Ama iskayaychu, Jehová Diosqa munakusunkin

1. ¿Imaraykun Jehová Diosllataña servinaykipaq promesata ruwarqanki? (Qhaway kay parrafopaq fotokunata).

¿YUYASHANKICHU manaraq bautizakushaspa Jehová Diosman juj promesa ruwasqaykita? ¿Imaraykun chay p’unchay payllataña servinaykipaq prometekurqanki? Paymanqa prometekurqanki payta tukuy sonqowan munakusqaykiraykuchá. Chay mañakuypiqa nirankichá: “Jehová Diosniy kunanmantaqa qanllapaqñan kausasaq, munaynillaykitañan ruwasaq, wañupunaykaman tukuy sonqoywan munakusayki”, nispa (Mar. 12:30). Chaymantapas Jehová Diosta reqsisqayki p’unchaymantaqa astawanraqchá kunanqa payta munakapunki. Pipas tapusunkiman: “¿Munakunkichu Jehová Diosta?” nispa chayqa, kaq ratuchá qanqa niwaq: “Arí, ¡maypi mana! Noqaqa paytan imamantapas mastaqa munakuni”, nispa.

2, 3. a) ¿Imata allinta yachananchistan Jehová Dios munan? (Jeremías 31:3). b) ¿Imakunamantan kaypi yachasunchis?

² Ichaqa, ¿imaniwaqmi pipas “qantarí, munakusunkichu Dios” nispa tapusuqtiyki? Chayta uyarispaqa yaqapaschá ch’inlla qhepakuwaq, manapaschá imaniytapas atiwaqchu. ¿Imaraykun yaqapas chay pasasunkiman? Yaqapaschá Jehová Dios munakusqasuykimanta iskayashanki. Chaysi juj hermananchistapas pasasqa. Paymi nin: “Noqaqa tukuy sonqoywanmi Jehová Diostaqa munakuni. Piña tapuwanman chaypas noqaqa mana iskayaspan chayta niyman. Ichaqa mayninqa manan seguruchu kani Jehová Dios munakuwanchus manachus chaymanta, chaymi sonqoypi nini: ¿Noqata Jehová Dios munakuwanmanpunichu?, nispa”. Ichaqa, ¿imaynatan Jehová Dios qhawarisunki? ¿Munakusunkipunichu pay?

³ Arí, payqa anchatan munakusunki, chayta yachanaykitataqmi munanpas (leey Jeremías 31:3). Munakuspan, amigon kanaykita munaspan llaqtanman pusamurqasunki. Manan chayllapaschu. Prometekuspa bautizakusqaykimantapachan Jehová Diosqa astawanraq munakapurqasunki, anchatan valorasunkipas (Mal. 3:​17, willakuy). Jehová Diosqa manan munanchu paypa munakuwasqanchismanta iskayananchista. Aswanpas apóstol Pablo jina ninanchistan munan. Paymi nirqan: “Noqaqa allintapunin yachani: Manan ni wañuypas, ni kausaypas, ni angelkunapas, ni autoridadkunapas, ni kay tiempopi ima kaqpas, ni jamuq tiempopi ima kaqpas, ni atiykunapas, ni altopi kaqpas, ni ukhupi kaqpas, ni ima kamasqapas Señorninchis Cristo Jesuspi Diospa munakuyninmantaqa t’aqawasunchu”, nispa (Rom. 8:​38, 39). Kaypin yachasunchis imaraykus Jehová Diospa munakuwasqanchismanta manapuni iskayananchischu chayta. Yachasunmi imakunata ruwaysi yanapawasunman Jehová Diospa munakuwasqanchismanta ama iskayananchispaq chaytapas.

¿IMARAYKUN MANA ISKAYANACHU DIOSPA MUNAKUWASQANCHISMANTA?

4. ¿Imayna piensananchistan Satanás munan, ichaqa imatan ruwasunman chay trampaman ama urmananchispaq?

⁴ Jehová Diospa munakuwasqanchismanta mana iskayasunchu chayqa, manan faciltachu Satanaspa trampankunapi urmasun (Efes. 6:11). Ichaqa, ¿ima trampakunatan Satanás churawanchis? Payqa munan “Jehová Diosqa manapaschá munakuwanchu” nispa piensananchistan, chhaynapi Jehová Diosmanta pisi-pisimanta t’aqakunanchispaq. Bibliapi nisqan jina, Satanasqa qaparishaq león jinan (1 Ped. 5:​8, 9). Imaynan juj leonqa sapallan purishaq pisi kallpa kaq animalkunaman phawaykun, chhaynatan Satanaspas pisi kallpa kashaqtinchis, sinchi llakisqa ima kashaqtinchis phawaykamuwanchis (Prov. 24:10). Ichaqa, ¿iman yanapawasunman chay trampankunapi ama urmananchispaq? Chaypaqqa Satanás contran qaqata sayananchis, Jehová Diospa munakuwasqanchismantapas manan iskayananchischu (Sant. 4:7).

5. ¿Imaraykun Jehová Diospa munakuwasqanchismanta valorawasqanchismantapas mana iskayananchischu?

⁵ Jehová Diospa munakuwasqanchismanta mana iskayasunchu chayqa, astawanmi payman asuykusunchis. ¿Imaraykun chayta ninchis? Jehová Diosqa jujkunata munakunanchispaq jina, jujkunapas noqanchista munakuwananchispaq jinan kamawarqanchis. Chaymi pi runapas munakuwaqtinchisqa noqanchispas payta munakullanchistaq. Chhaynatan Jehová Diostapas munakullasuntaq sichus paypa munakuwasqanchismanta valorawasqanchismanta mana iskayasunchu chayqa (1 Juan 4:19). Manan chayllapaschu, Jehová Diosta astawan munakusunchis chayqa, astawanmi paypas munakapuwasunchis. Chaymi Bibliapipas nin: “Diosman asuykuychis, jinan paypas asuykamusunkichis”, nispa (Sant. 4:8). Kunanqa yachasun imakunatas ruwananchis Jehová Diospa munakuwasqanchista sut’ita reparananchispaq chayta.

¿IMAKUNATAN RUWANANCHIS DIOSPA MUNAKUYNINMANTA AMA ISKAYANAPAQ?

6. ¿Imatan ruwananchis Jehová Diospa munakuwasqanchismanta iskayashanchis chayqa?

⁶ Jehová Diosmanta mañakuy imaraykus munakusunki chayta reparanaykipaq (Luc. 18:1; Rom. 12:12). Mayninqa yaqapaschá p’unchaypi askha kutita mañakunayki kanqa imaynatas Jehová Dios qhawarisunki chayta reparanaykipaq. Ichaqa chaywanpas sonqoykipi iskayashankiraq Jehová Diospa munakusqasuykimanta chayqa kayta yuyariy: “Jehová Diosqa sonqoykimantapas aswan jatunmi” (1 Juan 3:​19, 20). Payqa allintan reqsisunki, allinkuna ruwasqaykitataqmi mastaqa qhawashanpas (1 Sam. 16:7; 2 Crón. 6:30). Chhaynaqa Jehová Diosman willakuy imaynachus kashanki chayta, chaymantataq mañakuy imaraykus munakusunki chayta sut’ita reparachisunaykipaq (Sal. 62:8). ¿Imatan ruwawaq mañakusqayki qhepaman? Chayta kunan qhawarisun.

7, 8. ¿Ima textokunan yanapawasunman Jehová Diospa munakuwasqanchismanta ama iskayananchispaq?

⁷ Jehová Diospa qelqachisqan simipi confiay. Jehová Diosqa santo espiritunwanmi wakin runakunata pusarirqan, chhaynapi imayna Dioschus pay chayta qelqanankupaq. Wakinmanta yachasun. Juj kutinmi David sinchi llakisqa kashaspa nirqan: “Jehová Diosqa sonqo nanasqakunawan kuskan kashan, sinchi llakisqakunatapas llakikuyninmantan libran”, nispa (Sal. 34:18). ¿Chhaynapichu qanpas tarikushanki? Chhaynapi tarikushanki chayqa, yaqapaschá nishanki: “Noqataqa manan pipas entiendewanmanchu, otaq manan pipas yanapaytaqa atiwanmanchu”, nispa. Ichaqa Davidpa nisqan jina Jehová Diosqa ladoykipin kashan, payqa liston kashan chhaynapi tarikuqtiyki yanapanasuykipaq. Chaymantapas Davidqa nillarqantaqmi: “Weqeyta qara p’uyñuykipi juñuy”, nispa (Sal. 56:8). Ñaupa tiempopi karuta viajaq runakunaqa qara p’uyñupin unuta apakuqku. Pisi sut’uy unullaña kaqtinpas allintan chaytaqa waqaychaqku. Paykunapaqqa chay pisi unuchallapas importanten karan. Chhaynatan Jehová Diospas juj p’uyñupi jina llapa weqenchiskunata waqaychashan. Chaywanmi rikuchin noqanchismanta llakikusqanta. Davidqa nillarqantaqmi: “Qanqa llapa ima ruwasqaytan yachashanki”, nispa (Sal. 139:3). Chaypi nisqan jina, Jehová Diosqa llapa ima ruwasqaykitan qhawamushan. Astawanqa payta servinaykipaq allinkuna ruwasqaykitan qhawamushan (Heb. 6:10). Arí, payqa valoranmi payrayku tukuy ima ruwasqaykita.a

⁸ ¿Imatan Jehová Dios niyta munawashasunman chay textokunapi? Payqa “anchatan qanmanta llakikuni, anchatataqmi munakuykipas” nispan niwashanchis. Satanasmi ichaqa munashan Jehová Diospa munakuwasqanchismanta iskayananchista. Chhaynaqa Jehová Diospa munakusqasuykimanta iskayayta qallarinki chayqa tapukuy: “¿Pitan creesaq, llullakunaq taytan Satanastachu icha cheqaqta rimaq Jehová Diostachu?”, nispa (Juan 8:44; Sal. 31:5).

9. ¿Imaynatan Jehová Dios qhawarin pay sonqo kaqkunata? (Éxodo 20:6).

⁹ Imaynatas Jehová Dios qhawarin pay sonqo kaqkunata chaypi yuyaymanay. Chaypaqqa yuyaymanawaqmi Jehová Dios Moisesta Israel runakunatawan imachus nisqanpi (leey Éxodo 20:6). Juj kutinmi Jehová Diosqa Moisesta nirqan imaynas “pay sonqo kaqkunamanqa mana tukukuq munakuyninta rikuchin” chayta. Chhaynapunin chayqa, Jehová Diosqa payta munakuqkunataqa munakullantaqmi (Neh. 1:5). Chhaynaqa, Jehová Diospa munakuyninmanta iskayashanki chayqa tapukuy: “¿Munakunichu noqa Jehová Diosta?”, nispa. “Arí” nispa ninki chayqa, kayta yuyariy: Qanpas munakunkitaq Jehová Diosta, munayninman jina kausanaykipaqtaq kallpachakushankipas chayqa, ¿manachu paypas qanta munakusunkiman? Arí payqa anchatan munakusunki (Dan. 9:4; 1 Cor. 8:3). Jehová Diosta munakusqaykiqa manan yanqapaqchu. Paypas maytan munakusunki, chayraykun mana jayk’aqpas saqesunkichu.

10, 11. ¿Jesuspa wañusqanta imaynata qhawarinanchistan Jehová Dios munan? (Gálatas 2:20).

¹⁰ Jesuspa wañusqanpi yuyaymanay. Jehová Diosqa juj jatun regalotan qowarqanchis, wawantan kay pachaman kachamurqan runakunarayku wañunanpaq (Juan 3:16). Ichaqa Jesusqa manan runakunaraykullachu wañuran, qanrayku iman payqa wañuran. Apóstol Pablomanta juj chhikanta rimarisun. Payqa manaraq Jesusta qatikushaspaqa mana allin ruwaykunatan ruwarqan. Chaymi Jesusta qatikusqan qhepamanqa chaykunapi kallpachakunanraq kasharqan (Rom. 7:​24, 25; 1 Tim. 1:​12-14). Mana allinkunataña ñaupaqpi ruwarqan chaypas, paymanpas Jehová Dios chay sumaq regalota qoshanman karqan jinatan Jesuspa wañusqantaqa qhawarirqan (leey Gálatas 2:20). Chaytan apóstol Pabloqa Jehová Diospa santo espiritunwan tanqasqa kaspa Bibliapi qelqarqan, chhaynapi noqanchispas yachananchispaq (Rom. 15:4). ¿Imarayku? Jehová Diosqa munan qanpas Jesuspa wañusqanta Diospa sumaq regalonta jina chaskikunaykitan. Arí, qanrayku iman chay regalotaqa qorqan. Chay ruwasqanta Diospa sumaq regalonta jina qhawarinki chayqa, reparankin Jehová Dios qanta mayta munakusqasuykita.

¹¹ Maytan Jehová Diosta gracias ninchis wawanta noqanchisrayku wañunanpaq kachamusqanmanta. Ichaqa Jesusqa manan chayllapaqchu kay pachamanqa jamurqan. Aswanpas imaynapunis kamaqninchis Jehová Dios, imaynatas kamasqan runakunata qhawariwanchis chayta willananpaq iman kay pachamanqa kachamurqan. Chaymantañataq kunanqa rimasun (Juan 18:37).

JESUSPA YACHACHISQANPI PIENSASUN

12. ¿Imaraykun nisunman “Jehová Diosmanta Jesuspa yachachisqanqa cheqaqmi” nispa?

¹² Jesusqa kay pachapi kashaspaqa kusisqan taytan Jehová Diosmanta yachachiq. Yachachirqanmi imaynas Jehová Dios chayta (Luc. 10:22). Papanmanta yachachisqanqa cheqaqmi. ¿Imaraykun chayta ninchis? Yachasqanchis jina, payqa unay watakunan janaq pachapi Jehová Dioswan tiyarqan, chaymi allinta payta reqsin (Col. 1:15). Janaq pachapi kashaspaqa rikurqanchá maytas Jehová Dios pay sonqo runakunata munakun chayta, maytas angelkunatapas munakun chaytapas. Ichaqa, ¿imaynatan Jesuspa yachachisqan yanapawasunman Jehová Diospa munakuwasqanchismanta ama iskayananchispaq? Chayta kunan qhawarisun.

13. ¿Jehová Diosta imaynata rikunanchistan Jesús munan?

¹³ Jesusqa munan Jehová Diosta munakuq papanchista jina qhawarinanchistan. Chayraykun payqa Mateo, Marcos, Lucas, Juan librokunapi 160 más kutipi Jehová Diosta “Taytáy” nispa nirqan. Discipulonkunata rimapayaspapas “qankunaq Taytaykichis” “janaq pacha taytaykichis” nispan nirqan (Mat. 5:16; 6:26). Manaraq Jesús kay pachaman jamushaqtinqa “tukuy atiyniyoq”, “janaq pachapi kaq” “kamaqniyku” nispallan wakin Dios sonqo runakunaqa Jehová Diosta niqku. Jesusmi ichaqa sapa kutilla Jehová Diosmanta rimaspa “Taytanchis” nispa niq. Chaypin sut’ita reparanchis imaynas Jehová Diosqa papanchista jina qhawarinanchista munan chayta. Kunanqa rimasun imaraykus Jesús iskay kutipi “Taytaykichis” nispa nirqan chaymanta.

14. ¿Imata willaspan Jesús rikuchirqan Jehová Dios munakuwasqanchista? (Mateo 10:​29-31; qhaway kay parrafopaq dibujota).

¹⁴ Juj kutinmi Jesusqa pichinkuchakunamanta rimarqan (leey Mateo 10:​29-31). Chay kutipi yachachisqanman jinaqa, Jehová Diosqa allintas yachan jayk’a pichinkuchakunas pampaman urmashan chaytaqa. Manaña chay pichinkuchakuna Jehová Diosta adorankuchu chaypas payqa interesakunmi paykunapi, ¿chaychu Jehová Dios pay sonqo runakunata mana munakuwasunman? Payqa munakuwanchispunin. Chayta nisqan qhepallamanmi Jesusqa nillarqantaq: “Qankunaqqa chujchaykichispas llapallanmi yupasqa kashan”, nispa. Chujchanchis jayk’a kasqantapas Jehová Diosqa yachantaq chayqa, sut’in kashan Jehová Diospa munakuwasqanchisqa. Chaymanta ama iskayananchispaqmi Jesusqa chaykunata willarqan.

15. ¿Imatan Jehová Diosmanta yachasunman Juan 6:44 textopi imachus nisqanmanta?

¹⁵ Juan 6:44 textopi nisqan jina, juj kutipipas Jesusqa “Taytáy” nirqanmi Jehová Diosta (leey Juan 6:44). Chay kutipi Jesuspa willasqan jina, Jehová Diosqa allin kaqtan sonqonchispi rikurqan. Chaymi llaqtanman pusamuwarqanchis (Hech. 13:48). Chay kutipiqa yaqachus jina Jesusqa Jeremías 31:3 textopi nisqanman jina rimashanman karqan. Ñaupaqpin Jehová Diosqa llaqtanta nisqaña: “Mana tukukuq munakuywanmi noqaman asuykachimurqayki”, nispa (Jer. 31:3; willakuy; tupanachiy Oseas 11:4 textowan). Chhaynataq chayqa, kayta yuyariy: Jehová Diosqa munakushallasunkin, allinkuna ruwasqaykipitaqmi ñawinqa kashan.

16. a) ¿Imaynata Jehová Diosta qhawarinanchistan Jesús munan, imaraykun chay nisqanpi confiasunman? b) ¿Imatan ruwananchis Jehová Diospa munakuwasqanchismanta ama iskayananchispaq? (Qhaway “Taytanchis Jehová Diostan necesitanchis” nisqa willakuyta).

¹⁶ Chaykuna yachachisqanwanmi Jesusqa niwashanchis: “Jehová Diosqa manan noqaq Taytallaychu, qanpaqpas Taytaykin. Payqa anchatan munakusunki, llakikuntaqmi qanmantaqa”, nispa. Chhaynaqa, mayninpi Jehová Diospa munakuwasqanchismanta iskayaspaqa Jesuspa yachachisqantan yuyarinanchis. Payqa allintan Jehová Diostaqa reqsin, cheqaqtataqmi rimanpas, chaymi paypa nisqanpi confiananchis (1 Ped. 2:22).

KALLPACHAKUSHALLAY JEHOVÁ DIOSPA MUNAKUYNINMANTA AMA ISKAYANAYKIPAQ

17. ¿Imaraykun mana ni juj p’unchayllapas Jehová Diospa munakuwasqanchismanta iskayananchischu?

¹⁷ Kaypi yachamusqanchis jina, Satanasqa imaymana trampakunatan churawanchis Jehová Diosmanta t’aqakunanchispaq. Payqa munan Jehová Diospa munakuwasqanchismanta iskayananchistan. Ichaqa, ¡ama payman gustota qoychu! (Job 27:5). Jehová Diospa munakusqasuykimantapas amapuni iskayaychu. Aswanpas sapa p’unchay kallpachakuy imaraykus pay munakusunki chayta reparanaykipaq.

18. ¿Imakunata ruwaymi yanapasunki Jehová Diospa munakusqasuykimanta ama iskayanaykipaq?

¹⁸ Kaypi yachamusqanchisman jina, ¿imakunata ruwaymi yanapasunkiman Jehová Diospa munakusqasuykimanta ama iskayanaykipaq? Sapa p’unchaymi mañakunayki imaynatas Jehová Dios qhawarisunki chayta reparanaykipaq. Chaymantapas imaynatas serviqninkunata qhawarin chaymanta rimaq textokunapin yuyaymananayki. Jehová Diosqa pay sonqo kaqkunataqa anchatan munakun. Munakuspan wawan Jesustapas qanrayku wañunanpaq kay pachaman kachamurqan. Jesuspas yachanmi Jehová Dios qanta munakusqasuykita, chaymi payqa munan “Taytaykita” jina payta qhawarinaykita. Chaykunapi yuyaymananki chayqa, piña tapusunki: “¿Cheqaqtapunichu qanta Jehová Dios munakusunki?” nispa chaypas, mana iskayaspan ninki: “Arí, payqa anchatan munakuwan. Chaymi noqapas kallpachakushani payta munakunaypaq”, nispa.