4 | Bibliapin kashan allin consejokuna

¿Imatan chaywan nishan?

Bibliapiqa manan willanchu ima onqoytapas imayna jampichikunamantaqa, chaywanpas chaypi kaq consejokunaqa yanapanmi llaki onqoywan kashaqkunata. Wakin yuyaychaykunata qhawarisun.

¿Imaynatan yanapawanchis?

“Qhali runakunaqa manan doctorta necesitankuchu, onqosqakunan ichaqa necesitanku” (MATEO 9:12).

Bibliapiqa willanmi doctorkunaq yanapayninta mayninpi necesitasqanchista. Llaki onqoywan kashaq askha runakunan doctorman rispa yacharqanku imachus paykunata sinchita llakichisqanta, jinaspa allin tratamientota chaskikurqanku.

“Ejercicio ruwayqa yanapawanchismi cuerponchis allin kananpaq” (1 TIMOTEO 4:8, Traducción en lenguaje actual).

Tiempotan orqonanchis cuerponchista cuidananchispaq, chayqa yanapawasunmanmi umanchismanta mana allin piensaykunata orqonanchispaq. Wakinqa sapa kutillanmi ejerciciota ruwanku, allinta alimentakunku, allintataq puñunkupas.

“Kusisqa sonqoqa allin jampin, llakiq ñit’isqan sonqon ichaqa kallpata wañuchin” (PROVERBIOS 17:22).

Kallpachawananchispaq jina Bibliapi textokunata leeypas, atisqanchisman jinalla ruwaypas yanapawasunmanmi allin sientekunanchispaq. Imakunatachus allinta ruwanki chaypi piensaypas, jamuq tiempopi sumaq kausay kananpi piensaypas yanapasunkin ama nishuta llakikunaykipaq.

“Juch’uyaykukuqkunan yachayta tarinku” (PROVERBIOS 11:2).

Mayninpiqa wakin ruwaypin jujkunaq yanapayninta necesitanki, chaymi mana p’enqakuspa paykunaq yanapayninta mañakunayki. Amigoykikunapas familiaykikunapas munankun qanta yanapayta, ichaqa manapaschá yachankuchu imachus necesitasqaykita. Chaymi sut’inta willanayki imapichus yanapanasuykikuta, ichaqa manan phiñakunaykichu munasqaykiman jina mana ruwaqtinkuqa, aswanpas agradecekunaykin yanapasqasuykikumanta.

Imaynatan Bibliapi kashaq consejokuna llaki onqoyniyoqkunata yanapan

“Noqaqa reparakurqanin mana allinchu kashasqayta, chaymi doctoraman rirqani. Doctoraqa entiendechiwarqanmi imachus pasawashasqanta, chaypin yacharqani llaki onqoyniyoq kasqayta. Chaymantapas niwarqanmi ima tratamientotachus chaskinayta” (Nicole,a payqa trastorno bipolar nisqa onqoyniyoqmi kashan).

“Noqataqa esposaywan sapa p’unchay Bibliata leeymi allinta yanapawan. Chayta ruwaspan noqaqa allinkunapi piensani. Mayninpiqa sinchi llakisqan tarikuni, ichaqa Bibliata leeshaspan tarinipuni kallpachawananpaq jina textokunata” (Peter, payqa depresión onqoyniyoqmi kashan).

“Qallariypiqa p’enqakurqanin llaki onqoyniymanta jujkunaman willayta. Ichaqa juj amigaymi entiendewarqan, sumaqllatataq rimapayawarqan, chaypin repararqani munakuwasqanta, chaytaq yanapawarqan allin sientekunaypaq” (Ji-yoo, payqa trastorno alimentario nisqa onqoyniyoqmi kashan).

“Bibliaq nisqanta kasuspan noqaqa kallpachakuni allinta samanaypaq, ama nishuta llank’anaman qokunaypaq ima. Chayta ruwaymi yanapawashan llaki onqoyniywan ama ñit’ichikunaypaq” (Timothy, payqa trastorno obsesivo-compulsivo nisqa onqoyniyoqmi kashan).