¿Imatawanmi yachasunman ñaupaqpi yachasqanchis cheqaq yachachikuykunamanta?

1. ¿Imaynan kasharqanki Bibliapi cheqaq yachachikuykunata chayllaraq yachaspa?

¿IMAKUNATAN Bibliata chayllaraq estudiashaspa yacharanki? Yacharankichá kamaqninchispa sutinqa Jehová kasqanta, chayta yachaspachá paymanqa asuykuyta qallarirqanki (Isa. 42:8). Chaymantapas yacharqankichá wañusqakunaqa mana maypipas sufrishasqankuta, aswanpas puñusqa jinalla kashasqankuta. Chayta yachaspaqa manañachá wañupuq familiaykimantaqa llakikurqankiñachu (Ecl. 9:10). Chaymantapas yacharqankichá jamuq tiempoman Jehová Dios juj sumaq paraisota qowananchista, chaypi wiñaypaq kausananchistapas. Chaykunata yachaspapas maytachá kusikurqanki, manañachá machuyapunaykimantapas payayapunaykimantapas llakikurqankiñachu (Sal. 37:29; 90:10).

2. ¿Imaraykun Apóstol Pedro iñiqkunata nirqan qallariypi imachus yachasqankuta ama qonqanankupaq? (2 Pedro 1:​12, 13).

² Unayña Jehová Diospa llaqtanpi kashanchis chaypas, ñaupaqkunapi Bibliapi yachasqanchistaqa valorananchismi. Apóstol Pedropas iskay kaq carta apachisqanpin unayña Diosta serviqkunata nirqan “qallariypi imakunachus yachasqankuta ama qonqanankupaq” (leey 2 Pedro 1:​12, 13). ¿Imaraykun chayta ninman karqan? Chay tiempopiqa iñiq t’aqapin rijurirqan pantasqa profetakuna, mana allin umalliqkuna ima. Chay runakunamanta cuidakunankupaqmi chayta yuyarichirqan, chhaynapi Jehová Diosmanta ama t’aqakunankupaq (2 Ped. 2:​1-3).

3. ¿Imaraykun chayllaraq Bibliata estudiasqanchis yachachikuykunapi yuyaymanashanallanchis?

³ Allintaña iñiyninchispi wiñarishanchis chaypas qallariypi Bibliapi imachus yachasqanchismantaqa imaymanatawanmi yachasunman. Chaypaq mijuna wayk’uyta yachaq runapi, chayllaraq mijuna wayk’uyta yachashaq runapiwan piensasun. Paykunaqa ima mijunatapas wayk’unankupaqqa yaqapaschá kaq cosaskunallata kaq mijuykunallata utilizanqaku chayta wayk’unankupaqqa. Ichaqa allin experienciayoq wayk’uq runaqa chay mijuykunawanqa juj mijunatawanmi wayk’uyta atinman. Chhaynallataqmi Dios serviyninchispipas, qallariypi yachachikuykunataqa llapanchismi yachanchis. Ichaqa chaykunaqa juj ruwaykunapipas yanapawasunmanmi unayña Jehová Diosta servishanchis chaypas. ¿Imaraykun chayta ninchis? Bautizakusqanchismantapachaqa wakinninchisqa yaqapaschá familiayoqña kapunchis, jujniraymantapaschá Jehová Diostapas servishanchis. Chhayna kashan chayqa, ñaupaqpi yachasqanchiskunaqa yanapawasunmanmi juj ruwaykunapipas. Kaypin chayllaraq Bibliata estudiashaspa yachasqanchis kinsa yachachikuykunamanta rimasun, chaykunan yanapawasun aswan allinta Jehová Diosta servinanchispaq.

JEHOVÁ DIOSMI KAMAWAQNINCHISQA

4. ¿Imaynatan Jehová Dios kamaqninchis kasqanta yachay yanapawarqanchis?

⁴ Hebreos 3:4 textopin nishan: “Tukuy imapas Diospa ruwasqanmi”, nispa. Arí, tukuy atiyniyoq ancha yachayniyoq Jehová Diosmi kay pachapiqa lliuta kamarqan. Noqanchistapas paymi kamawarqanchis, chaymi sapankanchista allinta reqsiwanchis, chaymantapas payqa anchatan munakuwanchis, chaymi allin yuyaychaykunata qowanchis allin kananchispaq. Chaykunata yachasqanchisqa maytan yanapawarqanchis.

5. ¿Imayna kananchispaqmi yanapawanchis Jehová Dios kamaqninchis kasqanta yachay? (Isaías 45:​9-12).

⁵ Jehová Diostaq kamaqninchis chayqa juch’uyaykukuq humilde sonqon kananchis. Jobmanta rimasun, juj kutinmi payqa imaymana sasachakuykunapi tarikuspa payllapi piensarqan, paymanta mana allinta rimasqankuta uyarispan defiendekuyta qallarirqan, Jehová Diostapas qonqapurqanmi. Chaymi Jehová Diosqa Jobta nirqan pichus tukuy atiyniyoq kamaqnin karqan chaypi piensarinanpaq (Job 38:​1-4). ¿Imaraykun chayta ninman karqan? Jehová Diosqa munarqanmi pay chanin kasqanta, allinta imatapas ruwaq kasqanta Job yuyarinanta. Chaymanta rimashaspan profeta Isaiaspas nirqan: “¿T’uru llut’aqninta ninmanchu: ¿Imatan ruwashanki?” nispa? (leey Isaías 45:​9-12).

6. ¿Imaraykun Jehová Dios tukuy yachayniyoq kasqanpi, kamaqninchis kasqanpi yuyaymanananchis? (Qhaway kay parrafopaq fotokunata).

⁶ ¿Iman Jobta jina noqanchistapas pasawasunman? Noqanchispas mana reparakuspan unayña Jehová Diosta servisqanchisrayku noqallanchispi confiakuyta qallarisunman, manapaschá Jehová Diospa yanapaynintapas mañakusunmanchu, manapaschá Bibliatapas leesunmanñachu (Job 37:​23, 24). Ichaqa chay ama pasawananchispaqqa tiempotan t’aqananchis tukuyta yachaq kamaqninchis Jehová Diospi piensarinanchispaq (Isa. 40:22; 55:​8, 9). Chaypi piensasun chayqa juch’uyaykukuqmi kasun, reparasuntaqmi imaynas Jehová Diospa piensayninqa piensasqanchismantaqa aswan jatun chayta.

7. ¿Imapi piensaymi hermananchis Rahelata yanaparqan Diospa llaqtanpi juj willakuyta sumaqta chaskikunanpaq?

⁷ Kamaqninchis Jehová Diospi piensaysi Eslovenia nacionmanta Rahela hermananchistapas yanapasqa Diospa llaqtanpi juj willakuyta sumaqta chaskikunanpaq. Chay hermananchismi nin: “Noqapaqqa sasan karan Diospa llaqtanpi wakin willakuykunata sumaqta chaskikuy. Juj kutinmi 2023 watapi umalliq t’aqamanta hermanokuna sunkhata wiñachikunamanta juj willakuyta willamurqanku, qhawarani chay videota chaypas juj kutinmi juj hermanota sunkhayoqta rikuspa mana allinpaq payta qhawarirqani. Chay qhepamanmi ichaqa Jehová Diospa yanapayninta mañakurqani chay willakuyta sumaqta chaskikunaypaq”, nispa. Rahela hermananchisqa reparasqas Jehová Diospuni llaqtanta pusarishasqanta, chaysi chhayna piensasqanta cambiapusqa. ¿Qantapas chaychu pasashasunki? ¿Sasachu qanpaq kashan Diospa llaqtanpi ima willakuytapas chaskikuy? ¿Sasachu qanpaq kashan yachachikuykunaq sut’inchakamusqanta sumaqta chaskikuy? Chaykunaman arí nishanki chayqa, qanpas Job jina t’aqay tiempota ancha yachayniyoq Diospi piensanaykipaq (Rom. 11:​33-36).

¿IMARAYKUN JEHOVÁ DIOS JINALLATA QHAWAN SUFRINANCHISTA?

8. ¿Imaynan karqanchis imaraykuchus ñak’ariy kan chayta chayllaraq yachashaspa?

⁸ ¿Imaraykun Jehová Dios jinallata qhawanman runakuna sufrinanta? Chayta mana yachaspan wakin runakunaqa Diospaq reneganku, wakintaq manaña paypi creeyta munankuchu (Prov. 19:3). Ichaqa yachasqanchis jinapas manan Jehová Dioschu juchayoq ñak’ariy kananpaqqa, aswanpas jucha kasqanraykun chaykunaqa kan (Ecl. 8:9). Chaymantapas Jehová Dios pacienciakusqanraykun askha runakuna payta reqsishanku, allintataqmi yachashanku imaynas jamuq tiempomanqa llapa ñak’ariykunata chinkachipunqa chayta (2 Ped. 3:​9, 15). Chaykunata chayllaraq yachaspaqa thajmi karqanchis ¿riki? Astawanmi Diostapas munakurqanchis ¿riki?

9. ¿Imakunapi tarikuspan yuyarinanchis imaraykus Jehová Dios jinallata qhawan ñak’ariy kananta chayta?

⁹ Ichaqa Jehová Dios llapa ñak’ariyta chinkachinankamaqa pacienciakunanchismi. Chaywanpas yaqapaschá mayninqa ima problemapipas ima injusticiapipas tarikuspa o mayqen familianchispas wañupuqtin sinchi llakisqa kasunman. Yaqapaschá tapukusunman: “¿Imaraykutaq Jehová Diosri kunankama mana kaykunata allichanchu?”, nispa (Hab. 1:​2, 3). Chhaynakunapi tarikuspan yuyarinanchis imaraykus Jehová Dios jinallata qhawashan kaykuna pasananta chayta, imaraykus jinallata qhawan allin runakuna ñak’arinanta chaytapas (Sal. 34:19).a Chaymantapas allintan piensarinanchis imaynas payqa mana allin kausayta chinkachinqapuni chaypi.

10. ¿Iman hermana Anneta kallpacharqan mamitan wañukapuqtin?

¹⁰ Imaraykuchus Jehová Dios jinallata qhawan ñak’ariy kananta chayta yachayqa allintan yanapawanchis. Chaypaq yachasunchis Anne sutiyoq hermanamanta, payqa Mayotte nisqa islapin tiyan, chayqa océano Índico nisqapin kashan. Paymi nin: “Mamitay wañupuqtinmi sinchi llakisqa tarikurqani, kunanpas mayninpi chhaynaraqmi kani, ichaqa sonqollaypin nikuni: Kaykunaqa manamá Diosmantachu jamun, nispa. Aswanpas payqa llakikuykuna chinkapunantan wañusqakunapas kausarimpunantan munashan, nispa. Chaykunapi piensaqtiymi sonqoy thaj kapun, mayninqa admirakuniraqmi chaymanta”, nispa.

11. Jehová Diosqa jinallatataq qhawashan ñak’ariy kananta chayqa, ¿imaraykun chayta yachay yanapawanchis astawan predicananchispaq?

¹¹ Imaraykus Jehová Dios jinallata qhawan ñak’ariy kananta chayta yachayqa, kallpawan predicananchispaq iman yanapawanchis. Chayta entiendenapaq qhawarisun imanirqanchus apóstol Pedro chayta. Imaynas runakunaqa Diospa pacienciakusqanrayku salvasqa kashanku chaymanta rimasqan qhepamanmi nirqan: “Allinta piensaychis imayna runachus kanaykichis chaypi. Qankunaqa ch’uyata kausaq runakunan kanaykichis, Dios sonqo runakuna jinataqmi imatapas ruwanaykichis”, nispa (2 Ped. 3:11). ¿Imaynatan Dios sonqo runakuna jina imatapas ruwasunman? Chay ruwaykunamanta jujninmi kashan runakunaman Diosmanta willay. Noqanchispas munakunchistaq runakunata chayqa, maytan munasunman Diospa gobiernonpi paykunapas kausanankuta ¿riki? Chhaynataq chayqa willay runamasikunaman, maypichá kashanki chay llaqtapi predicay Diosmanta. Yachasqanchis jinapas noqanchisqa Diospa llank’aqmasinkunan kanchis. Chhaynaqa tukuy atisqanchista kallpachakusun llapa runakunaman paymanta yachachinanchispaq (1 Cor. 3:9).

TUKUKUY P’UNCHAYKUNAPIN KAUSASHANCHIS

12. Kay tiempokunapiqa Diospa nisqanman jinataq imapas kashan chayqa, ¿imatan chay allinta rikuchiwanchis?

¹² Bibliapiqa allintapunin willashan imaynas tukukuy p’unchaykunapi runakuna kananku karqan chayta (2 Tim. 3:​1-5). Sichus allinta qhawarisun kay pacha kausay imaynachus kashan chayta chayqa allintan reparasun imaynas tukuy imapas Bibliaq nisqanman jinapuni kashan chayta. Chaymantapas runaq kausayninqa astawanraqmi mana allinman tukupushan. Chaykunan rikuchiwanchis imaynas Diospa siminqa cheqaqpuni chayta (2 Tim. 3:​13-15).

13. ¿Imanispan sapankanchis tapukunanchis? (Lucas 12:​15-21).

¹³ Tukukuy p’unchaykunapi tiyasqanchista yachayqa allintan yanapawanchis allin yuyaywan imatapas ruwananchispaq, ima ruwaychus aswan importante chaypi yuyayninchis kananpaq ima. Lucas 12:​15-21 textopin Jesús willarqan juj rijch’anachiyta. Chaywanmi rikuchirqan imaynas mana yanqa tiempota usuchinachu chayta (leey Lucas 12:​15-21). Chay rijch’anachiypi willasqan runamantan nirqan “mana yuyayniyoq” nispa. ¿Imaraykun chayta ninman karqan? Chay runaqa mana allin kaqkunamanmi yuyayninta churasharqan. Arí, qhapaq kaykuna juñuypin tukuy yuyaynin kasharqan, manataqmi Diospaqqa qhapaqchu karqan. Ichaqa, ¿imaraykutaq payri mana yanqa tiempota usuchinanchu karqan? Diosmi payta nirqan: “Kunan tutan wañunki”, nispa. ¿Imatan chaymanta yachasunman? Manañataq unaychu kay millay kausay kanqa chayqa, sapankanchismi tapukunanchis: “¿Ima ruwaymanmi masta tiempota qoshani? ¿Iman yuyayniypi kashan? ¿Imata ruwanankupaqmi wawaykunata kallpachashani? ¿Ima ruwaymanmi kallpaytapas tiempoytapas qolqeytapas qoshani, kay pachapi qhapaq kaykuna juñuymanchu icha janaq pachapi qhapaq kaykuna juñuymanchu?”, nispa.

14. Miki hermanaq willakusqan jina, ¿imaraykun allinpuni kanman imaynas tukukuy p’unchaykunapi kausashanchis chaypi piensay?

¹⁴ Imaynas tukukuy p’unchaykunapiña kausashanchis chaypi piensasun chayqa, jujniraymantan imatapas qhawarisunchis. Chaypaq yachasunchis Miki sutiyoq hermanamanta. Paymi nin: “Secundariayta tukuspaqa universidadmanmi riytapuni munasharqani. Chaypin Zoología nisqata estudiayta munasharqani, munashallarqanitaqmi precursor regular kaytapas, juj ladokunaman yanapakuq riytapas. Chaymanta rimaspan allin experienciayoq hermanokuna niwarqanku: Allinta piensariy, ¿atinkichu juj carrerata estudiaspa precursor regular kayta, Diospaq imachus munasqaykikuna ruwayta? Yachasqayki jinapas pisi tiempollañan kay millay kausayqa kanqa. Chaymantapas Diospa gobiernonpiqa wiñaypaqmi tiempoyki kanqa animalkunata estudianaykipaqqa, nispa. Chaykunapi piensaspan pisi tiempollaña estudiarqani, imallapipas llank’aspa chaywan mantenekunaypaq. Chaywanmi juj llank’anata tarirqani, karanmi tiempoypas precursor regular kanaypaq. Tiempowanqa Ecuador nacionmanmi ripurqani chaypi yanapakuq”, nispa. Kunanqa Miki hermananchisqa qosanwan kuskan iñiq t’aqakunata watukuspa purishanku, qosanqa watukuq umallin.

15. ¿Imatan yachasunman Santiagowan imachus pasasqanmanta? (Qhaway kay parrafopaq fotokunata).

¹⁵ Runakuna Diosmanta willasqanchista mana uyarikuyta munanqakuchu ¿chayri? ¿Chaywanchu pisipapunanchis? Manan. Yachasqanchis jinapas runakunaqa cambiankumanmi. Chaypaq piensasun Jesuspaq wayqen Santiagopi, payqa Jesuswan kuskan wiñarqan. Rikurqanmi imaynas Jesusqa Diospa ajllasqan Mesías karqan chaytapas, rikurqanmi Jesuspa imayna yachachisqantapas imakuna yachachisqantapas. Chaywanpas Santiagoqa Jesuspa wañupusqan qhepamanñan iñirqan. Chaymantapachaqa allin iñiqmi payqa kapurqan (Juan 7:5; Gál. 2:9).b Chhaynaqa familianchiskuna manaña uyarikuyta munankuchu chaypas ama jinataqa qhawarparisunchu, yaqapaschá chaymantaqa munallanqaku. Wakin runamasinchiskuna manaraq uyarikuyta munashankuchu chaypas visitashallasun. Yachasqanchis jinapas tukukuy p’unchaykunapin kashanchis, chaymi astawanraq Diospa simintaqa willamushananchis. Yaqapaschá paykunaqa imachus willasqanchista yuyarispanku qhepakunaman Diosman asuykuyta munanqaku. Manchay ñak’ariy qallariqtin imapaschá paykunaqa Diosman jampuyta munanqaku.c

CHASKIKUSHALLASUN DIOSPA YUYARICHISQAN SIMIKUNATA

16. ¿Imaynatan yanaparqasunki Jehová Diospa apachimusqan qelqakuna? (Qhaway “Chaykunawan jujkunata yanapay” nisqa willakuyta).

¹⁶ Wakin qelqakunapas videokunapas Diosta mana reqsiq runakunapaqmi ruwasqa kashan. Chaykunamanta wakinmi kashan semana tukuyta juñunakuypi discurso, jw.org paginapi wakin qelqakuna videokuna revistakuna ima. Paykunapaqña ruwasqa kashan chaypas, chay qelqakunaqa llapanchistan allinta yanapawanchis ¿riki? Chaykunata noqanchispas leesun qhawasunpas chayqa astawanmi Diostaqa munakusunchis, astawanmi simin qelqapipas confiasunchis. Yanapawasuntaqmi mana manchakuspa jujkunaman yachachinanchispaqpas (Sal. 19:7).

17. ¿Imakunapi tarikuqtinchismi yanapawasunman Bibliapi ñaupaqta yachasqanchis yachachikuykuna?

¹⁷ Unayña Jehová Diosta serviqkunaqa may kusisqan chaskikunchis imapas jujmanta sut’inchakamun chaytaqa ¿riki? Chaywanpas Bibliapi ñaupaqta yachasqanchis yachachikuykunaqa may allinpunin kallantaq. Kaypi yachasqanchis jina, chay yachachikuykunapas imaymanapin yanapawasunman. Chayrayku ima mosoq yachachikuypas chayamuwanchis chayqa, manan noqanchispichu confiananchis. Aswanmi humilde sonqowan chaytaqa chaskikunanchis. Chaymantapas yachasqanchis jina kay llaqtataqa Jehová Dios kikinmi pusashan. Arí, ancha jatun yachayniyoq tukuy atiyniyoq Diosmi pusawashanchis. Mayqen familianchis llakipi tarikuqtinpas pacienciakusun, allintataq piensasun imaraykus Jehová Dios jinallata qhawashan ñak’ariykuna kananta chaypipas. Chaymantapas ama qonqasunchu: Tukukuy p’unchaykunapiñan kashanchis. Chhaynataq chayqa, allin yuyaywanmi tiemponchistapas ima kaqninchistapas usananchis. Chhaynaqa yuyarishallasun Diospa yachachikuyninkunata, chhaynapin allin yuyaywan imatapas ruwasunchis, Dios sonqollataqmi kasunpas.