Jesús jina ganaswan predicasun

1. ¿Imapin jujniray kanchis Jehová Diospa testigonkuna pantasqa religionkunamanta?

JEHOVÁ Diospa testigonkunataqa maytan gustawanchis Diosmanta willaq riyqa ¿riki? Chaypin noqanchisqa jujniray kanchis pantasqa religionkunamanta (Tito 2:14). Ichaqa mayninqa imaymanakunaq pasasqanwanmi ganasninchis pisiyanman. Juj umalliqpas chhaynas mayninqa tarikun. Paymi nin: “Mayninqa manan ganasniy kanchu Diosmanta willaq rinaypaq”, nispa.

2. ¿Imaraykun mayninpi mana ganasninchis kanmanchu Diosmanta willaq rinanchispaq?

² Wakinninchismanqa yaqapaschá predicaq riymantaqa Diospa llaqtanpi juj ruwaykunapi yanapakuy masta gustawanchis. ¿Imarayku? Juñunakuna wasi jatarichiypichus yanapakunchis chayqa kusisqan chayta ruwanchis. Llakipi tarikuq hermanokunata yanapaspapas kusisqan kanchis, hermanonchiskunapas felicitawanchismi chaykunapi yanapakuqtinchisqa. Chaymantapas chay ruwaykunapiqa hermanonchiskunawan kuskataq llank’anchis chayqa thajmi kanchis, may kusisqan llank’anchis. Diosmanta willaq riqtinchismi ichaqa mana chhaynachu mayninqa. Wakinninchisqa yaqapaschá unayña kaq llaqtallapi predicashanchis, manapaschá runakunapas uyarikuyta munawanchisñachu. Wakin runakunaqa yaqapaschá hasta k’amiwanchis qapariwanchis imaraq. Ichaqa yachasqanchis jina, chaykunaqa manan imapasraqchu, Bibliapin willan imaynas runakunaqa astawanraq cheqnikuwasunchis chayta (Mat. 10:22). Chaykuna kasqanraykun mayninqa manaña ganasninchis kanmanchu Diosmanta willaq rinanchispaq. Chhaynaqa, ¿iman yanapawasunman ama pisipaspa kusisqalla Diosmanta willamunanchispaq?

3. ¿Imatan yachasunman Lucas 13:​6-9 textopi Jesuspa willasqan rijch’anachiymanta?

³ Diosmanta kusisqa ganaswan ima willamunanchispaqqa Jesuspa ejemplonmi yanapawasun. Pay kay pachapi kashaspaqa manaña wakin runakuna uyarikuyta munarqankuchu chaypas ganaswanmi yachachiq (leey Lucas 13:​6-9). Imaynachus chay karqan chaymanta rimaspan juj kutin Jesusqa higos sach’ata cuidaq runamanta willarqan. Chay higos sach’ata cuidaq runaqa kinsa watas llank’asqa, ichaqa manas rurusqachu. Chayta willaspaqa pay kikillanmantataqmi rimasharqan. Jesusqa chay higos sach’ata cuidaq runa jinan kinsa wata judiokunaman Diosmanta yachachirqan, ichaqa pisichallan payta qatikurqanku. Chaywanpas Jesusqa higos sach’ata cuidaq runa jinan mana pisiparqanchu. Aswanpas tukuy atisqantan kallpachakurqan ganaswan predicananpaq, paykunaq sonqonman chayananpaq ima.

4. ¿Ima ruwaykunapin Jesusta qatikusunman?

⁴ Jesusqa tukuy atisqantan kallpachakurqan llapa runakunaman Diosmanta yachachinanpaq. Wañupunanpaq soqta killallaña faltashaqtinmi payqa astawanraq kallpachakurqan (Lucas 10:1). Kaypin yachasunchis ima tawa ruwaykunapis pay noqanchispaq allin ejemplo kanman chayta: 1) Jehová Diospa munayninta ruwaymanmi yuyayta churarqan. 2) Profeciakunaq junt’akusqanpin yuyayta churarqan. 3) Jehová Diospa yanapayninpin tukuy sonqo confiarqan. 4) Ganaswanmi yachachirqan, confiarqantaqmi pillapas uyarikunanpi.

DIOSPA MUNAYNIN RUWAYMANMI YUYAYTA CHURARQAN

5. ¿Imaraykun nisunman “Jesusqa Diospa munayninta ruwaymanmi yuyayta churarqan” nispa?

⁵ Nimusqanchis jina Jesusqa ganaswanmi Diospa gobiernonmanta allin willakuykunata willarqan. Payqa yacharqanmi imaynas Diosqa chaytapuni ruwananta munasharqan chayta (Luc. 4:43). Chaymi chay ruwayman tukuy kallpanta yuyayninta ima churarqan. Wañupunanpaq pisillaña kashaqtinpas “llaqtan-llaqtanta, ayllun-aylluntan yachachispa purirqan” (Luc. 13:22). Discipulonkunatapas yachachirqanmi pay jina predicaq rinankupaq (Luc. 10:1).

6. ¿Imakunatan Diospa llaqtanpi ruwakun predicación aparikunanpaq? (Qhaway kay parrafopaq fotokunata).

⁶ Kunanpas Jehová Diospas Jesuspas chay llank’aypi yanapakunanchistan munanku (Mat. 24:14; 28:​19, 20). Chay llank’ay aparikunanpaqmi Diospa llaqtanpiqa imaymanata ruwakushan. Juñunakuna wasikunatan jatarichikushan yachachisqanchis runakuna chaypi noqanchiswan kuska Diosta adoranankupaq. Betelpipas imaymana qelqakunatan ruwakamushan chaywan predicaq rinanchispaq. Llakipi tarikuq hermanokunata yanapaqkunapas tukuy atisqankutan llank’ashanku chay hermanokunata yanapanankupaq. Chhaynapi chay hermanokuna atispaqa Diosmanta willaq lloqsishanallankupaq. Arí, Diospa llaqtanpiqa Diosmanta willay aparikunanpaqmi imaymanata ruwakushan. Chay llank’aymi ima ruwaymantapas aswan importante, chaytaqa manan qonqananchischu. Chayta allinta umanchispi jap’ikusun chayqa, tukuy atisqanchistan ruwasun Diosmanta willaq lloqsinanchispaq. Hungría nacionmanta János umalliqmi nin: “Kaytan allinta umaypi jap’ikuni: Juj ruwaykunapiña Diospa llaqtanpi yanapakuyman chaypas, Diosmantaqa willanaypunin. Chay kamachikuytaqa llapanchismi junt’ananchis”, nispa.

7. ¿Imaraykun Jehová Dios munan runakunaman yachachimushanallanchista? (1 Timoteo 2:​3, 4).

⁷ ¿Iman yanapawasun Diosmanta willamushanallanchispaq? Chaypaqqa Jehová Dios jinan runakunata khuyapayananchis. Jehová Diosqa llapa runakuna paymanta yachanankutan munashan, payman asuykunankuta iman munashan, chhaynapi paykunapas salvakunankupaq (leey 1 Timoteo 2:​3, 4). Chaypaqmi Jehová Diosqa imaymanamanta llaqtanpi yachachiwashanchis. Juj yanapaymi kashan Munakuq kay nisqa folletonchis, chay qelqapin yachachiwanchis runakunawan imayna rimayta, imayna yachachiyta ima. Chayman jina ruwaqtinchisqa yaqapaschá runakunapas bautizakunkuman. Ichaqa manaña kunan bautizakunkumanchu chaypas, yaqapaschá yachachisqanchista yuyarispa manchay ñak’ariy tiempopi Jehová Diosmanta yachayta munankuman. Arí, imachus yachachisqanchistaqa yuyarinqakupunin chay tiempopiqa. Chayraykun kallpachakushanallanchis Diosmanta willaq lloqsinanchispaq.

PROFECIAKUNAPIN YUYAYNIN KARQAN

8. ¿Imata ruwananpaqmi Jesusta yanaparqan profeciakunamanta yachasqan?

⁸ Jesusqa allintan yacharqan imaynatas profeciakuna paypi junt’akusharqan chayta. Yacharqanmi imaynas kinsa wata kuskallan predicanan karqan chaytapas (Dan. 9:​26, 27). Chaymantapas allintan yacharqan jayk’aqsi imaynatas wañunan karqan chaytapas, chaykunaqa ñan qelqasqaña kasharqan (Luc. 18:​31-34). Chaykunata yachaspan payqa mana tiempontaqa usuchirqanchu. Aswanpas tukuy atisqantan ruwarqan runakunaman yachachinanpaq.

9. ¿Imaraykun kay tiempopi astawanraq kallpachakunanchis Diosmanta willamunanchispaq?

⁹ Noqanchispas Bibliapi profeciakuna imaynatachus junt’akushan chayta allinta yachasun chayqa usqhayllan runakunaman willamusunchis. Yachasqanchis jina kay pachaq tukukuyninqa cercapiñan kashan. Bibliaq nisqanman jinapunin imaymana pasashan, runakunapas chaypi nisqanman jinan millayman tukupushanku. Chaymantapas Bibliapi willasqanman jinan, wichay lado reywan uray lado reywan jap’inakushanku. Arí, Reino Unido, Estados Unidos nacionmi Rusia nacionwan yanapaqninkunapiwan atipanakushanku (Dan. 11:40). Chaymantapas kunanqa allintañan yachanchis mayqen nacionsi Daniel 2:​43-45 textopi willasqan jatun estatuaq chakin chayta. Yachasqanchis jina chay nacionqa Reino Unido, Estados Unidos nacionkunan kanku. Llapa chay profeciakunataq junt’akushan chayqa, manan nishuñachu faltan Dios kay pachapi gobiernokunata chinkachinanpaqqa. Chaykunatataq rikushanchis chayqa, astawanraqmi kallpachakunanchis runakunaman Diosmanta willamunanchispaq.

10. ¿Imata ruwananchispaqmi yanapawasun Bibliapi profeciakunaq junt’akusqanpi piensay?

¹⁰ Imaynas jamuq tiempopi kausay kanqa chayta yachaypas yanapawasunmi ganaswan willamunanchispaq. Chaysi República Dominicana nacionmanta Carrie hermananchistapas yanapashan. Paymi nin: “Noqaqa piensanipunin jamuq tiempopi Dios sumaq kausayta qowananchispi. Chaykunapi piensaspan nini: Chaykunataqa juj runakunamanpas willanaymi, paykunapas chaytaqa yachanankun. Jehová Diosqa manan noqallapaqchu chaytaqa prometerqan, nispa”. Bibliapi nisqanman jinaqa, Jehová Diosmi kay llank’aypiqa yanapawashanchis. Chayta yuyariypas yanapawallasunmantaqmi ama pisipaspa Diosmanta willamunanchispaqqa. Chayta yuyariysi Hungría nacionmanta Leila hermananchistapas yanapashan. Paymi nin: “Isaías 11:​6-9 textopi nisqanman jinaqa, Jehová Diosqa pi runatapas yanapanmanmi vidanta cambiananpaq. Chayta yuyariymi yanapawan manaña wakin uyarikuyta munankuchu chaypas llapa runaman Diosmanta willanaypaq”, nispa. Zambia nacionmanta Christopher hermanonchispas ninmi: “Diospa gobiernonmanta allin willakuykunaqa, Marcos 13:10 textopi nisqanman jinan pachantinpi aparikushan. Chaymi noqaqa kusisqa kashani chay llank’aypi yanapakuspay”, nispa. Qantarí, ¿ima profeciakunaq junt’akusqanpi piensaymi yanapasunki Diosmanta ganaswan predicashanallaykipaq?

DIOSPA YANAPAYNINPIN CONFIARQAN

11. ¿Iman Jesusta yanaparqan runakunaman mana pisipaspa yachachishanallanpaq? (Lucas 12:​49, 53).

¹¹ Jesusqa yacharqanmi chay llank’aypiqa Taytan yanapashasqanta, chaymi ganaswan predicarqan. Ichaqa yacharqanmi ganaswanña predicaqtinpas chay willakuykuna jawa ch’aqwa jatarinanta (leey Lucas 12:​49, 53). Arí, chay willakuykunata apasqanraykun wakin umallikuna payta cheqnikurqanku, wañuchiyta iman munarqanku (Juan 8:59; 10:​31, 39). Chaywanpas payqa manan pisiparqanchu, aswanpas yachachishallarqanmi. Payqa allintan yacharqan Papan yanapashasqanta. Chaymi nirqan: “Noqaqa manan sapallaychu kashani, aswanpas kachamuwaqniy janaq pacha Taytan noqawanqa kashan”, nispa (Juan 8:16). Nillarqantaqmi: “Kachamuwaqniyqa noqawanmi kashan, manan sapallaytachu payqa saqerpariwan, imatapas sonqonpaq jinapuni tukuy tiempo ruwasqayrayku”, nispa (Juan 8:29).

12. ¿Imaynatan Jesús discipulonkunata yanaparqan qatikachasqaña kaqtinkupas Diosmanta willashanallankupaq?

¹² Jesusqa discipulonkunatapas yachachirqanmi Jehová Diospa yanapayninpi confianankupaq. Jesusqa allintan yacharqan discipulonkunapas qatikachasqa kanankuta, chaymi askha kutita paykunaman willarqan Jehová Dios paykunata chay llank’aypi yanapananta (Mat. 10:​18-20; Luc. 12:​11, 12). Chaymantapas niranmi allin yuyaywan imatapas ruwanankupaq (Mat. 10:16; Luc. 10:3). Niranmi mana uyarikuyta munaqkunataqa ama obliganankupaqpas (Luc. 10:​10, 11). Chaymantapas niranmi qatikachasqa kaqtinku ayqekunankupaq (Mat. 10:23). Arí, Jesuspunin chhayna karqan, ganaswanña pay predicaq chaypas manan yanqaqa ima mana allinmanpas churakuqchu, allin yuyaywanmi imatapas ruwaq (Juan 11:​53, 54).

13. ¿Imaraykun nisunman “noqanchistapas Jehová Diosmi yanapawashanchis kay llank’ayta junt’ananchispaq” nispa?

¹³ Kay tiempopipas allin willakuykunata apasqanchisraykun runakunaqa cheqnikuwanchis qatikachawanchis ima. Chaymi Jehová Diospa yanapayninta necesitanchis kusisqalla paymanta willamunanchispaq (Apo. 12:17). Jehová Diosqa yanapawasunpunin, chaymantaqa manapunin iskayananchischu. ¿Imarayku? Juan 17 capitulopi willasqanman jina, Jehová Diosqa uyarirqanmi Jesuspa mañakusqanta. Paymi Taytanta mañakurqan qatikuqninkunata cuidananpaq. Jehová Diosqa uyarirqanmi Jesuspa chay mañakusqanta, yanaparqanmi apostolkunata chay llank’ayta aparinankupaq. Chaymantapas Jesusqa mañakullarqantaqmi apostolkunata uyarikuq runakunapaqpas. Noqanchispas paykuna ukhupin kashanchis, chaymi Jehová Diosqa noqanchistapas yanapawashanchis chay llank’ayta kusisqa junt’ananchispaq (Juan 17:​11, 15, 20).

14. ¿Imatan Jehová Dios qowasun kusisqalla paymanta willamunanchispaq? (Qhaway kay parrafopaq fotota).

¹⁴ Ñataq kay pachaq tukukuynin cercapiña kashan chayqa, sasapaschá kanqa Diosmanta kusisqalla willay. Chaywanpas Jesuspa nisqan jina, Jehová Diosqa yanapawasunpunin chay llank’aypiqa (Luc. 21:​12-15). Manaña wakin runakuna Diosmanta uyarikuyta munankuchu chaypas, manan paykunawanqa discutinanchischu. Wakin llaqtapi gobiernokunaqa manan munankuchu hermanonchiskuna Diosmanta willanankuta. Chaywanpas paykunaqa Jehová Diospa yanapayninwami chay llank’ayta aparishanku. Arí, imaynan Jehová Diosqa ñaupaqpi iñiqkunaman atiyta qorqan, chhaynatan noqanchismanpas kallpata allin yuyayta ima qowasun maykamachá munanqa chaykama paymanta willamushanallanchispaq (2 Tim. 4:17). Kayta ama qonqaychu: Jehová Diosqa yanapasunkipunin paymanta ganaswan willamunaykipaq.

GANASWAN KUSISQA IMAN WILLARQAN

15. ¿Imatan Jesús repararqan chay tiempo runakunapi?

¹⁵ Manaña wakin runakuna uyarikuyta munarqankuchu chaypas, Jesusqa yacharqanmi wakinqa sumaqta chaskikunankuta. Chaymi payqa mana pisipaspa Diosmanta willashallarqan. Chaymantapas 30 wata tukuyta jinan Jesusqa repararqan imaynas askha runakuna Diosmanta uyarikuyta munasharqanku chayta. Chayta rikuspan payqa cosechanapaq chajramanta rimarqan (Juan 4:35). Juj wata qhepamanpas discipulonkunatan nirqan: “Cosechanaqa askhapunin kashan”, nispa (Mat. 9:​37, 38). Chay qhepamanpas nillarqantaqmi: “Cosechanaqa askhapunin kashan, llank’aqkunan ichaqa pisilla kanku, chayrayku cosecha oqarichiq dueñota rogakuychis cosechanman llank’aqkunata kachamunanpaq”, nispa (Luc. 10:2). Jesusqa allintan yacharqan imaynas karqanpuni uyarikuyta munaq runakuna chaytaqa, jujllapas uyarikuqtinqa anchatan payqa kusikuq (Luc. 10:21).

16. ¿Imakunamantan Jesús rimarqan discipulonkunata kallpachananpaq? (Lucas 13:​18-21; qhaway kay parrafopaq fotota).

¹⁶ Jesusqa allintan discipulonkunata kallpacharqan Diosmanta ganaswan willanankupaq. Chaypaqmi iskay rijch’anachiymanta willarqan (leey Lucas 13:​18-21). Ñaupaqtaqa Diospa gobiernonmanta rimaspan mostaza mujumanta willarqan. Chay mostaza mujuqa jatun sach’amanmi tukupurqan, chaywanmi willasharqan imaynas askha runakuna Diosmanta uyarikunanku karqan chayta. Chaymantapas Diospa gobiernontaqa levadurawanmi tupanachillarqantaq. Chaywanmi nisharqan imaynas allin willakuykunapas pachantinpi willakunan karqan chayta, imaynas wakin runakunaqa kausayninkuta cambiananku karqan chaytapas. Chay rijch’anachiykunata willaspan Jesusqa discipulonkunata kallpachasharqan ama pisipaspa Diosmanta rimashanallankupaq.

17. ¿Imaraykun mana pisipaspa Diosmanta willamushanallanchis?

¹⁷ Diosmanta willasqanchisqa ancha allinpunin. Allin willakuykunata willasqanchisraykun sapa watan askha runakuna Jesuspa wañusqanta noqanchiswan kuska yuyarinku, askhan Bibliatapas estudiashanku. Manan chayllapaschu, askha runakunañan noqanchiswan kuska Diosmanta willashanku, bautizakushanku ima. Noqanchisqa manan yachanchischu jayk’a runakunaraqsi Diosmanta yachayta munashanku chaytaqa, Jehová Diosllan chaytaqa yachan. Ichaqa askhatañan payqa juñumushan manchay ñak’ariy tiempota kausashaqlla pasanankupaq (Apo. 7:​9, 14). Arí, Jehová Diosllan allinta yachan jayk’a runakunaraqchus salvakuyta atinkuman chaytaqa. Chaymi noqanchisqa mana pisipaspa maskhamushanallanchis chay runakunata.

18. ¿Imatan runakuna reparanqaku kusisqa ganaswan predicaqtinchis?

¹⁸ Jesuspa discipulonkunaqa mana manchakuspan kusisqa ganaswan predicaqku. Chhayna kasqankuta rikuspan juj runakunaqa sut’ita repararqanku paykunaqa “Jesuswan kuska puriq kasqankuta” (Hech. 4:13). Noqanchispas chhaynatan Diosmanta willaq rispaqa kusisqa purinanchis, ganaswanmi willananchis. Chayta rikuspan runakunapas sut’ita reparanqaku noqanchispas Jesusta qatikuqkuna kasqanchista.