¿Yachankichu imaykichus kan chayllawan kusisqa kayta?

1. ¿Iman “imanchischus kan chaywan contento kay”, ichaqa imatan mana piensananchischu?

¿IMANIWAQMI kausayniykimanta? ¿Sumaqtan thajmi kausakushani niwaqchu, icha manan niwaqchu? Ichaqa, ¿imataq sumaq kausayri? Pipas sumaqta thaj kausaqqa, imanchus kan ima bendiciontachus chaskin chaywanmi tranquilo sonqopas sonqo kausakun. Manan payqa imanchus faltashan chaypichu piensashan, ni chaywanchu colerasqa renegasqa kashan. Ichaqa imanchischus kan chaywan thaj kausayqa manan mana imamanta llakikuspa thajlla kaychu, aswanpas tukuy atisqanchistan kallpachakunanchis Jehová Diosta astawan servinanchispaq (Rom. 12:1; 1 Tim. 3:1). Chayta ruwananchispaqña kallpachakusunman chaypas contentollan kashananchis manaraq Diospa llaqtanpi ima llank’anatapas chaskinchischu chaypas.

2. ¿Imaraykun allinpuni imanchischus kan chayllawan contento kay?

² Ichaqa manachus contento kasun imanchischus kan chaywan chayqa, yaqapaschá mana allinkunata ruwasunman. Wakin mana contentakuqkunaqa sonqonkuq imachus munasqanta rantiyta munaspankun astawanraq llank’ayman qokupunku. Manaña necesitankuchu chaypas rantiytapunin chayta munanku. Llakikunapaqmi kay willakuy: Wakin hermanokunapas suwakuyman imaraqmi urmasqaku chaykunarayku. Imatachá munasharqanku chaykunata iman suwakapusqaku. Yaqapaschá paykunaqa nirqanku: “¿Imaraykutaq noqaqri kay mana kanmanchu?”, nispa, o “nishutañan suyakushani”, nispa. Qolqemantapas yaqapaschá nirqanku: “Chaymantaqa kutichipullasaqmi”, nispa. Ichaqa chayqa suwakuymi, Jehová Diosqa cheqnikunmi suwakuytaqa (Prov. 30:9). Wakinñataqmi Jehová Diosta saqepurqanku. ¿Imarayku? Ima llank’anatachá Diospa llaqtanpi chaskikuyta munarqanku chayta mana chaskisqankurayku (Gál. 6:9). Chaykunata yachaspaqa yaqapaschá nisunman: “¿Jehová Diosta serviq runa chayta ruwanmanchu?”, nispa. Arí pasanmi chaykuna. ¿Imaraykun chaykuna pasan? Wakinqa pisi-pisimantan manaña contentakunkuchu imankuchus kan chaywan.

3. ¿Imatan yachasunman Filipenses 4:​11, 12 textopi imachus nisqanmanta?

³ Mayninqa manapaschá facilchu kanqa imanchischus kan chayllawan contento kay thaj kay. Ichaqa atisunmanmi chayllawan contento kayta. Chaymantapas kallpachakunanchismi chaywan thaj kananchispaq contento kananchispaq. Apóstol Pablopas nirqanmi: “Ñan yachasqaña kani imaynapiña tarikuspapas imaychus kan chayllawan contentakuyta”, nispa (leey Filipenses 4:​11, 12). Chay simikunata qelqashaspaqa Pabloqa preson kasharqan, chaywanpas kusisqallan payqa kasharqan. Chhaynaqa, sichus noqanchispaq sasa kashan imanchischus kan chaywan contento kay chayqa, Pablowan imachus pasasqanpin piensananchis. Noqanchispas atisunmanmi pay jina kayta. Ichaqa, ¿imatan ruwasunman imanchischus kan chayllawan thaj kausananchispaq contento kananchispaqpas? Kaypin yachasunchis kinsa yanapaykunamanta.

YACHANAN AGRADECIDO KAYTA

4. ¿Imaraykun nisunman “agradecido kayqa kusisqa kausanapaqmi yanapawanchis” nispa? (1 Tesalonicenses 5:18).

⁴ Sichus agradecido kasun chayqa, kusisqan imanchiswanpas kasunchis (leey 1 Tesalonicenses 5:18). Kausananchispaq imanchischus kan chaykunawan agradecido kasun chayqa, manan imanchischa mana kanchu chaykunapichu piensasunchis, manan chayllapichu yuyayninchisqa kanqa. Chaymantapas kunan imapichá Diospaq llank’ashanchis chayta valorasun chayqa, tukuy atisqanchistan kallpachakusun chaypi kusisqa sonqopas sonqo llank’ananchispaq, manataqmi Diospa llaqtanpi imapichá llank’ayta munanchis chaypichu nishuta piensashasunchis. Razontachá Bibliaqa niwanchis imatachus Dios qowanchis chaymanta gracias ninanchispaq. Chaymantapas agradecido kasun chayqa “Diosqa runaq mana entiendey atisqan thaj kaytan qowasunchis” (Filip. 4:​6, 7).

5. ¿Imakunan razón karqan Israel runakuna agradecido kanankupaq? (Qhaway kay parrafopaq dibujota).

⁵ Ñaupa Israel llaqtapi piensasun. Paykunaqa Egiptomanta ch’in ladonta purimushaspankun sapa kutilla quejakurqanku. “Egiptopiqa may sumaqmá mijunapas kaq, askhatamá challwatapas mijuq kanchis” nispan rimaqku (Núm. 11:​4-6). Arí manapaschá facilchu karqan chay ch’inneqpi kausayqa. Ichaqa, ¿allintachu ruwasharqanku quejakuspanku? Manan. Chay kutikama Diospa llapa imaymana ruwasqanpi piensankuman karqan chayqa, mana quejakuspan thajlla kankuman karqan. Diosqa chunka castigota apachimuspan Egiptopi esclavo kasqankumanta paykunata libramurqan. Chaymantapas Egipto runakunaq llapa imankutan paykunaman qorqan, qorinkuta, qolqenkuta, p’achankuta iman apakampurqanku (Éx. 12:​35, 36). Chaymantapas Jehová Diosqa puka lamar qochatan kicharqan, chhaynapi Israel runakuna Egipto ejercitomanta ayqekunankupaq. Chay ch’in ladonta purishaqtinkupas sapa p’unchaymi Jehová Diosqa maná nisqa mijunata paykunaman mijuchiq. Chaykunatataq Dios paykunarayku ruwarqan chayqa, ¿imaraykun mana contentochu kashankuman karqan? Manan mijuna faltasqanraykuchu, aswanpas mana agradecekuq kasqankuraykun.

6. ¿Imakunan yanapawasunman agradecido kananchispaq?

⁶ ¿Iman yanapawasunman agradecido kananchispaq? Ñaupaqta: Sapa p’unchaymi piensananchis imakunatachá Jehová Dios qowanchis chaypi. Yaqapaschá chaykunamanta iskayta o kinsata qelqasunman chhaynapi agradecekunanchispaq (Lam. 3:​22, 23). Iskaypi: Sapa p’unchay jujkunatapas gracias nisun imakunachus ruwapuwasqanchismanta, astawanqa Jehová Dioswan agradecido kasun (Sal. 75:1). Kinsapi: Agradecekuq runakunawan amigota ruwasun. Paykunawan amigota ruwasun chayqa paykuna jinan noqanchispas kasunchis. Quejakuqkunawan amigota ruwasun chaypas paykuna jinan kallasuntaq (Deut. 1:​26-28; 2 Tim. 3:​1, 2, 5). Chhaynaqa tukuy tiempo kallpachakusun agradecido kananchispaq chayqa, manan llakikusunchu ni renegasunchu imanchischus mana kan chaykunamantaqa.

7. ¿Iman Aci sutiyoq hermananchista yanaparqan thaj kusisqa kananpaq?

⁷ Indonesia nacionpi Aci sutiyoq hermanamanta yachasunchis. Paymi nin: “Coronavirus onqoy tiempo kashaqtinmi juj hermanokunawan comparakuq kani. Chaymi mayninqa llakisqa renegasqa ima kaq kani”, nispa (Gál. 6:4). ¿Iman payta yanapanman karqan cambiananpaq? Paymi nillantaq: “Imakunatachus Jehová Dios sapa p’unchay qowasharqan chaypin piensaq kani. Piensaqmi kani Diospa llaqtanpi kasqaymanta imakunatas chaskisharqani chaypipas. Chaykunamantan Jehová Diosta gracias nirqani. Chaywanmi sonqoy thaj karqan, kusisqan kapurqani”, nispa. Chhayna ima llakipipas kashanchis, imapas mana munasqanchisman jinachu kashan chayqa, kay hermananchispaq ejemplonta qatikusun.

HUMILDE SONQON KANA

8. ¿Iman Baructa pasarqan?

⁸ Barucmanta yachasunchis. Payqa profeta Jeremiasta yanapaqmi karqan. Juj tiempoqa paypas manan contentochu kasharqan imachus ruwasqanwan. Barucqa Jeremiastan yanapaq Israel runakunaman juj willakuyta willaypi. Arí, Diospa qosqan sentenciatan paykunaqa willasharqanku. Juj tiempon ichaqa Barucqa Diospa munaynin ruwaypi piensananmantaqa paypa imachus munasqanpi piensayta qallarirqan. Chaymi Jehová Diosqa profeta Jeremiaswan nichirqan: “Qanqa allin kaqkunatan qanpaq maskhashanki, amaña chaykunata maskhaychu”, nispa (Jer. 45:​3-5). Juj rimaypiqa nisharqan: “Imaykichus kan chaywan kusisqa kay”, nispan. Barucqa uyarikurqanmi Diospa yuyaychasqanta, jinan payqa allillan Jehová Dioswan kausarqan.

9. ¿Imatan yachasunman 1 Corintios 4:​6, 7 textopi imachus nisqanmanta? (Qhaway kay parrafopaq fotokunata).

⁹ Mayninqa yaqapaschá mayqen hermanopas ninman: “Kaytaqa noqasuna allinta ruwayman, chaypaq jinan noqaqa kashani”, nispa. Yaqapaschá chaytaqa ninman imatapas allinta yachasqanrayku, tukuy kallpawan ganaswan llank’asqanrayku, o chay llank’aypi allin experienciayoq kasqanrayku. Chaywanpas yaqapaschá jujkuna chaskinkuman chay llank’ana munasqanta. ¿Iman chhaynapi tarikuq hermanota yanapanman kusisqalla thajlla kananpaq? 1 Corintios 4:​6, 7 textopi apóstol Pabloq nisqanmi (leey 1 Corintios 4:​6, 7). Chaypi nisqan jina imataña yachanchis imataña chaskiranchis chaypas, manan chaykunaqa noqanchismantachu jamun. Aswanpas Jehová Diosmi chaykunataqa khuyapayakuq kayninpi qowarqanchis. Arí, paypa qowasqanchismi llapa imapas (Rom. 12:​3, 6; Efes. 2:​8, 9).

10. ¿Iman yanapawasunman humilde sonqo kananchispaq?

¹⁰ Jesuspa ejemplonpas yanapawasunmi humilde sonqo kananchispaqqa. Yachasqanchis jinapas payqa llapa apostolkunaq chakintan maqchirqan. Diospa churinña karqan chaypas, jatun autoridadña karqan chaypas chaytan ruwarqan. Paymanta rimashaspan apóstol Juanqa nirqan: “Jesusqa yacharqanmi tukuy imatapas Taytan payman jap’ichisqanta, Diosmanta jamusqanta, Diosman kutipunanña kashasqantapas”, nispa. Chaywanpas Jesusqa juj puruñaman unuta jich’aykuspan discipulonkunaq chakinta maqchiyta qallarirqan (Juan 13:​3-5). Jesusqa yaqapaschá ninman karqan: “Noqaqa Diospa wawantaq kani chayqa, atiyniyoqtaq kani chayqa paykunayá maqchiwachunku”, nispa. Ichaqa manan chhaynachu payqa karqan, manataqmi payqa imaymanayoq kaypichu ni allin kausakuypichu piensarqan (Luc. 9:58). Aswanmi payqa imanchus kan chaywan contento kaq thaj kaq. Payqa ancha jatun ejemplon noqanchispaqqa ¿riki? (Juan 13:15).

11. ¿Iman hermanonchis Dennista yanaparqan kusisqalla thajlla kananpaq?

¹¹ Países Bajos nisqapi Dennis sutiyoq hermanomanta yachasunchis. Payqa Jesús jina humilde sonqo kananpaqsi kallpachakushan, ichaqa mayninqa manas facilchu chay. Paymi nin: “Diospa llaqtanpi munasqay llank’anata juj hermanoman qonku chayqa, reneganin mayninqa. Chay pasawaqtinqa qelqanchiskunapin humilde sonqo kaymanta estudiani. JW Library^® nisqapipas chaymanta rimaq textokunatan anotakuni, chhaynapi ratulla tarispa chayta leenaypaq. Chaymantapas chaymanta rimaq discursokunatan uyarillanitaq, chaykunaqa telefonoypin descargasqa kashan.a Chaykunata estudiaspan entienderqani imaynas imata ruwaspapas Jehová Diosta jatunchanapaq ruwananchis chayta, manataq noqanchis jatunchasqa kananchispaqchu. Diospa llaqtanpi ima llank’ay chaskisqanchispas Jehová Diosmantan jamun, paymi chaytaqa qowanchis imallapipas yanapakunanchispaq”, nispa. Jayk’aqllapas renegasqapas kashanchis, manapas contentochu kashanchis chayqa kallpachakusun humilde sonqo kananchispaq. Chayta ruwasun chayqa astawanmi Jehová Dioswanpas amigontin kasunchis, aswan kusisqataq kasunpas (Sant. 4:​6, 8).

IMATACHUS DIOS QOWASUN CHAYPI PIENSASUN

12. ¿Bibliapi ima willasqanmi yanapawasunman imachus kan chaywan thaj kananchispaq? (Isaías 65:​21-25).

¹² Sichus Jehová Diospa prometesqan paraisopi piensasun chayqa, ima llakipiña sasachakuypiña kay tiempopi kashanchis chaypas kusisqan kasunchis. Arí, Isaías libropi willasqan jina, yaqapaschá kay tiempopi vidanchisqa sasa kanman. Jehová Diosqa yachanmi chayta, chaymi payqa niwanchis imaynas llapa chaykunata chinkachipunqa chayta (leey Isaías 65:​21-25). Diospa gobiernonpiqa llapanchismi wasiyoq kasunchis, llank’ananchispas gustonchispaq jinan kanqa. Mijuykunapas askhan kanqa sumaqmi kanqa. Manañan llakikusunchu noqanchiswan wawanchiskunawanpas imapas pasananmantaqa (Isa. 32:​17, 18; Ezeq. 34:25). Chay promesaqa manan yanqallachu, chhaynapunin kanqa.

13. ¿Imakunapi tarikuspan piensananchis Diospa gobiernonpi?

¹³ Kay tiempopiqa astawanraqmi piensananchis imaynas jamuq tiempopi kausay kanqa chaypi. ¿Imarayku? Bibliaq nisqan jina “tukukuy p’unchaykunapin” kausashanchis. Chaymi llapamanpas chayamuwanchispuni manchakuy sinchi sasa tiempokunaqa (2 Tim. 3:1). Chhaynapi tarikushanchis chayqa, Jehová Diosqa yanapawasunpunin chaykunata aguantananchispaq (Sal. 145:14). Chaymantapas llapa chay mana allinkunaqa chinkapunqan, chaytan Jehová Dios niwanchis. Chaykamaqa yaqapaschá p’unchay-p’unchay tukuy kallpa llank’ananchis kanqa, chhaynapi wasinchisman imallatapas apananchispaq. Ichaqa manan wiñaypaqchu chayqa chhaynalla kanqa, Diospa gobiernonpiqa llapa ima necesitasqanchismi junt’asqa kanqa (Sal. 9:18; 72:​12-14). Wakinqa yaqapaschá sinchi onqosqa tarikushanchis, ima nanaypaschá nishuta sufrichiwashanchis, llaki onqoywan imapaschá kashanchis. Chaykunapas manan wiñaypaqchu kanqa, tukupullanqan, Diosmi llapa onqoyta kay pachamanta chinkachipunqa, wañuypas manan kapunqañachu (Apo. 21:​3, 4). Chay promesakunapi piensasun chayqa, manan nishutachu llakikusunchis, manan renegasqachu kasun ima nanaywanpas. Arí onqosqaña kashasunman, familianchisña wañupunman, ima llakipiña kashasunman chaypas, atisunmanmi thajlla kusisqalla kausaytaqa. ¿Imarayku? Bibliapi nisqan jina, chay sasachakuykunaqa juj tiempollan kanqa. Diospa gobiernonpiqa chinkapunqan llapa chaykunaqa (2 Cor. 4:​17, 18).

14. ¿Imatan ruwasunman tukuy sonqo Diospa gobiernonpi suyakunanchispaq?

¹⁴ ¿Imatan ruwasunman tukuy sonqo Diospa gobiernonta suyakunanchispaq? Chaypaqqa yaqapaschá piensasunman lentespi. Lentesqa ch’uyatan imatapas rikuchiwanchis ¿riki? Sichus tukuy sonqo Diospa gobiernonpi piensasun chayqa, ch’uyatan rikusunchis imaynachus chaypi kausay kanqa chayta. Chaypaq piensasun qolqepi. Wakinqa yaqapaschá pisi qolqeyoq kashanchis, manapaschá aypawashanchischu. Chhaynapi tarikushanchis chayqa, piensasun imaynas vida kanqa manaña qolqe kaqtin, manaña manunakuy kaqtin, manaña wajchayaypas kaqtin chaypi. Diospa llaqtanpi ima ruway munasqanchistapas mana ruwashanchischu chayqa, mana chay llank’anaman aypashanchischu chayqa, piensasun imaynas waranqa-waranqa watakuna pasaqtinqa manaña chaykunataqa ni yuyarisunpaschu chaypi (1 Tim. 6:19). Khayna sasa tiempokunapitaq kausashanchis chayqa, manapaschá facilchu kanqa chaykunapi piensayqa. Ichaqa kallpachakusun chayqa, pisi-pisimantan chaykunapi astawan piensasunchis.

15. ¿Imatan yachasunman Christa hermanaq imachus nisqanmanta?

¹⁵ 11 parrafopi yachamusqanchis Dennis sutiyoq hermanoq esposanmanta rimasun. Paypa sutinmi Christa, paymi nin: “Noqaqa sinchi onqosqan kashani, cuerpoypas manan kuyuriyta atinñachu, chaymi silla de ruedasllapi kashani. Noqaqa mastaqa puñunallaypin kashani, tukuy tiempotaqmi cuerpoypi nanayllawan kashani. Qaynakunallan doctor niwarqan: Tiempowanqa aswan nanaypin tarikunki, nispa. Chayta niwaqtinmi noqaqa sonqollaypi nirqani: Kay doctorqa manan noqa jinachu jamuq tiempotaqa qhawarin, nispa. Noqaqa jamuq tiempopi sumaq kausay kananpin piensani, chaymi yanapawan thaj kanaypaq. Kay tiempopiqa jinatachá nanayniyta aguantanay kanqa. Ichaqa Diospa gobiernonpiqa chinkapunqan kay nanayniyqa. Chaypiqa may kusisqachá kausakusaq”, nispa.

“PAYTA MANCHAKUQKUNAMANQA MANAN IMAPAS FALTANCHU”

16. ¿Imaraykun David nirqan “Jehová Diosta manchakuqkunamanqa manan imankupas faltanqachu” nispa?

¹⁶ Thajña kasun imanchischus kan chaywan chaypas, mayninqa manan librechu kasun ima llakimantapas. Chaypaq piensasun rey Davidpi. Paypaqqa kinsan wawankuna wañupurqan. Chaymantapas yanqamantan tumparqanku traicionarqanku iman. Chaymantapas askha watan qatikacharqanku wañuchiyta munaspa. Chaywanpas payqa tranquilollan kaq thajllan kaq. Imaynatachus Jehová Dios yanaparqan chaymanta rimaspan nirqan: “Payta manchakuqkunamanqa manan imankupas faltanqachu”, nispa (Sal. 34:​9, 10). Ichaqa, ¿imaraykun chayta ninman karqan? Payqa allintan yacharqan imaynas Diosqa llakipiña tarikusun chaypas mana imatapas faltachiwasunchu chayta (Sal. 145:16). David jinan noqanchispas imaña kaqtinpas thajlla kusisqalla kananchis. Yachasqanchis jinapas Jehová Diosqa yanapawasunpunin.

17. ¿Imaraykun imaña kaqtinpas kusisqalla thajlla kausayta munawaq?

¹⁷ Jehová Diosqa imaña kaqtinpas thajlla kusisqalla kausananchistan munan (Sal. 131:​1, 2). Kunanqa ñataq yachanchisña imatas chaypaq ruwananchis chayta chayqa, tukuy atisqanchista kallpachakusun agradecido kananchispaq humilde sonqo kananchispaq, imatachus Dios qowasun chaypi yuyaymanananchispaqpas. Chayta ruwasun chayqa apóstol Pablo jinan nisunchis: “Ñan yachasqaña kani imaynapiña tarikuspapas imaychus kan chayllawan contentakuyta”, nispa (Filip. 4:11).