Iñiyninpi chiriyapuq iñiqmasita yanapay

Sapa watanmi iñiyninkupi chiriyapuq askha cristianokuna Jesuspa wañupusqanta yuyarina juñunakuyman rinku. Paykunaqa Dios serviytan qallariranku, ichaqa imapas pasasqanraykun pisiparanku. Chaytan willashan Jehová Diosqa maytan munashan kutimpunaykita nisqa folleto (Heb. 12:1). Ichaqa Jehová Diosqa kaqllatan chay cristianokunataqa valorashan, Churinpa yawarninwan paykunata rantisqanrayku (Hech. 20:28; 1 Ped. 1:18, 19). ¿Imaynatan paykunata yanapasunman iñiq t’aqaman kutimpunankupaq?

Imaynan oveja michiqqa ovejan chinkaqtin usqhaylla maskhaq rin, chay jinatan iñiq t’aqapi umalliqkunapas yanapayta munanku iñiyninkupi chiriyapuq iñiqmasikunata (Luc. 15:4-7). Chaymi rikuchin Jehová Dios paykunata munakusqanta (Jer. 23:3, 4). Ichaqa manan umalliqkunallachu paykunataqa kallpachankuman. Llapallanchismi imallatapas ruwasunman paykunaman munakuyninchista rikuchinapaq, chayqa Jehová Diostan maytapuni kusichinqa (Prov. 19:17; Hech. 20:35). Chhaynaqa, piensay iñiyninpi chiriyapuq juj hermanopi, jinaspa usqhaylla yanapay.

IÑIYNINKUPI CHIRIYAPUQKUNATA YANAPASUN NISQA VIDEOTA QHAWASPA KAY TAPUYKUNATA KUTICHIY:

• ¿Imatan Abbey ruwaran iñiyninpi chiriyapuq hermanata reqsispa?

• ¿Imaraykun umalliqkunawan rimana pitapas yanapayta munaspa?

• ¿Imaynatan Abbey preparakuran jujmanta Laurawan tupaq rinan kaqtin?

• ¿Imaynatan Abbey rikuchiran mana sayk’uspa, pacienciawan, munakuywan ima Laurata yanapay munasqanta?

• ¿Imatan yachasunman Lucas 15:8-10 textopi tarikuq ejemplomanta?

• ¿Imaynapin tukuran llapankumanta Laurata yanapanankupaq tukuy ruwasqanku?