Ch’aqwaykunapas guerrakunapas tukupunqan

DIOSMI LLAPA GOBIERNOKUNATA CHINKACHINQA

Diosqa llapa kay pacha gobiernokunatan Armagedón nisqa guerrawan tukuchinqa (Apocalipsis 16:16).a Chay p’unchay chayamuqtinmi “jallp’a pachapi llapa reykuna” otaq gobiernokuna juñusqa kanqaku “Diospa jatun p’unchaynin guerrapaq” (Apocalipsis 16:14). Diosqa chay Armagedón guerrallawantaqmi tukuchinqa llapa guerrakunatapas.

Diosqa llapa kay pacha gobiernokunatan tukuchinqa chay gobiernokunaq rantinpitaq juj gobiernota sayarichinqa, jinan chay gobiernollaña wiñaypaq kamachikunqa (Daniel 2:44). Chay gobiernopi kamachikunanpaqmi Diosqa ajllarqan wawan Jesucristota (Isaías 9:​6, 7; Mateo 28:18). Jesuspas kay pachapi kashaspaqa chay gobiernomantab mañakunankupaqmi discipulonkunata yachachirqan (Mateo 6:​9, 10). Chay gobiernopiqa Jesucriston llapa runakunata kamachinqa, chaymi runakunaqa juj nisqalla kausanqaku.

Kay pacha gobiernokunaqa paykunaq munaynillantan ruwayta munanku, Jesusmi ichaqa llapa runaq allinninpaq imatapas ruwanqa. Payqa chanintan kamachikunqa manan pimanpas sayapakunqachu, allintan imatapas juzganqa manan wajcha kaypas qhawanakuypas kanqañachu (Isaías 11:​3, 4). Runakunaqa manan derechonkumanta reclamanqakuñachu Jesucriston tukuy necesitasqankuta sapanka runaman qonqa. “Paymi yanapay mañakuq wajchakunata libranqa, paymi mana piniyoqtapas, pisichasqatapas libranqa […]. Pisichasqa kasqankumantan, sarunchasqa kasqankumantan orqonqa” (Salmos 72:​12-14).

Runaqa askha armakunatan ruwanku runamasinta wañuchinankupaq, tukuy chaykunatan Diospa gobiernon ch’usaqman tukuchinqa (Miqueas 4:3). Tukuchillanqataqmi mana kasukuq millay runakunatapas, paykunaraykun kunanqa mana thaj kay kanchu (Salmos 37:​9,10). Maypiña kaspapas juch’uypas jatunpas thajpin kausanqaku, manan imapas paykunataqa manchachinqañachu (Ezequiel 34:28).

Diospa gobiernonpiqa sumaq kausaymi kanqa. Manañan kanqañachu yarqaypas ni wajcha kaypas, runakunapas llapankun wasiyoqkama kanqaku. Imaymana mijuykunapas askhan kanqa. Familiakunapas llapankun thajpi kusisqa kausanqaku (Salmos 72:16; Isaías 65:​21-23).

Diospa gobiernon kay pachata kamachiqtinqa manañan kanqañachu guerrakunapas ni ima sasachakuykunapas. Manañataq guerra kanqachu chayqa manan pipas sufrinqañachu nitaq chaykunamantapas llakikunqañachu. Wañupuqkunapas kausarimpunqakun (Isaías 25:8; 26:19; 35:​5, 6). Arí, jujmantan familianchiskunawanpas tupasunchis. Llapa sasachakuykunapas ñak’ariykunapas qonqasqan kapunqa (Apocalipsis 21:4).

DIOSMI JUCHATA CHINKACHIPUNQA

Diospa gobiernonpiqa llapa runakunan juj nisqalla Jehovác Diosta yupaychanqaku, payqa “thaj kayta qoq, ancha munakuq Diosmi” (2 Corintios 13:11). Chaymantapas runakunaqa jujkuna-jujkunawanmi thajpi kausanqaku (Isaías 2:​3, 4; 11:9). Diosmanta yachasqankuman jina kausaqkunaqa juchamantan kacharichisqa kanqaku (Romanos 8:​20, 21).

DIOSMI CHINKACHIPUNQA SAQRATA SUPAYNINKUNATAPAS

Diospa gobiernonpiqa Saqrapas supayninkunapas chinkachisqan kanqaku, manañan runakunata tanqanqakuñachu guerrakunata jatarichinankupaq (Apocalipsis 20:​1-3, 10). Manañataq Saqrapas supayninkunapas kanqañachu chayqa “thaj kayqa” pachantinpin mast’arikunqa (Salmos 72:7).

Jehová Diosqa tukuchinqapunin guerrakunatapas ch’aqwaykunatapas. Payqa munashanmi chay ruwayta atiyniyoqtaqmi kanpas rimasqanta junt’ananpaq.

• Diosqa atiyniyoqmi yachayniyoqmi guerrakunata ch’aqwaykunata tukuchinanpaq (Job 9:4). Paypaqqa manan imapas mana ruway atinaqa kanchu (Job 42:2).

• Diosqa anchatan llakikun runakunaq sufrisqanta rikuspa (Isaías 63:9). “Payqa cheqnikunmi maqanakuywan kusikuqkunataqa” (Salmos 11:5).

• Diosqa junt’anpunin llapa rimasqanta, payqa manan jayk’aqpas llullakunmanchu (Isaías 55:​10, 11; Tito 1:2).