¿Diospaq hinachu kashani?
1. ¿Imaynapin Biblia huk espejo hina yanapawasunman?
1 Yaqa llapa runakunan sapa kutilla espejopi qhawakunchis imayna kashasqanchista rikuspa allichakunanchispaq. Bibliapas espejo hinan. Sapa kutilla leesqanchismi yanapawanchis sonqonchis ukhupi imayna kashasqanchista yachanapaq (1 Sam. 16:7; Sant. 1:22-24). Hebreos 4:12 textopin nin: “Sonqopi yuyaykusqakunatapas lliwtapunin sut’inchan”, nispa. Sichus sapa p’unchay Bibliata leesun yuyaymanasuntaq chayqa, yachasunmi imakunapi allinyananchis kasqanta, chaytaqmi yanapawasun aswan allinta predicananchispaq (Sal. 1:1-3).
2. ¿Imaynatan Biblia yanapawasunman imayna kasqanchista qhawarikunapaq?
2 ¿Imaynatan Biblia yanapawasunman? Ñawpa tiempopi Dios serviqkunamanta yachasqanchismi rikuchiwanchis, Diosta kusichinapaq imayna runa kananchista. Wakinmanta yachasun. Rey Davidmi Diospa sutinta hatunchananrayku rawrashaq sonqowan maqanakurqan (1 Sam. 17:45, 46). Profeta Isaiaspas mana manchakuspan millay runakuna ukhupi predicarqan (Is. 6:8, 9). Jesusmi taytanta munakuspa kusikuywan predicarqan, ancha sumaq llank’ayta hinataq qhawarirqan (Juan 4:34). Ñawpa cristianokunapas Jehová Diospin confiarqanku, chaymi mana pisipaspa tukuy sonqowan predicarqanku (Hech. 5:41, 42; 2 Cor. 4:1; 2 Tim. 4:17). Chay willakuykunapi yuyaymanaymi yanapawasun imayna kashasqanchista qhawarikunapaq. Chay hinapin kallpachakusun aswan allinta predicanapaq.
3. ¿Imaraykun kunanmantapacha kawsayninchispi cambiananchis?
3 Kallpachakusun cambianapaq. Sichus espejopi qhawakuspa, hinalla pasapusun chayqa, yanqapaqmi kanqa espejopi qhawakusqanchis. Chaymi Diospaq hina kayta munaspaqa, paymanta mañakunanchis ñoqanchispi mana allinkunata reparachiwananchispaq, kallpachakunataqmi cambianapaq (Sal. 139:23, 24; Luc. 11:13). Chaytaqa kunanmantapachan ruwananchis, ¿imarayku? Tukukuy p’unchaykunapiña kasqanchisrayku (1 Cor. 7:29; 1 Tim. 4:16).
4. ¿Imaynapin tarikunqa Diospa siminta allinta t’aqwispa cambiaq runa?
4 Sonqonchis ukhupi imayna kasqanchismi aswan chaniyoqqa (1 Ped. 3:3, 4). Diospa siminta allinta qhawaspa chayman hina cambiaq runaqa, mana qonqaspa ‘kamachikuy simita hunt’aq’ runa hinan. Chay runaqa “tukuy ruwasqankunapin kusisamiyoq kanqa” (Sant. 1:25). Arí, Jehová Diospa ‘lliphlli-kayninwan k’ancharisun’ chayqa, kusisqan kasun aswan allintataq predicasun (2 Cor. 3:18).