3 | Bibliaq willasqan runakuna
BIBLIAPIN WILLASHAN: Allin sonqoyoq runakunamanta, paykunaqa “noqanchis jinallan karqanku” (SANTIAGO 5:17).
¿Imatan chaywan nishan?
Bibliapiqa askha runakunamantan willashan, paykunamanta wakinqa llakiq ñit’isqanmi tarikurqanku. Paykunaq vidanmanta leespan yachawaq wakinqa qan jina tarikusqankuta.
¿Imaynatan yanapawanchis?
Llapanchispas necesitanchismi jujkuna entiendewananchista, astawanqa llaki onqoywan kashaqkunan necesitanku. Bibliaq willasqan wakin runakunaqa yaqapaschá qan jina sientekurqanku, Bibliata leespan chayta yachawaq. Chhaynapin yachanki mana qanllachu chhaynapi tarikusqaykita.
Bibliaq willasqan wakin runakunaqa sinchita llakikuspan kallpankuraq pisiyarqan. ¿Jayk’aqllapas nirqankichu: “Manan atiniñachu, wañupullaymanña”, nispa? Chhaynan Moisespas, Eliaspas, Davidpas sientekurqanku (Números 11:14; 1 Reyes 19:4; Salmos 55:4).
Bibliapin willashallantaq Anamanta, payqa sinchitan llakikurqan mana wawayoq kayta atisqanmanta, qosanpa juj kaq warminpas millaytan k’amiq (1 Samuel 1:6, 10).
Yaqapaschá Job jina sientekullarqankitaq, Bibliaqa willanmi paymantapas. Payqa allin iñiyniyoqmi karqan, chaywanpas nirqanmi: “Imachá noqaq vidayqa, wañukapuyman chayqa allinchá kanman”, nispa (Job 7:16).
Qhepamanmi ichaqa imaynachus piensasqankuta umankumanta wijch’upurqanku. Noqanchispas paykunaq ejemplonta qatikuspaqa atillasunmi mana allin piensaykunata umanchismanta orqoyta.