Profetakunaq ruwasqanqa allinninchispaqmi: Joel
1. ¿Imaynatan Joel hina huch’uyyaykukuq kasunman predicaspa?
1 ¿Pin karqan profeta Joel? Bibliapi qelqasqan libroqa “Petuelpa churin” kasqallantan willan (Joel 1:1). Chay profetaqa huch’uyyaykukuqmi karqan, payqa manan imakuna ruwasqanmantachu rimarqan aswanpas Jehová Diospa willakuyninmantan. Ñoqanchispas kaqllatataqmi ruwashanchis, predicaspaqa manan ñoqanchistachu allinpaq qhawarichikunchis, aswanpas reparachinchismi willasqanchisqa Bibliamanta kasqanta Jehová Diospa kasqantapas (1 Cor. 9:16; 2 Cor. 3:5). ¡May munaymi willakuykuna apasqanchisqa! Yachasun profeta Joelpa wakin willasqankunamanta, chaykunan yanapawasun tukuy sonqo predicanapaq suyakuyniyoq kanapaqpas.
2. ¿Imatan ruwananchis Diospa p’unchaynin qayllaykamushasqanta yachaspa?
2 “Diospa muchuchinan p’unchaymi sispaykamushan” (Joel 1:15). Chay simikuna yaqa kinsa waranqa wata ñawpaqtaña qelqakurqan chaypas, kay tiempopin hunt’akunqa. Astawanmi sasachakuykunaqa kashan, predicasqanchispipas runakunan burlakuwanchis manan uyariytapas munankuchu. Chaykunan rikuchin tukukuy p’unchaykunapi kawsashasqanchista (2 Tim. 3:1-5; 2 Ped. 3:3, 4). Diospa p’unchayninqa qayllaykamushanñan, chayraykun kawsayninchispiqa Diosmanta willay aswan importante kanan (2 Ped. 3:11, 12).
3. Manchay ñak’ariy p’unchay qayllaykamushanñataq chayqa, ¿imaraykun astawan predicananchis?
3 “Diosmi [...] llaqtanpa pakakunan kanqa” (Joel 3:16). Chay textopin willallantaq ‘hanaq pachapas kay pachapas khatatatananta’, chaytaqa rimashan manchay ñak’ariy p’unchaypi Jehová Diospa juicionmantan. Chay p’unchaypiqa Diosqa salvanqan hunt’aq serviqninkunata (Apo. 7:9, 14). Astawan predicaypas Jehová Dios kallpachawasqanchista reparaypas yanapawanchismi aswan allin iñiyniyoq kanapaq mana pisipanapaqpas, chaykunatan necesitasun manchay ñak’ariy p’unchaypi salvakunapaq.
4. ¿Imaraykun kusisqa kananchis manataq manchakunanchischu hamuq tiempopi imakuna sucedenanmantapas?
4 Llakichikuqta hinaña wakinkuna qhawarinku profeta Joelpa willasqankunata chaypas, rimasqankunaqa Diospa llaqtan salvasqa kananpaqmi suyakuyta qon (Joel 2:32). Chhaynaqa ama manchakusunchu hamuq tiempopi imakuna sucedenanmanta, Diospa Gobiernonmanta tukuy sonqowan willasun, Joel 2:23 textoq nisqanman hinataq kawsasun, ninmi: “Kusikuychis, Diosniykichis Señor Diospa ruwasqanmanta q’ochukuychis”, nispa.