¿Imaynapin thaj kausasunman guerrakunaña ch’aqwaykunaña kaqtinpas?
Gary sutiyoq runaqa soldadon karqan, paymi nin: “Manaraq Bibliata estudiashaspaqa manan yacharqanichu imaraykus sinchi sasachakuykuna, mana chanin ruwaykuna, ñak’ariykuna kan chayta. Kunanqa thajpin kausashani, yachanitaqmi Jehová Dios kay pachaman sumaq kausayta apamunanta”, nispa.
Manan Gary sutiyoq runallachu chhaynapi tarikurqan. Kaypin yachasun imaynatas Biblia juj runakunatapas yanaparqan chayta.
BIBLIAN NIN: “Diosníy Jehová, sumaq sonqo Diosmi kanki, liston kashanki juchata perdonanaykipaqpas”, nispa (Salmos 86:5).
¿IMAYNATAN YANAPAWANCHIS? Colombia nacionmanta Wilmarmi nin: “Chay texton thaj kayta qowan, Jehová Diosqa may khuyapayakuqmi. Payqa perdonawanqapunin guerrapi kashaspa mana allinkuna ruwasqaymanta”, nispa.
BIBLIAN NIN: “Mosoq cielota mosoq jallp’a pachatawanmi kamasaq, ñaupaq kaqkunaqa manan yuyarisqañachu kanqa, manan sonqomanpas chaykunaqa jamunqañachu”, nispa (Isaías 65:17).
¿IMAYNATAN YANAPAWANCHIS? Estados Unidos nacionmanta Zafiran nin: “Guerrapi imaymanakuna rikusqaytan mana qonqayta atinichu chaymi sinchita llakichiwan. Jehová Diosqa pisi tiempomantan qonqachipuwanqa tukuy ñak’arisqaykunata, manañan ima mana allin piensaypas umaypi kanqañachu. Manañan kiska jina sinchi nanay noqapi kanqañachu. ¡Chayqa may sumaq regalon!”, nispa.
BIBLIAN NIN: “Pay kamachikuqtinqa t’ika jinan chanin runaqa t’ikarinqa. Thaj kayqa kashallanqan killa k’anchashanankamaqa”, nispa (Salmos 72:7).
¿IMAYNATAN YANAPAWANCHIS? Ucrania nacionmanta Olexandran nin: “Sapakutillanmi kay textopi yuyaymanani. Pisi tiempollamantan guerrakunaqa tukuchisqa qanqa, chaymi familianchiskunawan amigonchiskunawan kuska kusisqa kausasunchis”, nispa.
BIBLIAN NIN: “Wañuqniykikunan kausarimunqa […]. ¡Jallp’a sonqopi tiyaqkuna, jatariychis! ¡Q’ochukuychis, kusikuymanta qapariychis!”, nispa (Isaías 26:19).
¿IMAYNATAN YANAPAWANCHIS? Ruanda nacionmanta Marie nin: “Tutsi llaqtayoq runakunata wañuchishaspankun, yaqa llapa familiayta wañuchipurqanku. Ichaqa Bibliaq nisqan jina familiaykunawanqa jujmantan tupasaq, maytan munashani kausarimpuqtinku paykunawan rimayta kusirikuytapas”, nispa.
BIBLIAN NIN: “Pisi tiempomantaqa chinkapullanqan millay runakunaqa […]. Llamp’u sonqokunan ichaqa kay jallp’ata chaskinqaku, chaypin may kusisqa, thaj nisqa tiyapunqaku”, nispa (Salmos 37:10, 11).
¿IMAYNATAN YANAPAWANCHIS?: Tayikistán nacionmanta Dalermi nin: “Guerraña tukupurqan chaypas kashallanmi mana chanin ruwaykuna millay runakunapas. Kay textoq nisqanqa maytan kallpachawarqan. Jehová Diosqa llapantan rikumushan chaymi entienden imayna tarikusqayta. Chaymantapas payqa llapa ñak’arichiykunatan tukuchipunqa, llapa chaykunaqa qonqasqan kapunqa”, nispa.
Kay qelqapi willasqan runakunaqa Jehová Diospa testigonkunan kapunku, paykunaqa Bibliamanta yachasqankuraykun kunanqa thaj kausashanku. Ñaupaqpiqa yaqapaschá wakinninkuqa phiñasqa kaqku runakuna jujniray kasqankumanta, juj nacionniyoq, juj simita rimasqankurayku ima, Bibliata estudiaspan ichaqa cambiapurqanku (Efesios 4:31, 32). Jehová Diospa testigonkunaqa manan mayqen partido politicomanpas sayapakuykuchu, manataqmi ima ch’aqwaykunapipas ni maqanakuykunapipas kaykuchu (Juan 18:36).
Jehová Diospa Testigonkunaqa pachantinpin juj familia jina yanapanakuspa kausayku (Juan 13:35). Ñaupaqpi rimamusqanchis Olexandra hermananchispas guerra kasqanraykun ñañanwan kuska juj nacionman ayqekurqanku. Paymi nin: “Risqayku nacionman chayaqtiykun, hermanokunaqa liston suyashawasqaku chaskiwanankupaq. Paykunaq yanapayninwanmi facilta yachakurqayku chay mosoq kausayniykuman”, nispa.
¿Manachu jamukuwaq juñunakuyniykuman? Chaypin yachanki imatas ruwawaq thajpi kausanaykipaq chayta. Yachallankitaqmi Diospa prometesqan mosoq pachamanta. Maypichus juñukusqaykuta yachanaykipaq jaykuy internetpi jw.org nisqaman. Chaypin mañakuwallaqtaq Bibliamanta juj Testigo yachachinasuykipaq, ¿Munawaqchu wiñaypaq kusisqa kausayta? nisqa qelqawanmi estudiankichis.