1 | Diosmanta mañakuy: Tukuy llakipakuyniykita payman saqey

BIBLIAPIN NIN: “Tukuy llakipakuyniykichista payman saqeychis, payqa qankunamantan llakikun”, nispa (1 PEDRO 5:7).

¿Imatan chaywan nishan?

Jehová Diosqa munanmi imakunachus llakichiwasqanchista payman willakunanchista (Salmos 55:22). Ima problemanchispas jatunña juch’uyña kanman chaypas, payqa uyariytan munawanchis. Payqa munakuwanchismi, chaymi imachus llakichiwasqanchista uyariyta munan. Chhaynaqa Diosmantan mañakunanchis sonqonchis ukhupi thaj sientekunanchispaqqa (Filipenses 4:6, 7).

¿Imaynatan yanapawanchis?

Llaki onqoyniyoq kashaspaqa yaqapaschá sapallanchispas kashasunman jina sientekusunman. Jujkunaqa manan allintachu entiendenku imayna kashasqanchista (Proverbios 14:10). Diosninchismi ichaqa allinta entiendewanchis, pacienciawantaqmi uyariwanchis, chaymi mana manchakuspa payman willakunanchis. Jehová Diosqa allintan reqsiwanchis, yachanmi imachus llakichiwasqanchista, chaymi payqa munan tukuy chaykunata payman willakunanchista (2 Crónicas 6:29, 30).

Jehová Diosman tukuy sonqo mañakuspaqa astawanmi confianchis pay yanapawananchispi. Jinaspa Salmos librota qelqaq jina mana iskayaspa Diosta nisun: “Qanqa rikunkin imayna sufrisqayta, yachankin may llakisqa tarikusqaytapas”, nispa (Salmos 31:7). Jehová Diosqa rikumushanmi sufrisqanchista, chayta yachayqa kallpatan qowanchis aguantananchispaq. Chaymantapas payqa allintan yachan imachus pasawashasqanchista, chaymi Bibliapi kaq sumaq yachachikuykunawan kallpachawanchis, consolawanchis ima.

Imaynatan Biblia yanaparqan Julianta

¿Imaynan llaki onqoyniykiwan sientekunki?

“Sapa p’unchaymi mana allin piensaykuna umayman jamuwan, jinaspa llakisqalla kashani. Allin kashaqtiymi qonqaylla mana imapas pasashaqtin sinchita llakikuyta qallarini. Askha runakunawan kashaqtiyqa astawanmi chayqa pasawan, jinan astawanraq llakikuni jujkuna noqamanta mana allinta piensanankumanta.

“Reqsiwaqniy runakunaqa tukuy atisqankutan ruwanku yanapawanankupaq, mayninpin ichaqa niwasqankuqa mana yanapawanchu. Ichaqa paykunatan anchata agradecekuni imaymanata noqapaq ruwapuwasqankumanta.

“Mayninpiqa sinchi llakisqa kashaqtiymi sasa noqapaq Diosmanta mañakuy. Chaymi anchata kallpachakunay Jehová Dioswan rimanaypaq. Noqaqa imapipas piensashaqtiymi jujkunapiñataq piensayta qallarini. Chaymi mana atinichu Jehová Diosman imatachus niyta”.

¿Imaynatan Biblia yanaparqasunki?

“Bibliapin yacharqani Diosmanta mañakushaspa mana askhataraqchu rimananchista. Mayninpiqa manan atinichu imayna sientekusqayta Jehová Diosman niyta, chaymi kayllata nini: Jehová Diosníy, ama jinachu kay, yanapaykuway, nispa. Chayllataña niyta atini chaypas, sut’itan reparani Jehová Dios entiendewasqanta, jinaspa chay ratupi imachus necesitasqayta chaskini. Chaymantapas juj tratamientotan maskharqani. Chaykunata ruwasqaymantan kusisqa kashani, chaymi yanapawan allin sientekunaypaq. Noqapaqqa sasan Jehová Diosman asuykuyqa, chaymi anchata kallpachakunay mañakunaypaq, yachanin pay munakuwasqanta yanapay munawasqantapas”.