VIDANMANTA WILLAKUN
“Kay maqanakuytaqa Jehová Diosmi atipanqa”
2010 WATAPIN 28 p’unchay enero killapi, Estrasburgo llaqtapi Francia nacionpi kasharqani. Chay p’unchayqa sinchitan chirisharqan. Chay llaqta munayña karqan chaypas chaytaqa manan llaqtata reqsiqchu rirqani, aswanpas juj hermanokunapiwanmi Tribunal Europeo de Derechos Humanos nisqata rirqayku, Francia nacionpi hermanokunaq derechonta valechiq. Ichaqa, ¿iman pasashanman karqan Francia nacionpi? Gobiernon hermanokunamanta mañashasqa 89 millones dolaresta. “Impuestotan paganaykichis” nispan chhaynaniraq qolqeta mañashasqa. Ichaqa noqaykuqa aswan llakisqaqa kasharqayku Diospa sutinmantan, manan qolqemantachu. Paypa sutintan runakuna qhellichayta munasharqanku, hermanokunaq libre predicasqanpas peligropi jinan kasharqan. Ichaqa chaypi imachus pasasqanmi allinta rikuchiwarqanku imaynas kay maqanakuytaqa Jehová Dios aparishan chayta (1 Sam. 17:47). Juj chhikantawan willarisaykichis chaypi imachus pasarqan chayta.
Chay problemaqa qallarirqan 1990 watakuna tukushaqtinmi. Chay tiempopin Francia nacionmanta gobiernoqa Franciapi sucursalta nisqa 1993 watamanta hasta 1996 watakama donacionkuna chaskisqanmanta impuestota paganankupaq. Chay problematan aparqayku chay nacionpi tribunalkunaman, ichaqa llapankun gobiernoq favorninpi decisionta orqomurqanku. Jujmantan apelación nisqata ruwarqayku, chaywanpas manapunin atirqaykuchu. Jinan gobiernoqa sucursalpa cuentanmanta 6 millones 300 mil dolaresta jap’ikapurqan. Manañan mayman riyta atisharqaykuchu. Tribunal Europeo de Derechos Humanos nisqallamanñan rinayku faltasharqan. Jinan chayman aparqayku chay juiciota, ichaqa chaypi juezkunaqa manaraq ima decisiontapas ruwashaspan niwarqanku gobiernoq partenmanta abogadokunawan noqayku partemanta abogadokunawan ñaupaqta rimanakunaykupaq. Chay rimanakuytaqa aparinayku karqan paykunaq churasqanku autoridadkunaq ñaupanpin. Chay problemata chaypi allichapunaykutan munasharqanku.
Noqaykuqa ñan nisharqaykuña: “Chaypi autoridadqa wakillantapas gobiernoman pagapuychis niwasunchischá”, nispa. Ichaqa noqaykuqa allintan yacharqayku hermanokunaq contribución churasqankuqa: Manan juj dolarpas gobiernopaqchu karqan, aswanpas Jehová Diospaqmi chayqa karqan, paypa gobiernonta apoyanapaq (Mat. 22:21). Chhaynaqa, paykunaman juj dolarpas qoyqa Bibliaq contranpin kashanman karqan. Chaywanpas chay Tribunal Europeo nisqata respetaspan rillarqayku gobiernoq abogadonkunawan rimaq.
2010 watapi Tribunal Europeo de Derechos Humanos nisqa punkupi sayashayku Asuntos Legales nisqamanta wakin hermanokunapiwan.
Chay juñukuytaqa Tribunal Europeo nisqapi juj munay salapin aparirqayku. Chaypi autoridadqa imatachus piensasharqayku chayman jinan niwarqanku: “¿Manachu Jehová Diospa testigonkuna wakillantapas Francia gobiernoman impuestota pagankuman?” nispan niwarqanku. Qonqayllan noqaykuqa juj tapuypi piensarqayku. Paytan nirqayku: “¿Manachu personayki yachanki gobierno 4 millones más eurostaña bancopi cuentaykumanta orqopusqanta?”, nispa.
Chayta uyarispan chaypi autoridadpa uyanqa jujman cambiapurqan. Manan yachasqachu gobierno chay ruwasqanta. Gobiernoq partenmanta abogadokuna “chhaynan” niqtinkun astawanraq payqa phiñakurqan. Atenciontan wajarqan paykunata, jinaspa chayllapi tukuchipurqan chay juñunakuyta. Noqaqa ¡may admirasqan chay ratuqa kasharqani, qonqayllan Jehová Diosqa tukuy imata favorniykuman cambiapurqan! ¡Chay juñukuymantaqa may contenton, may kusisqan lloqsimurqayku! Mana creey atiypunin kasharqan llapa imachus pasasqanqa.
2011 wata 30 p’unchay junio killapin chay Tribunal Europeo nisqa sentenciata orqomurqan. Chaypi kaq llapa juezkunan favorninchispi kasharqanku. Francia gobiernotan nirqanku Testigokunamanta ama ima impuestotapas cobrananpaq, chaskisqan qolqetapas llapanta kutichipunanpaq, wachayninta ima kutichipunanpaq. Chay sentencia lloqsimusqanqa kunan tiempokaman Franciapi hermanokunataqa yanapashan. Chay mana piensay tapusqayku tapuyllan Goliatpa umanman jaykusqan rumi jina chay juiciopi ganachiwarqanku. Ichaqa, ¿imaraykun chayllawan ganaykuman karqan? David Goliat-ta nisqan jina, “kay maqanakuytaqa Jehová Diosmi aparishan” (1 Sam. 17:45-47).
Manan chayllachu kashan juiciokuna ganasqaykuqa, maytaña jark’akuwanchis religionpi umalliqkuna, político runakuna, chhayna atiyniyoq runakuna chaypas 1.225 chhayna juiciokunan ganasqaykuqa kashan. Chaykunataqa 70 nacionkunapi jatun tribunalkunapin ganarqayku. Wakintaqa askha nacionkunata representaq tribunalkunapin ganarqayku. Chay juiciokunata ganakusqanraykun Jehová Diostaqa libre servishanchis, libren predicashanchispas. Manataqmi obligasqachu kanchis yawarta churachikunanchispaq, banderata napaykunanchispaq, ni himno nacionalta takinanchispaqpas.
Ichaqa yaqapaschá nishankichis: “¿Imaynapitaq Estados Unidos nacionpi Nueva York llaqtapi kashaspari Europa ladopiraq chaykunata aparirqan?”, nispa. Chayta kunan willarisaykichis.
MISIONEROKUNA UYWAWANKU
Papaypa sutinmi George, mamitaypa sutintaq Lucille. Paykunaqa Galaad Escuelamanmi jaykusqaku clase 12 nisqaman. Noqaqa 1956 watapin nacerqani, chay watapaqqa Etiopía nacionpin papaywan mamitaywanqa servishasqaku. Paykunaqa Philip nispan sutichawasqaku. Chay sutitaqa Diosmanta willaq Felipeq sutinmantas churawasqaku (Hech. 21:8). Chay wata qhepallamanmi gobierno prohibirqan predicacionta. Chay tiempokunapi juch’uyllaraq kasharqani chaypas yuyashanin imaynas familiayqa paka-pakallapi juñukuq predicaciontapas apariq chayta. Noqaqa kusisqan kaq kani paykunawan purispay. Ichaqa 1960 watapin niwarqanku chay nacionmanta ripunaykupaq.
1959 watapi Nathan Knorr hermanopiwan kashayku. Payqa lloq’e ladopi kashan. Paymi Etiopía nacionpi Adís Abeba llaqtapi kashaqtiyku visitamuwasqaku.
Noqaykuqa Estados Unidospi Kansas ladopi Wichita llaqtatan ripurqayku. Papaywan mamitaypiwanqa tukuy sonqon predicaqku, manapunin misionero kasqankutaqa qonqaqkuchu, ganaswanmi gustowanmi Diosta serviqku. Chhayna kanaykupaqmi kuraq hermanay Judytapas noqatapas sullk’a hermanoy Leslietapas yanapawarqanku. Paykunapas Etiopía nacionpin nacerqanku. Noqaqa 13 wataypi kashaspan bautizakurqani, kinsa wata qhepamantaq Perú nacionpi Arequipa llaqtaman ripurqayku. Chaypin maypichus predicaqkuna faltasharqan chaypi yanapakurqayku.
1974 watapin 18 wataypi kashaqtiy noqata juj tawa hermanokunatawan Perú sucursal nombrawarqanku precursor especial kanaykupaq. Chay Perú nacionpi orqo-orqo wichaykunapi kaq llaqtakunata predicanaykupaqmi kachawarqanku, chaykunapiqa manaraqmi predicakusqachu. Chaypiqa quechua rimaqkunaman aymara rimaqkunaman iman chayarqayku. Purisqayku carroqa karqan cuadradon, chaypin puñuqpas kayku, chaytan suticharqayku “arca” nispa. Chay llaqtakunapi runakunamanmi Bibliawanpuni rikuchirqayku imaynas Jehová Diosqa wajcha kayta, onqoykunata, wañuyta ima chinkachipunqa chayta (Apo. 21:3, 4). Paykunamanta wakinqa sumaqtan chaskikurqanku Diospa gobiernonmanta chay willakuykunata.
1974, arca nisqa carro.
OFICINA CENTRAL NISQAMAN INVITAWANKU
1977 watapin Albert Schroeder Perú nacionta watukuq jamusqa. Payqa umalliq t’aqamanta jujninmi kasqa. Paymi niwarqan Oficina Central nisqapi yanapakunaypaq solicitudta junt’anaypaq. Paypa niwasqanman jinan ruwarqani, jinan manaraq unaymanta chay watallapitaq 17 p’unchay junio killapi Brooklyn llaqtapi kaq Betelpi llank’ayta qallarirqani. Chay p’unchaymantapachan tawa wata limpieza nisqapi mantenimiento nisqapi ima llank’arqani.
1979 watapi casarakusqayku p’unchaypi.
1978 watapin juj asambleapi reqsirqani juj hermanata. Paypa sutinmi Elizabeth Avallone, payqa Luisiana ladopi Nueva Orleans llaqtamantan kasqa. Paypa papanpas mamitanpas Diosta serviqkunan kasqaku. Elizabethqa tawa watañan precursora regular kashasqa, chaymantapas tukuy tiemponwanmi Jehová Diosta serviyta munashasqa. Paywanqa rimallaqmi kayku, chhaynapin pisi-pisimanta astawan reqsinakurqayku. Jinaspa 1979 watapi 20 octubre killapi casarakurqayku, jinaspa paywan kuska Betelpi kuska serviyta qallarirqayku.
Casarasqa jinaqa ñaupaqtaqa Brooklyn llaqtapi kaq español congregacionpin karqayku. Chaypi hermanokunaqa may munakuqmi kaqku. Chaymantaqa juj congregacionkunapi iman karqayku, llapanpiqa kinsan karqan. Chaypi hermanokunapas may sumaq sonqon kaqku, kallpachawaqkun Betelpi llank’ashanallaykupaq. ¡Maytan gracias niyku paykunatapas juj amigokunatapas, familiakunatapas papayku mamitayku kuraqyapuqtin yanapawasqankumanta!
1986 watapi Brooklyn llaqtapi kashanku wakin hermanokuna español congregacionpi.
LEYKUNAMANTA YACHASQAY
1982 watapin enero killapi niwarqanku Betelpi kaq Departamento de Asuntos Legales nisqapi yanapakunaypaq. Kinsa wata qhepamantaq niwarqanku universidadpi estudianaypaq, abogado kanaypaq. Chay tiempopiqa hermanokuna juiciokunapi ganasqankumantan yachallarqanitaq. Paykunaq yanapasqankuwanmi Diospa llaqtanqa leykunaq nisqanman jina allin sayachisqa karqan. Estados Unidospi juj nacionkunapi iman chhayna karqan, chaykunamanta yachayqa maytan gustawaq. Clasespi kashaspaqa askha horakunan chaytaqa estudiaq kayku.
1986 watapin 30 wataypi kashaqtiy nombrawarqanku Departamento de Asuntos Legales nisqapi umalliq kanaypaq. Noqapaqqa may jatun ruwaymi chayqa karqan. Waynallaraq kasharqani chaypas noqapin confiarqanku. Maynin ratukunaqa mana atinaypaq sasapaq jinan chayta qhawarirqani.
1988 watapin abogado tituloyta orqorqani. Noqaqa manan reparakusqanichu chay estudio iñiyniypi pisiyachiwasqanta. Universidadpi estudiayqa mayninqa ambicioso runaman creekuq runaman iman tukuchisunki. Imachus yachasqaykiwanmi mayninqa jujkunatapas pisipaq jina qhawaripuwaq. Chaypiqa Elizabethmi yanapawarqan. Paypa yanapayninwanmi pisi-pisimanta jujmanta astawan Diosta serviyta qallaripurqayku. Kaytaqa experienciawanmi niyman: Manan yachayllatachu umanchisman junt’achinanchis. Imamantapas aswan allinqa Dioswan amigontin kaymi, paypa kamachinkunata munakuymi.
DIOSMANTA WILLAKUYTA ALLINTA SAYACHIYKU
Titulota orqomusqay qhepamanqa tukuy kallpawanmi llank’arqani Betelpaq, Diospa gobiernonmanta willakuyta tribunalkunapi defiendenaypaq ima. Chaypiqa noqaqa kusisqan llank’aq kani, ichaqa mayninqa apurayllan imapas cambiapuq. Chay cambiokunamanta jujninmi kashan 1990 watapi imachus pasasqan. Chay watapin Departamento de Asuntos Legales nisqapi niwarqanku juj documentota preparanaykupaq. Chaypi nisqanman jinaqa, manañan ima qolqetapas mañakunanchu karqan qelqakunamantaqa. Chaymantapachaqa hermanokunaqa gratisllañan ima qelqatapas munachiqku. Chaywanqa imaymana ruwaykunan Betelpiqa pisiyapurqan, kaq iñiq t’aqapipas. Chaymantapas gobiernokunaqa manañan ima impuestotapas mañakuqkuchu. Wakinqa manchasqan kasharqanku chay cambiota ruwakusqanwanqa, “manachá qolqe kanqachu qelqakuna lloqsimunanpaqqa” nisharqankun. Ichaqa manan chhaynachu karqan. Chay 1990 watamantapacha hasta kunankamaqa aswan askharaqmi Diosmanta willaq qelqakunaqa lloqsimushanpas. Kaykaman kayta allinta reparani: Jehová Diospa munayninman jina ima cambiopas ruwakun chayqa allillanmi imapas lloqsin, paymi espiritunwan “allin yuyayniyoq junt’aq kamachita” pusarishan (Éx. 15:2; Mat. 24:45).
Chay juiciokunataqa mastaqa ganakun manan abogadokuna allin yachayniyoq kasqankuraykuchu. Aswanpas hermanokuna allin kausayta apasqankuraykun. Chaypaq willasaykichis juj kuti imachus pasarqan chayta. 1998 watapin umalliq t’aqamanta kinsa hermanokuna sapankanku esposankuwan kuska rirqanku Cuba nacionpi aparikusqan asambleaman. Paykuna llamp’u sonqo respetoyoq kasqankuta rikuspan autoridadkunaqa allinpaq qhawarirqanku politicaman mana chhaqrukusqanchista. Chay autoridadkunawan askha kutita rimasqaykumantaqa chay hermanokunaq ejemplonmi yanapawarqanku.
Chaywanpas mayninpiqa juiciomanmi rina Diosmanta allin willakuykunata qaqata sayachinapaqqa (Filip. 1:7). Chaypaq willasaykichis Europa ladopi Corea del Sur nisqapipas imachus pasasqanta. Chay ladokunapi hermanokunaqa obligasqan kasharqanku ejercitoman rinankupaq. Manataq paykunapaq jujniray ruwaykuna karqanchu chayqa, carcelmanmi jaykuqkuna ejercitoman mana risqankumanta. Europa ladopiqa 18.000 hermanokunan carcelman jaykurqanku, Corea del Sur nisqapitaq 19.000 hermanokuna.
Ichaqa 2011 watapi 7 p’unchay julio killapin Tribunal Europeo de Derechos Humanos nisqamanta juezkuna hermanonchis Bayatyanpa favorninpi churakurqanku, jinaspa Armenia nación contra sentenciata willarqanku. Chay kutipin Tribunal Europeo nisqamanta juezkunaqa Europa ladopi llapa nacionkunata kamachirqan ejercitoman mana riyta munaqkunaman juj llank’anata qonankupaq. Tribunal Constitucional de Corea del Sur nisqamanta autoridadkunapas 2018 watapi 28 p’unchay junio killapin yaqa kaqllata kamachikuyta orqomullarqankutaq. Chhayna kamachikuykunaqa lloqsimurqan wayna-sipas hermanonchiskuna iñiyninkupi qaqata sayasqankuraykun.
Departamento de Asuntos Legales nisqaqa manan Oficina Central nisqallapichu kashan, kashanmi sucursalkunapipas. Paykunaqa tukuy atisqankutan llank’ashanku Diospa gobiernonmanta willakuy allillan aparikunanpaq. ¡Noqapaqqa may kusikuymi autoridadkunaq jark’asqan hermanokunata yanapayqa! Juj juiciota ganakunmanña manaña chaypas, chaypi autoridadkunaqa gobernantekunapas allintan yachanku pipunis Jehová Dios chayta (Mat. 10:18). Juezkunapas, autoridadkunapas, noticiata willaqkunapas, llapa runakunapas, munay mana munaymi documentokunapi churasqanchis Bibliamanta textokunata leenku; juiciokunapi rimasqaykutapas uyarinkun. Allin sonqoyoq runakunaqa allintan reparanku imaynas imapi creesqanchispas Bibliaman jina kashan chayta, wakinqa estudiayta iman qallarinku.
¡JEHOVÁ DIOSPAQ GRACIAS KACHUN!
40 watañan llank’ashani Asuntos Legales nisqapi. Chay tiempopiqa askha sucursalkunatan yanaparqani, askha tribunalkunatan rirqaykupas. Askha jatun autoridadkunawan iman rimarqayku. ¡Maytan valorani Oficina Central nisqapi kaq Departamento de Asuntos Legales nisqapi llank’aq hermanokunata! Paykunaqa ganaswanmi llank’anku. Kunankamaqa imaymana bendiciontañan Jehová Diosqa qowashan. ¡Maytan chaymanta gracias nini!
Elizabethwanqa 45 watañan kuska kashayku. Payqa allinpipas mana allinpipas yanapawashallanpunin. Payqa sinchi onqosqaña kashan chaypas, pisiña kallpan kashan chaypas yanapawashallanpunin. ¡Maytan chaymanta gracias nini payta!
Kaytan allinta yachani: Manan qanpaq yachaynillaykiwanqa imapas allintaqa ruwakunmanchu, aswanpas Jehová Diosllawanpunin. Davidpa nisqan jina, “Jehová Diosmi llaqtanpa kallpanqa” (Sal. 28:8). Chhaynaqa, kay maqanakuytaqa Jehová Diosmi aparishan, manan runachu.