Iñiyman jina purisun

1. ¿Imaraykun apóstol Pablo kusisqa kasharqan imakunachus ruwasqanpi piensaspa?

APÓSTOL Pabloqa wañunan patapiñan kasharqan, chaypaqmi sentenciasqaku. Ichaqa imakunachus ruwasqanpi piensaspaqa kusisqan payqa kasharqan. ¿Imarayku? Pay kikinmi nirqan: “Phawamusqay carreratapas tukunaykamañan phawamuni, iñiyman jinataqmi kausashanipas”, nispa (2 Tim. 4:​6-8). Payqa Diosta servisqan tiempopiqa allin yuyaywanpunin imatapas ruwarqan, allintan yacharqan imaynas Jehová Diosqa paywan kusisqa kasharqan chaytapas. Noqanchispas munasunmanmi ima ruwasqanchiswanpas Jehová Dios kusikunanta ¿riki? Chaypaqqa allin yuyaywanmi imatapas ruwananchis. Ichaqa, ¿imaynatan chayta ruwasunman?

2. ¿Iman iñiyman jina puriy?

² Juj kutinmi apóstol Pabloqa paymanta juj iñiqkunamantawan rimashaspa nirqan: “Noqanchisqa manan imachus rikusqanchisman jinachu purinchis, aswanpas iñiyninchisman jinan”, nispa (2 Cor. 5:7). ¿Imaninantan Pablo chaywan nishanman karqan? Bibliapiqa mayninqa puriy nispaqa nishan manan cheqaq “puriymantachu”, aswanpas pipas imayna kausayta apasqanmantan. Chhaynaqa, pipas rikusqanman jinalla puriqmanta rimaspaqa ñawinpa rikusqanman ninrinpa uyarisqanman jinalla imatapas ruwaqmantan rimashan. Iñiyman jina puriqmanta rimaspataq Diospa munayninman jina imatapas ruwaq runamanta rimashan. Chay runaqa imachus ruwasqanwanmi rikuchin tukuy sonqo Diospi confiasqanta, Diospa yuyaychayninta imamantapas aswan allinpaq qhawarisqanta ima (Sal. 119:66; Heb. 11:6).

3. ¿Imaraykun allinpuni kanman iñiyman jina puriy? (2 Corintios 4:18).

³ Arí, mayninqa yaqapaschá imatapas ruwasunchis imachus rikusqanchisman uyarisqanchisman jina. Ichaqa ima jatun decisiontapas ruwasun chaykunaman jinalla chayqa, manapaschá allinchu lloqsiwasunchis. ¿Imarayku? Mayninqa ima willakuypas ima uyarisqanchispas manan cheqaqpunichu. Chaymantapas ñawinchispa rikusqanman jinalla imatapas ruwasun chayqa, yaqapaschá mana piensay Diospa yuyaychayninta qhepaman churasunman (Ecl. 11:9; Mat. 24:​37-39). Ichaqa sichus iñiyman jina purisun, iñiyman jina imatapas ruwasun chayqa, “Señorpa sonqonpaq jinan” chayqa kanqa (Efes. 5:10). Diospa yuyaychasqanman jina kausayqa yanapawasunpunin kusisqa kananchispaq (Sal. 16:​8, 9; Isa. 48:​17, 18). Chaymantapas iñiyman jina purisun chayqa, wiñay kausaytan tarisunchis (leey 2 Corintios 4:18).

4. ¿Imatan ruwananchis iñiyman jinachus purishanchis icha ñawinchispa rikusqanman jinachus chayta reparanapaq?

⁴ ¿Imaynapin yachasunman iñiyman jinachus purishanchis, icha ñawinchispa rikusqanman jinallachus chayta? Chayta yachanapaqqa yaqapaschá tapukusunman: “¿Imakunapin piensani ima decisiontapas ruwanay kashaqtin? ¿Ñawiypa rikusqanman jinallachu chayta ruwani, icha Jehová Diospichu confiani, kamachikuyninkunatachu qhawani?”, nispa. ¿Imaynatan rikuchisunman iñiyman jina purisqanchista llank’anata ajllana kashaqtin? ¿Imaynatan rikuchisunman iñiyman jina purisqanchista casarakuyta munaspa? ¿Imaynatan rikuchisunman iñiyman jina purisqanchista Diospa llaqtanpi ima kamachikuytapas chaskispa? Chay kinsantin tapuykunamantan kaypi allinta yachasunchis. Sapankamanta yachaspan qhawarisunchis imakunapis ñaupaqta piensananchis, chhaynapi allin yuyaywan imatapas ruwananchispaq chayta.

LLANK’ANATA AJLLAKUNA KAQTIN

5. ¿Imapin masta runakuna piensanku ima llank’anamanpas jaykunankupaq?

⁵ ¿Pin mana munanmanchu allin llank’anayoq kayta, qolqenpas familianpaq aypananta? (Ecl. 7:12; 1 Tim. 5:8). Wakin ladokunapiqa allintan pagakunku, llank’aqkuna familiankupi gastankuña chaypas juñunku imaraqmi qolqenkutaqa. Wakin ladokunapin ichaqa pisita pagakunku, ñak’aymi aypakun familiapi gastopaqpas. Chhaynataq chayqa manaraq ima llank’anamanpas jaykushaspaqa yaqapaschá piensasunchis jayk’atas pagawasun chaypi. Ichaqa pipas jayk’atachus gananqa chayllapi piensanqa chayqa, ñawinpa rikusqanman jinallan purishanman.

6. ¿Imaynatan iñiyman jina purisqanchista rikuchisunman llank’anata ajllakuna kashaqtin? (Hebreos 13:5).

⁶ Iñiyman jina purisun chayqa, manan qolqellapichu piensasun. Chay llank’ana yanapawasunchus Diosta servinanchispaq icha manachus chaypi iman piensasun. Chay llank’anapi Diospa cheqnisqan ima ruwaytapas ruwachisunkiku ¿chayri? Juñunakuyman rinaykita predicaq rinaykita ima jark’asunkiman ¿chayri? Familiaykita saqespapas karuta viajanayki kanqa ¿chayri? Chaykunapin piensarinayki (Prov. 6:​16-19; Filip. 1:10). Mayqentapas “chhaynasuna kanman” ninki chayqa, yaqapaschá mana allinchu kanman chay llank’anaman jaykuy. Sasaña llank’anata tariy kanman chaypas cuidakunan chhayna llank’anakunamantaqa. Iñiyman jina purishanchis chayqa tukuy sonqon Jehová Diospi confiasunchis, payqa manan imanchistapas faltachiwasunchu (Mat. 6:33; leey Hebreos 13:5).

7, 8. ¿Imaynatan Sudamérica ladopi juj hermano rikuchirqan iñiyman jina purisqanta? (Qhaway kay parrafopaq fotota).

⁷ Sudamérica nisqa ladopi Javier sutiyoq hermanomanta rimasunchis.a Payqa allintan yacharqan imas iñiyman jina puriy chayta. Paymi nin: “Juj kutinmi allin llank’anata tarirqani, chaypiqa allintan pagapuwananku karqan. May allinpunin noqapaqqa chayqa kasharqan”, nispa. Ichaqa Javierqa precursor kaytas munashasqa. Paymi nillantaq: “Chay llank’anapi jatun umalliqwan rimanaypaqmi niwarqanku. Manaraq rimashaspan ichaqa Jehová Diospa yanapayninta mañakurqani. Munasharqanin llank’anapi ñaupariyta, ichaqa manan munarqanichu imapas Diosta servinayta jark’awanantaqa”, nispa.

⁸ Javiermi nillantaq: “Chay umalliqwan rimashaqtiymi payqa niwarqan: Mayninqa aswan unaychan llank’anapi qhepakunayki kanqa, nispa. Jinan noqaqa respetollawan nirqani: Manan atisaqchu, Diospa llaqtanpin imaymana ruwanay kashan, nispay”, nispa. Chhaynapis Javierqa mana jaykusqachu chay llank’anaman, jinas iskay semana qhepamanqa precursor kapusqa. Tiempowansi ichaqa chay watallapitaq payqa kuskan p’unchay llank’anata tarikusqa. Paymi nillantaq: “Jehová Diosqa uyariwanpunin imachus mañakusqayta. Paypa yanapayninwanmi precursor kanaypaq jina llank’anata tarikurqani, kusisqan kashani kay llank’anaywan. Kanmi tiempoy Diosta servinaypaq hermanokunatapas yanapanaypaq”, nispa.

9. ¿Imatan yachasunman Trésor sutiyoq hermanoq imachus willakusqanmanta?

⁹ Ichaqa juj llank’anapiña kashasunman, chay llank’anataq mana allinchu kanman iñiyman jina purinapaq ¿chayri? ¿Imatan ruwasunman? Chaypaq yachasun Trésor sutiyoq hermanomanta, payqa Congo ladomantan. Paymi nin: “Noqaqa allin llank’anamanmi jaykurqani, chaytapunin munasharqani. Ñaupaqpi ganasqaymantaqa kinsa kuti mastaraqmi ganasharqani, jujkunapas respetawaqkun chaypiqa”, nispa. Ichaqa payqa sapa kutillansi juñunakuykunaman faltakuq, llank’anan horamantapas mastas mayninqa llank’aq. Empresapipas mayninqa mana allinkunatas ruwaqku, chayta pakananpaq imas mat’ipayaqku. Payqa lloqsipuytas munashasqa chay llank’anamanta, ichaqa, “¿imawantaq kasaqri?”, nispas niq. ¿Iman payta yanapanman karqan? Paymi nillantaq: “Habacuc 3:​17-19 textoq nisqanmi allinta yanapawarqan. Chaypi nisqanman jinaqa mana llank’anayoqña qhepakuwaq chaypas, manan Jehová Diosqa saqesunkimanchu, chaypin allinta piensarqani. Chaymi lloqsipurqani chay llank’anamanta”, nispa. Paymi nillantaq: “Wakin jefekunaqa piensanku askhata qolqeta ganaspa, Diosman qonanchis familianchisman qonanchis tiempotapas llank’anaman qonanchispaqmi. Noqaqa kusisqan kashani llank’anamantaqa Jehová Diosta familiaytawan ajllakusqaymanta. Juj wata qhepamanqa Jehová Diospa yanapayninwanmi juj llank’anata tarikurqani. Chay llank’anaqa yanapawanmi familiayta allinta uywanaypaq, Diosllata servinaypaqpas. Jehová Diosta ñaupaqman churasun chayqa, mayninqa manapaschá nishuchu imanchispas ni qolqenchispas kanqa, ichaqa payqa cuidawasunpunin”, nispa. Chayqa chhaynapunin. Sichus Jehová Diospa yuyaychasqanman jina imatapas ruwasun, confiasuntaq promesanpipas, iñiyman jinataq purisunpas chayqa payqa bendeciwasunpunin.

CASARAKUYTA MUNASPA

10. ¿Imaynatan pipas ñawinpa rikusqanwan apachikushanman casarakuyta munaspa?

¹⁰ Casado kausayqa Jehová Diospa regalonmi. Chhaynaqa pipas casarakuyta munashan chayqa manan imananpaschu. Ichaqa mayqen hermanapas pitapas casarakunanpaq qhawashan chayqa, yaqapaschá piensanqa imayna runachus, imayna rijch’ayniyoqchus, imayna qhawarisqachus, imayna llank’anayoqchus, familianpi imaynas kashan, imaynapunis chay hermano chaykunapi.b Chaykunapi piensay allinña chaypas, sichus chayllapi chay hermana yuyayta churanman chayqa ñawinpa rikusqallanwanmi apachikushanman.

11. ¿Imaynatan casarakuyta munaq rikuchinman iñiyman jina purisqanta? (1 Corintios 7:39).

¹¹ Mayqen hermanopas hermanapas casarakuyta munashan chayqa, Bibliapi yuyaychaykunaman jinataq chayta ruwanqa chayqa Jehová Diospa sonqontan kusichinqa. Bibliapi jujnin yuyaychaypa nisqanman jinaqa, casarakunapaqqa manan nishu waynallaraqchu kana (1 Cor. 7:36). Chaymantapas Bibliapi nisqanman jinaqa, casarakunapaqqa Diospa munayninman jinan warmitapas qharitapas ajllakuna (Prov. 31:​10-13, 26-28; Efes. 5:33; 1 Tim. 5:8). Chaymantapas mayqen Testigopas casarakuyta munashan chayqa, “Señorpi iñiqllawanmi” casarakunan (leey 1 Corintios 7:39). Casarakuyta munaq chaykunapi nisqanta kasukunqa chayqa iñiyman jina purisqantan rikuchinqa, Jehová Diospi confiasqanta iman rikuchinqa (Sal. 55:22).

12. ¿Imatan yachasunman hermana Rosawan imachus pasasqanmanta?

¹² Hermananchis Rosamanta yachasun, payqa Colombia nacionmantan. Llank’ananpis payta juj runa rimapayayta qallarisqa, ichaqa manas Testigochu chay runaqa kasqa. Chay hermananchismanpas gustasqas chay runaqa, paymi nin: “Qhawaynapaqqa allin runan payqa karqan, llaqtamasinkunatapas munaytan yanapaq, allintan cuidakuqpas. Respetowanmi noqatapas qhawariwaq, “payqa allin qosachá kanman” niqmi kani. Ichaqa manan Testigochu karqan”, nispa. Kay hermananchismi nillantaq: “Noqapaqqa may sasan karqan payta “manan” niyqa. Sonqoypiqa munasharqanin paywan kayta. Chaymantapas chay tiempopiqa casarakuytan munasharqani, manataqmi Diospa llaqtanpiqa pitapas tarisharqanichu”, nispa. Chaywanpas Rosaqa manas ñawinpa rikusqallanpichu piensasqa. Aswanpas imaynatas Jehová Dios chayta qhawarinman chaypi imas piensasqa. Chhaynapis chay runawanqa manaña imaynamantapas rimasqañachu. Aswanpas Diospa munaynin ruwaymansi astawan yuyayninta churasqa, chay qhepallamansi Diospa gobiernonmanta willaqkunapaq escuelaman invitasqaku. Kunanqa precursor especialmi payqa kapun. Paymi nillantaq: “Jehová Diosqa may jatun kusikuytan qowarqan”, nispa. Arí, mayninqa pipas chhaynapi tarikunqa chayqa, manapaschá paypaqqa facilchu kanqa iñiyman jina puriyqa. Ichaqa sichus kallpachakunqa chayqa jatun kusikuytan tarinqa.

DIOSPA LLAQTANPI IMA KAMACHIKUYTAPAS CHASKISPA

13. ¿Imaynatan pipas Diospa llaqtanpi ima kamachikuytapas chaskispa ñawinpa rikusqanman jina rikuchishanman?

¹³ Diospa llaqtanpiqa chayamushallanmi ima kamachikuypas, chhaynapi Jehová Diosta aswan allinta servinanchispaq. Chay kamachikuytaqa yaqapaschá chayachimuwasunman umalliqkuna, watukuq umalliq, umalliq t’aqa ima. Ichaqa mayninqa yaqapaschá mana entiendesunchu imaraykus chaykunata chayachimuwashanchis chayta. Chhaynapi tarikuspa, ¿imatan ruwasunchis? ¿“Kay kamachikuyqa manasuná kay llaqtapaq jinachu kashan” nispachu chayllamanña yuyayta churasunchis? ¿Chay kamachikuykunata apachimuq hermanokunapichu piensayta qallarisunchis? ¿Paykunaqa “manamá allintachu reqsinku” nispachu nisunchis?

14. Diospa llaqtanpi ima kamachikuytapas chaskikusun chayqa, ¿iman yanapawasunman iñiyman jina purinanchispaq? (Hebreos 13:17).

¹⁴ Iñiyman jina purisun chayqa tukuy sonqon Jehová Diospi confiasunchis. Confiasunmi imaynas payqa llapata rikumushan chaypi, chay confiasqanchistataq rikuchisunchis ima kamachikuytapas apuray kasukuspa, ganaswan ruwaspa ima (leey Hebreos 13:17). Kasukuq kasun chayqa, iñiqkuna juj sonqolla kanankupaqmi yanapakusunchis (Efes. 4:​2, 3). Chay kamachikuykunata apachimuq hermanokuna noqanchis jina runalla kanku chaypas, Jehová Diosqa bendeciwasunmi sichus kasukusun chayqa (1 Sam. 15:22). Imatapas pay mana allinpaqchu qhawarishan chayqa, tiempollanpin payqa chayta allichanqa (Miq. 7:7).

15, 16. ¿Iman Kevinta yanaparqan iñiyman jina purinanpaq? (Qhaway kay parrafopaq fotota).

¹⁵ Iñiyman jina puriyqa ancha allinpunin. Chaypaq yachasunchis juj hermanomanta, kayqa pasasqa Perú nacionpin. Perú nacionpiqa español simitan mastaqa rimanku, chaywanpas kanmi juj simi rimaqkunapas. Chay simikunamanta jujninmi kashan quechua. Quechua iñiq t’aqapi hermanokunaqa quechua rimaqkunatan ñaupaqpiqa maskhaqku, unayñan chayqa chhaynata ruwakusharqan. Ichaqa leykunaq nisqanman jinan chaytaqa cambiakurqan (Rom. 13:1). Chaymi wakinqa tapukurqanku: “¿Kunanrí, imaynatataq quechua rimaqkunatari tarisunchis?”, nispa. Ichaqa chay hermanokunaqa kasukusqakus chay kamachikuyta. Chhaynapis reparasqaku imaynas Jehová Diosqa paykunaq kallpachakusqankuta bendecirqan chayta.

¹⁶ Chay tapukuqkunamanta jujninmi kasqa Kevin, payqa juj quechua iñiq t’aqamanta jujnin umalliqmi. Paymi nin: “¿Imaynatataq quechua rimaqkunatari tarisunchis, manasuna kayqa allinchu kanqa?”, nispan nisharqani. ¿Imatan pay ruwanman karqan? Paymi nillantaq: “Proverbios 3:5 textoq imachus nisqanpin piensarqani. Chaymantapas Moisespa ejemplonpi iman piensarqani. Pay Israel runakunata Egiptomanta orqoshaqtinqa puka lamar qochaman rinankupaqmi Jehová Diosqa kamachirqan. Chayman rispaqa Egipto runakunaq makinmanpas churakushankuman jinan karqan. Chaywanpas Moisesqa kasukullarqanmi, Jehová Diosqa juj jatun milagrotan chaypi ruwarqan”, nispa (Éx. 14:​1, 2, 9-11, 21, 22). Chaykunapi piensaspas Kevinqa kasukullasqa chay kamachikuyta. ¿Allinchu kanman karqan chay ruwasqan? Paymi nillantaq: “Mana piensay atiyraqmi karqan Jehová Diospa imachus ruwasqanqa. Ñaupaqqa karutan puriq kayku predicanaykupaq. Jujta iskayta imallan chaypiqa tariq kayku quechua rimaqtapas. Kunanmi ichaqa maypichá askha kashanku quechua rimaqkuna chay rectollaña riyku. Chaypiqa askha runakunawanmi rimayku, Bibliamantapas askhamanmi yachachishayku. Wakin runakunapas rishankuñan juñunakuykunamanqa”, nispa. Rikusqanchis jina iñiyman jina purisun chayqa, Jehová Diosqa bendecinqapunin imachus ruwasqanchista.

17. ¿Imaynatan yanapasunkiman kaypi yachasqayki?

¹⁷ Kaypin yacharqanchis ima kinsa ruwaykunapis iñiyman jina purinanchis chayta. Ichaqa manan chayllachu, imaymanapin rikuchinanchis iñiyman jina purisqanchistaqa. Kusirikuspapas iñiyman jinapunin ruwananchis. Wawakunatapas iñiyman jinan educananchis, iñiyman jinan uywananchis paykunataqa. Arí, imaña ruwananchis kaqtinpas Jehová Diospin ñaupaqtaqa piensananchis, paypa yuyaychaynintan maskhananchis, confiananchistaqmi promesanpipas. Chaymantapas manan imachus rikusqallanchispichu yuyayninchista churananchis. Chaykunata ruwasun chayqa, “Jehová Diosninchispa sutinpin wiñay-wiñaypaq purisunchis” (Miq. 4:5).