¿Imaynatan estudiantekunaq sonqonman chayasunman?
1. ¿Imaynan qatikuqninkuna sientekurqanku Jesús yachachiqtin?
1 Jesusqa runakunata yachachispan sonqonman chayaqtapuni yachachirqan. ¿Imaynapi yachanchis? Huk kutinmi Jesuspa yachachisqanta uyarispa qatikuqninkunaq sonqon “kawsarirqan” (Luc. 24:32). Jehová Diosta kasukuyqa sonqomantan kanan. Chhaynaqa, ¿imaynatan estudiantekunata yanapasunman kawsayninkuta cambianankupaq? (Rom. 6:17.)
2. ¿Imakunatan ruwananchis estudiantekunaq sonqonman chayanapaq?
2 Allin yuyaywan sumaqllatataq yanapasun. Runakunataqa manan “kayqa allinmi kayqa manan allinchu” nillasqanchischu yanapanqa cambianankupaq. Creesqanku pantasqa kasqanta reparachinapaq askha textokunata leesqanchispas phiñachinmanmi. Chaymi ñawpaqtaqa allin yuyaywan reparananchis imakunapi creesqanta imarayku chhayna piensasqantapas. Hinaspapas sumaqllata tapusun chayqa, imachus sonqonpi kasqantan willawasun (Prov. 20:5). Chaykunan yanapawasun sonqonman chayaqta textokunata akllanapaq. Chayraykun may allinpuni paykunawan pacienciakuy paykunapi interesakuypas (Prov. 25:15). Ichaqa yuyariy, manan llapankuchu kaqllata iñiyninkupi wiñanqaku. Diospa espiritunqa pisi-pisimantan paykunata yanapanqa kawsayninkuta piensasqankutapas cambianankupaq (Mar. 4:26-29).
3. ¿Imaynatan estudiantekunata yanapasunman sumaq cristianokuna kanankupaq?
3 Sumaq cristianokuna kanankupaq yanapasun. Jehová Dios munakuq, sumaq sonqo kasqanmanta textokunatan estudiantekunawan leenanchis. Chaymi yanapanqa allin cristianokuna kanankupaq. Hinaspapas Salmo 139:1-4; Lucas 12:6, 7 textokunatan leesunman, chaypin yachanqaku Jehová Dios paykunapi interesakusqanta. Jehová Diospa imaymana ruwasqanmanta agradecekuq runaqa Diostan astawan munakunqa (Rom. 5:6-8; 1 Juan 4:19). Hinaspapas, sichus estudiante reparanqa imayna kawsasqan Diospa sonqonta kusichisqanta otaq llakichisqanta chayqa, kallpachakunqan Diosta kusichinanpaq hina imatapas ruwananpaq (Sal. 78:40, 41; Prov. 23:15).
4. ¿Imaynatan Jehová Diosta qatikusunman?
4 Jehová Diosqa sumaqllatan qhawarichiwanchis consejonkuna allinninchispaq kasqanta, ichaqa manan obligawanchischu kasukunapaq (Is. 48:17, 18). Diospa ejemplonta qatikunanchispaqqa estudiantekunatan reparachinanchis Diosta kasukuy allinninkupaq kasqanta. Chaykunan yanapanqa kawsayninkupi cambianankupaq (Rom. 12:2). Hinaspapas astawanmi ‘sonqokunata pruebaq’ Jehová Diosman asuykunqaku (Prov. 17:3).