Uyarinapaq grabacionkunawan yanapachikusun
1. Qelqakunamantapas, ¿ima yanapaymi kashan internetpi?
1 Internetpi jw.org nisqapin askha runakuna leeshanku ancha sumaq cheqaq yachachikuykunata (Ecl. 12:10). ¿Uyarirankiñachu qelqanchiskunamanta kaq grabacionkunata? Internetpiqa askha grabacionkunatan tarisunman. ¿Imakunapin yanapawasunman chaykunata uyariy?
2. ¿Imaynatan grabacionkunawan yanapachikusunman sapallanchispi otaq familianchiswan estudiaspa?
2 Uyariy sapallaykipi otaq familiaykiwan estudiaspa. Qelqakunamanta grabacionkunata uyariyqa yanapawanchismi tiemponchista astawan aprovechanapaq, chaykunatan uyarisunman viajashaspa otaq imata ruwashaspapas (Efes. 5:15, 16). Familianchiswan Diosta yupaychayninchista huk hinamanta ruwanapaqpas yanapawanchismi, grabacionta uyarispan qelqanchiswan qatipasunman. Sapallanchispi estudiaspapas grabacionkunatan uyarisunman aswan allin leeyta yachanapaq otaq huk simi rimayta yachanapaqpas.
3. ¿Pikunatan astawan grabacionkuna yanapanman Diosmanta yachanankupaq?
3 Predicashaspa. Predicacionpiqa wakinqa niwanchismi “manan kanchu tiempoy leenaypaq” nispa, ichaqa grabacionkunata uyariytaqa munankumanpaschá. Wakinqa huk simitan rimanku, paykunaqa yaqapaschá sonqonkuta kichariwasunman rimasqanku simipipuni Diospa gobiernonmanta uyarispa (Hech. 2:6-8). Wakin llaqtakunapiqa uyarispan imatapas yachanku. Ejemplopaq, hmong simita rimaq llaqtakunapiqa wawakunaqa tayta-mamankuq willasqankuta uyarispan yachanku, wawakunaqa ratollan chaykunata umankupi hap’inku. África ladopi wakin llaqtakunapipas runakunaqa uyarispan astawanqa yachanku.
4. Qelqanchiskunamanta grabacionkunawan predicaspa, ¿ima tapuykunatan ñawpaqta ruwakunanchis?
4 Predicasqanchis ladopi, ¿allinchu kanman wasiyoqman huk grabacionta rimasqan simipi uyarichiy? ¿Reqsinkichu pitapas correo electrónico nisqapi grabacionta apachinaykipaq? ¿Allinchu kanman uyariyta munaq runaman internetpi grabacionta huk discopi grabasqata qoy revistakunatawan kuska? Grabasqa librokunata, folletokunata, revistakunata, tratadokunatapas internetmanta horqospa pimanpas qospaqa anotasunmanmi informe hojapi. Qelqanchiskunamanta grabacionkunaqa ruwakun runakunaq sonqonman cheqaq yachachikuyta tarpunapaq iman (1 Cor. 3:6).