Ama qonqasunchu iñiyninkupi chiriyapuqkunata
1. ¿Ima raykun kallpachananchis iñiyninpi chiriyapuqkunata?
1 ¿Pillatapas iñiyninpi chiriyapuqta reqsinkichu? Yaqapaschá wasin wasinta predicaspa tuparanchis manaña huñunakuykunaman hamuq iñiqmasinchiswan. Chay runaqa iñiqmasinchisraqmi. Chaymi payman munakuyninchista rikuchina, yanapananchistaq Diospa llaqtanman, ‘waqaychawaqninchis michiwaqninchis Cristomanpas’ kutinpunanpaq (1 Ped. 2:25).
2. ¿Imaynatan kallpachasunman iñiyninpi chiriyapuq wayqe-pananchista?
2 Paykunapi interesakusun: Iñiyninpi chiriyapuqta telefonopi waqyaqtinchismi, wasinta ratullapas watukuq riqtinchismi payqa reparanqa mana qonqasqanchista. ¿Imatan paykunaman nisunman? Qanpin yuyaymanasharani, nispa nisunman, chaymi kallpachanqa. Kallpachaq hina rimananchis (Fili. 4:8). Willasunmanmi huñunakuypi allin yachachikuy uyarisqanchismanta. Chaymantapas mink’asunmanmi huñunakuyman hamunanpaq, otaq qayllaykamuq asambleaman rinanpaqpas, niwaqtaq tiyanata waqaychapusqayki, otaq carrontin hamusaq apanaypaq, nispa.
3. ¿Iman yanaparan huk pananchista Diospa llaqtanman kutinpunanpaq?
3 Huk kutinmi predicaspa tarisqaku iskay chunka wataña iñiyninpi chiriyapuq pananchista. Wakmanta Bibliata estudiananpaq huk pananchis munachiqtinmi mana munasqachu. Chaywanpas pananchisqa apashallasqa chayllaraq chayamuq revistakunata. Distrito asambleaq pasasqan qhepatan pananchisqa watukuq rispa, willasqa asambleapi allin yachachikuykuna uyarisqanta. Chaykunan yanaparan pisi pisimanta iñiyninpi chiriyapuq pananchis Diospa llaqtanman kutinpunanpaq.
4. ¿Imaynatan chaskinanchis iñiyninpi chiriyapuq wayqe-pananchis huñunakuykunaman hamuqtin?
4 Pipas kutinpuqtin: ¿Imaynatan chaskinanchis iñiyninpi chiriyapuq wayqe-pananchis huñunakuykunaman hamuqtin? Qhawasunchis Jesuspa ruwasqanta, paytan yachachisqankuna saqerparisqaku, chaywanpas payqa munakuywanmi paykunata niran ‘wayqeykuna’, nispa, chaymantataq paykunapi confiasqanta rikuchiran hatun llank’anata paykunaman saqespa (Mat. 28:10, 18, 19). Chay qhepamanmi paykunaqa allin willakuykunata ‘willashallarankupuni’ (Hech. 5:42).
5. Hayk’aqmi ancianokunawan rimanayki iñiyninpi chiriyapuq wayqe-panamanta.
5 Iñiyninpi chiriyapuqwan Bibliata estudianapaq otaq paywan kuska predicaq lloqsinapaqqa ancianokunawanmi ñawpaqta rimana. Sichus predicasqaykipi tarinki iñiyninpi chiriyapuqta chayqa, ancianokunamanmi willanayki yanapanankupaq.
6. ¿Ima kusikuytan tarinchis iñiyninpi chiriyapuqkunata yanapaspa?
6 Bibliaqa ninmi, tukukuykama qaqata sayaqkunallan qespisqa kanqaku, nispa (Mat. 24:13). Chay raykun yanapananchis espiritualpi misk’aqkunata, huñunakuyman manaña hamuqkunatapas. Sichus Jehová Dios hina pacienciawan paykunapi interesakusun chayqa, anchatapuni kusikusun Jehová Diosta wakmanta servisqankumanta (Luc. 15:4-10).