direccionninta anotanankupaq, chaytataq superintendente de servicio nisqaman qonankupaq. Payñan yanapayta mañakuq iñiq t’aqaman otaq grupoman chayta qonqa. Predicasqaykichis llaqtapi superintendente de servicio iñiqmasikunañan rimanakunqaku huk simi rimaqkunata imayna predicakunanta, tarispataq chay iñiq t’aqaman invitanankupaq.

Sichus huk simipi rimaq (otaq roqt’u) runa allinta uyarisunki chayqa Sírvase visitar (S-43) hojapi maypi tiyasqanta anotay, chaytataq qoy iñiq t’aqapi secretarioman. Chay hinapin usqhaylla chay runata yanapakunqa Diosta reqsinanpaq (qhawariy km 5/11 pág. 3).

[6 paginapi recuadro]

¿Imatan ruwasunman huk simi rimaqkunata maskhanapaq?

• Tapukunanchismi Biblia estudiaqkunata, familianchista, llank’aqmasikunata hukkunatapas.

• Chay simipi sutikunatan maskhasunman directorio telefónico nisqapi. Direccionninta sutinta tarinapaqqa maskhallasunmantaqmi Internetpi otaq compañías telefónicas nisqapi.

• Maskhasunmanmi bibliotecakunapi, municipio oficinakunapi, escuelakunapipas.

• Periodicokunapin qhawasunman huk simi rimaq runakunaq ruwayninkumanta willakuykunata.

• Chay simi rimaq runakuna mayqen tiendakunaman qhatunakunaman risqanta yachaspaqa chaymanmi risunman.

• Qhatunakunapi, universidadpi, terminalkunapi iman permisonkuwan chay simimanta qelqanchiskunata askhata saqesunman runakuna apakunanpaq.

• Autoridadkunaq permisonwanqa rantisunmanmi direccionninkumanta willaq librota, otaq Internetpi maskhanapaqpas pagasunman.

[7 paginapi recuadro]

¿Ima nisunmanmi runakunata censaspa?

Sumaqta rimapayaqtinchisqa manan mancharikuwasunchu. Allinmi kanman ñawpaqta mayqen qelqanchistapas chay simipi munachiqtinchisqa.

Napayusqayki qhepamanmi niwaq: “․․․․․ simi rimaqkunatan maskhashayku, Bibliamanta sumaq suyakuyta willanaykupaq. ¿Reqsinkichu pillatapas chay simi rimaqta?” nispa.

Ruqt’u runakunata maskhashaspataq niwaq: “Allillanchu. ¿Huk videota qhawachiykimanchu? [DVD nisqa yanapayninwan huk textota qhawachiy.] Kayqa Bibliamanta huk texton makiwan rimaqkunapaq. Kay hina videokunawanmi ruqt’u runakunata yanapayku Diosta reqsinankupaq, chaykunaqa manan qolqepaqchu. ¿Reqsinkichu chay hina runata otaq sasawan uyarispa makiwan rimayta yachaq runata?”. “Manan yuyanichu” nisunki chayqa, tapuwaqmi yaqapas llank’ananpi, escuelapi, tiyasqan cheqaspipas huk ruqt’u runa rikusqanta.