2 | “Diospa simin qelqan kallpachawanchis”
BIBLIAPIN NIN: “Ñaupaqpi qelqasqa kaqkunaqa yachachiwananchispaqmi qelqasqa karqan; chaymantapas Diospa simin qelqan kallpachawanchis, aguantananchispaqpas yanapawanchis, chaymi suyakuyniyoqpas kanchis”, nispa (ROMANOS 15:4).
¿Imatan chaywan nishan?
Bibliapiqa kashanmi consolawananchispaq sumaq consejokuna, chaykunan yanapawasun aguantananchispaq, kallpatataq qowasun mana valeqpaq qhawarikuqtinchis. Chaymantapas Bibliapiqa prometewanchismi pisi tiempollamanta chaykuna chinkapunanta.
¿Imaynatan yanapawanchis?
Llapanchispas mayninpiqa sinchitan llakikusunman, ichaqa llaki onqoywan kashaq runakunaqa yaqapaschá sapa p’unchay llakikuyninkuta atipananku. ¿Imaynatan Biblia paykunata yanapanman?
Bibliapiqa kashanmi sumaq consejokuna chaykunapi piensayqa yanapawasunmanmi mana allin piensaykunata umanchismanta orqonanchispaq (Filipenses 4:8). Chay consejokunata umanchispi jap’isun chayqa, atisunmi sonqonchis ukhupi thaj kayta, yanapawasuntaq ama nishuta llakikunanchispaq (Salmos 94:18, 19).
Bibliapi kaq yuyaychaykunaqa yanapawasunmi mana valeqpaq qhawarikusqanchista atipananchispaq (Lucas 12:6, 7).
Chaymantapas Bibliapiqa willanmi askha runakunata Dios yanapasqanmanta, chaypin yachanchis Diosqa noqanchiswan kashasqanta, imayna sientekusqanchista entiendewasqanchistapas (Salmos 34:18; 1 Juan 3:19, 20).
Bibliapin Dios prometewanchis jamuq tiempopi imachus llakichiwasqanchista manaña yuyarinanchispaq (Isaías 65:17; Apocalipsis 21:4). Sichus llaki onqoywan kashanki chayqa, Diospa prometesqanta yuyariymi yanapasunkiman aguantanaykipaq.