Guerra kasqanraykun runakuna llakipi tarikunku
Guerrakuna kaqtinpas ch’aqwaykuna kaqtinpas askha runakunan sinchi llakikuykunapi ñak’ariykunapi tarikunku, wakinqa k’irisqa imaraqmi kashanku. Soldadokunapas guerraq kasqanpi kaq runakunapas chhaynapin tarikushanku.
SOLDADOKUNA
Gran Bretaña nacionmanta Garyn nin: “Sapa ratun imachus pasawananmanta manchasqa kasharqani. Rikurqanin runakunata k’irisqankuta, wakintataq wañuchisqankuta”, nispa.
Colombia nacionmanta Wilmarmi nin: “Wasaypi uyaypi iman bala chayamuwarqan. Guerrapi kaspaqa rikunkin wawakunatapas kuraq runakunatapas wañuchisqankuta, sapa kutillantaq chayta rikunki chayqa manañan manchakunkiñachu”, nispa.
Estados Unidos nacionmanta Zafiran nin: “Manan jayk’aqpas qonqawaqchu ñaupaykipi juj runata wañuchisqankutaqa. Yuyashallankin khuyayta waqasqankuta ñak’arisqankutapas”, nispa.
GUERRAPI TARIKUQ RUNAKUNA
Ucrania nacionmanta Olexandran nin: “Manañachá jayk’aqpas kusisqaqa kausasaqchu nispan nisharqani. Guerraq kasqanpi tiyaspaqa nishutan llakikurqani, manchasqan kasharqani familiayta amigoykunata wañuchinankumanta”, nispa.
Tayikistán nacionmanta Dalermi nin: “Iskay horas pacha illarimuymantapacha yaqa kuska tutakaman mijunakunata qowanankupaq colata ruwaq kani. Chaypi kashaspaqa sinchi manchasqan kasharqani k’iriwanankumanta wañuchiwanankumantapas”, nispa.
Ruanda nacionmanta Marie nin: “Guerrapin papayta mamitayta wañuchipurqanku, jinan sapallay qhepakapurqani, manan piniypas karqanchu yanapariwananpaq”, nispa.
Chay runakuna chhayna llakikunapiña tarikurqanku chaypas paykunaqa thajmi kausashanku. Chaymantapas sut’itan yachanku pisi tiempollamanta guerrakunapas ch’aqwaykunapas chinkapunanta. Chaymantan kay Qhawaq qelqa astawan rimashan.