Diosmanta yachay munaqkunata usqhaylla yanapasun

1. ¿Imaynatan wakin runakuna Diospa siminta chaskikunku? (Hechos 13:​47, 48; 16:​14, 15).

APOSTOLKUNAQ tiemponpiqa Diosmanta willakuyta uyarispa jinan wakin runakunaqa iñiqman tukupurqanku (leey Hechos 13:​47, 48; 16:​14, 15). Kay tiempopipas kanmi Diosmanta willakuyta uyarikuq runakunaqa, astawan yachayta munaq runakunapas. Qallariypiqa wakinqa manapaschá ganaswanchu uyarikunqaku, chaymantan ichaqa masta yachayta munanku. ¿Imatan ruwananchis chhayna runakunata tarispa?

2. ¿Imaraykun nisunman “predicayqa huertapi llank’ay jinan”, nispa?

² Diosmanta willaytaqa huertapi llank’aywanmi tupanachisunman. Huertapi plantakunaqa wakinqa yaqapaschá plantana kashan, wakintaq rurushan, wakintaq cosechanapaqña kashan. Chhaynan runakunapas. Wakinqa yaqapaschá plantana jinaraq kashanku, wakintaq listoña kashanku Diosmanta yachanankupaq. Chhayna listoña kashaq runata tarisun chayqa, mana imata suyaspan Diosmanta yachachinanchispacha (Juan 4:​35, 36). Ichaqa allintan qhawarinanchis listoñachus kashanku icha manaraqchus chaytaqa, chhaynapin sapankatapas imaynachus kashanku chayman jina allinta yanaparisunchis. Chaymi kaypi yachasunchis imatas ruwasunman Diosmanta astawan yachay munaq runata tarispa chayta. Yachasunmi imaynatas paykunataqa Diosta servinankukama yanapashallasunman chaytapas.

¿IMAYNATAN YANAPASUNMAN DIOSMANTA YACHAY MUNAQ RUNATA?

3. ¿Imatan ruwasunman predicashaspa Diosmanta astawan yachay munaq runata tarispanchis? (1 Corintios 9:26).

³ Predicashaspa Diosmanta astawan yachay munaq runata tarisun chayqa, yanapasunpacha Jehová Diospa ñanninman jaykunanpaq. Chaypaqqa ninanchismi: “¿Munawaqchu Bibliata estudiayta?”, nispa. Invitananchismi juñunakuykunamanpas (leey 1 Corintios 9:26).

4. Wakin runakunaqa ñaupaq kutita rimapayasqanchismantapachan Bibliamanta astawan yachayta munanku, ¿imaraykun chayta ninchis? Willay juj experienciata.

⁴ Bibliamanta estudiota munachiy. Wakin runakunaqa ñaupaq kutita rimapayasqanchismantapachan Bibliamanta astawan yachayta munanku. Chaypaq yachasunchis Canadá nacionpi imachus pasarqan chayta. Juj kutinsi jueves p’unchayta juj hermana carritowan predicashasqa. Chayllamansi juj chica asuykusqa, jinaspa Kusisqa kausay nisqa folletota oqarikusqa. Chaypi kaq hermanaqa willasqas imaynas munaspaqa Bibliamanta estudiota chaskinman chayta. Jinas chay chicaqa nisqa “munaymanmi” nispa, jinaspa numeronkuta qonakusqaku. Chay p’unchay tardellantaqsi chay chicaqa chay hermanaman juj mensajeta apachimusqa. Chaypis tapukamusqa chay estudio munachisqanmanta. Jinas hermanaqa nisqa: “Kay semana tukuyta estudiasun”, nispa. Chicas ichaqa nimusqa: “Manachu paqarin atikunman, kashanmi tiempoy”, nispa. Jinas chay qhepantin p’unchaylla estudiayta qallarisqaku. Chay semana tukuyta juñunakuymanpas risqas chay chicaqa. Payqa ratullan Diospa llaqtanpi ñauparishan.

5. ¿Imapin piensananchis manaraq Bibliamanta estudiota munachishaspa? (Qhaway kay parrafopaq fotokunata).

⁵ Ichaqa manan llapankuchu chay chica jina kanku, jujkunataqa jujniraymantan yanaparinanchis. Yaqapaschá paykunataqa ñaupaqtaqa rimapayasunman imamantas yachayta munanku chaymantaraq. Sichus chayta ruwasun, ganaswantaq predicasunpas chayqa, tarisunmi yachay munaq runakunata. Ichaqa, ¿imaynatan estudiota munachisunman? Chayta yachanapaqmi tapukurqan chaykuna ruwaypi allin experienciayoq hermanokunata hermanakunatawan. Qhawarisun imaninkus paykuna chayta.

6. ¿Imatan ruwasunman pipas kutinanchista munananpaq?

⁶ Chay hermanokunaq hermanakunaq nisqanman jinaqa, wakin partekunapiqa manas allinchu kanman “estudiota qosayki” “clasesta qosayki” nispa niyqa. Aswan allinqa kanman “Bibliamanta rimasunchis” “yacharisunchis” nispa niysi. Chaymantapas “kutimusaq” ninamantaqa, “Bibliapiqa imaymanamantan yachasunman” nispas nina. Chaymantapas “Bibliapiqa manan religionllamantachu riman, chaypiqa imaymana consejokuna yuyaychaykuna iman kashan”, nispas nina. Chay qhepamantaqsi nina: “10, 15 minutosllapin chaykunamanta yachawaq”, nispa. Chaymantapas manas allinchu kanman “sapa semananmi jamusaq”, nispa niyqa, chayta niqtinchisqa manapaschá munapunmanñachu, “manan atiymanchu” ninmanpaschá.

7. ¿Mayman rispan runakuna reparanku Diospa cheqaq llaqtan tarisqankuta? (1 Corintios 14:​23-25).

⁷ Juñunakuyman invitay. Apóstol Pabloq tiemponpiqa yaqasuna wakin runakunaqa juñunakuyman rispa repararqanku Diospa cheqaq llaqtanta tarisqankuta (leey 1 Corintios 14:​23-25). Kay tiempopipas yaqa kaqmi pasallantaq, juñunakuyman riq runakunaqa ratullan Diospa llaqtanpi ñauparinku. Ichaqa, ¿ima ratupin Biblia estudiaqkunata juñunakuyman invitasunman? Kusisqa kausay libropin 10 yachachikuypi willashan juñunakuyman rinamanta. Ichaqa, ¿chayman chayananchistaraqchu suyananchis? Manan. Primera vezta Diosmanta willashaspapas estudiashaspapas invitasunmanñan juñunakuykunaman jamunankupaqqa. Chaypaqqa yaqapaschá willasunman imamantas semana tukuy juñunakuypi yachachikamunqa chayta. Willasunmanmi imamantas estudiakunqa Qhawaq revistapi chaytapas.

8. ¿Imakunatan willarinanchis pitapas juñunakuykunaman invitashaspa? (Isaías 54:13).

⁸ Runakunata juñunakuyman invitamushaspaqa willananchismi imakunatas chaypi ruwakun chayta. Juj religionman rishan chaypas, willarinanchismi imapis jujniray juñunakuyninchis chayta. Juj estudiantemanta yachasun. Primera vez juñunakuyman rispas payqa, yachachiqnin hermanata tapukusqa. “¿Chay Qhawaq revistamanta tapuq hermano llapa kaypi kaqkunaq sutintachu yachan?”, nispa. Jinas chay hermanaqa nisqa: “Kaypiqa juj familia jinan kayku, chaymi kallpachakuyku llapayku reqsinakunaykupaq”, nispa. Chaysi chay estudiante nisqa: “Iglesiaypiqa manan pipas ni sutillaykitapas tapurisunkichu”, nispa. Chaymantapas wakinqa manapaschá yachankuchu imaraykus juñunakuykunaman rinchis chayta, chaymi noqanchisqa paykunaman chayta willarinanchis (leey Isaías 54:13). Willarinanchismi imaynas noqanchisqa juñukunchis Diosta adoranapaq paymanta yachanapaq chayta, imaynas noqanchispura yanapanakunchis chaytapas (Heb. 2:12; 10:​24, 25). Willarinanchismi imaynas juñunakuykunaqa allin organizasqa kashan chaytapas. Imaynas chaypiqa mana costumbrekunatachu ruwakun chaytapas (1 Cor. 14:40). Chaymantapas willarinanchismi imaynas juñunakuypiqa allinta rikunapaq luzkunapas kashan chayta. Yachanankun imaynas noqanchisqa mana politicamantachu rimanchis, ni discutiqchu juñunakuykunamanqa rinchis chaytapas. Chaymantapas juñunakuykunaman pitapas invitaspaqa yaqapaschá qhawachisunman ¿Imaynatan huñunakuyniyku aparikun? nisqa videota.

9, 10. ¿Imaynatan pitapas yanapasunman juñunakuykunaman jamuyta ama manchakunanpaq? (Qhaway kay parrafokunapaq fotota).

⁹ Wakinqa manchakunkun juñunakuykunaman jamuyta. ¿Imarayku? “Testigo kanaypaqpaschá niwanqaku” nispan ninku. Chaymi willarinanchis imaynas lliupas jaykullankuman juñunakuykunamanqa chayta. Pipas jamuyta munaqqa atinmanmi jamuspa chaypi uyarikuyta. Manan pipas ninqachu “Testigon kanayki” nispaqa, ni “cambiay religionniykita” nispapas. Wawakunayoq kanku chaypas, willarinanchismi imaynas paykunaqa wawankuwan kuska yachanqaku chayta. Manan wawankutaqa papankumanta mamitankumantaqa t’aqakunchu, manan sapaqtachu paykunamanqa imatapas yachachikun (Deut. 31:12). Willarinanchismi imaynas juñunakuykunapiqa mana qolqetapas mañanchischu chayta. Jesús kikinpunin nirqan: “Gratisllan chaskirqankichis, gratisllataqmi qonkichispas”, nispa (Mat. 10:8). Chaymantapas willananchismi imaynas mana askha valeq p’achawanraqchu churakunan chayta. Jehová Diosqa manan p’achanchistachu qhawan, aswanpas sonqonchis ukhutan (1 Sam. 16:7).

¹⁰ Invitasqanchis runa jamunqa chayqa, confianzatan qonanchis. Reqsichisunmanmi umalliqkunata juj hermanokunatapas. Sichus chaypi thaj kanqa, kusisqa kanqa chayqa, yaqapaschá jujpiqa kutimunqa. Chaymantapas yaqapaschá leekamusqan textota ima Biblianchispi qhawachisunman. Yachachisunmanmi textokuna imayna maskhaytapas, leekamusqanta qatipaytapas.

¿IMAYNATAN YANAPASUNMAN BIBLIATA ESTUDIAYTA QALLARIQTIN?

11. ¿Imaynatan rikuchisunman Biblia estudiaqkunaq tiemponku respetasqanchista?

¹¹ ¿Imatan ruwasunman piwanpas Bibliata estudiayta qallarispanchis? Tiempollanpin imatapas ruwananchis, ima horasta rinanchispaqchus niranchis chay horatan rinanchis. Manaña paykunapaq costumbrechu kanman horallanpi chayay chaypas, tiempollanpin rinanchis. Chaymantapas estudiayta qallarisqanchis p’unchaykunaqa manan unayraqchu paykunawanqa estudiananchis. Bibliamanta estudio qoypi allin experienciayoq hermanokunaq nisqanman jinaqa, manan allinchu kanman qallariy p’unchaykunapi paykunawan unayta estudiayqa. Astawanña yachayta munashankuman chaypas, ajnallatan saqerinanchis. Chaymantapas manan noqanchischu mastaqa rimananchis, aswanpas paykunan rimananku (Prov. 10:19).

12. ¿Imata ruwanankupaqmi yanapananchis Biblia estudiaqkunata?

¹² Pimanpas Bibliamanta estudiota qospaqa, qallariymantapachan yanapananchis Jehová Diosta Jesustawan allinta reqsinankupaq munakunankupaq ima. Chaypaqqa Bibliawanpunin imatapas yachachinanchis, manataqmi umallanchismantachu rimapayananchis (Hech. 10:​25, 26). Apóstol Pablopas chaytan ruwarqan. Runakunaman yachachishaspaqa Jehová Diostapas Jesustapas allinta reqsinankupaq munakunankupaq iman yachachiq (1 Cor. 2:​1, 2). Chaymantapas apóstol Pabloqa willarqanmi imaynas chayraq iñiqkunataqa sumaq sonqo llamp’u sonqo kanankupaq yachachina chayta. Chhayna runa kayqa anchatan valen, qolqe jina qori jinan chayqa (1 Cor. 3:​11-15). Chaykuna yachachisqanmanta wakinmi kashan allin iñiyniyoq kay, yachayniyoq kay, allin yuyayniyoq kay, Diosta manchakuy ima (Sal. 19:​9, 10; Prov. 3:​13-15; 1 Ped. 1:7). Noqanchispas Pablo jina estudiantekunata yanapasun Diospi tukuy sonqo confianankupaq, paywan allin amigontin kanankupaq ima (2 Cor. 1:24).

13. ¿Imaynatan rikuchisunman estudiantekunawan pacienciakuq kasqanchista? (2 Corintios 10:​4, 5; qhaway kay parrafopaq fotota).

¹³ Chaymantapas pimanpas Bibliamanta yachachishaspaqa, Jesús jinan pacienciawan munakuywan ima yachachinanchis. Manan p’enqachiq jinaqa imatapas tapunanchischu. Imatapas mana allintachu entiendeshan chayqa siguillasun, jujpiña chaytaqa allinta entiendechisun. Chaymantapas ima yachachikuytapas mana creeyta atishanchu chayqa, manan obligananchischu chaypi creenanpaq. Aswanpas jinallataraqmi saqenanchis, tiempowanqa entiendellanqan (Juan 16:12; Col. 2:​6, 7). Bibliaq nisqan jina, yanqa yachachikuykunaqa jatun perqa jinan, chaytaqa pisi-pisimantan saqepunqa (leey 2 Corintios 10:​4, 5). Chaymantapas chay pantasqa yachachikuykunata saqepunanpaqqa, ñaupaqtaqa Jehová Diospi confiananpaqmi yanapananchis (Sal. 91:9).

¿IMAYNATAN YANAPASUNMAN JUÑUNAKUYMAN JAMUQTIN?

14. ¿Imaynatan chaskinanchis juñunakuyman jamuq runakunata?

¹⁴ Jehová Diosqa llapa runakunata sumaqta chaskinanchistan munan. Maymantaña kanku chaypas, imayna p’achasqaña kanku chaypas, qolqeyoqña mana qolqeyoqña kanku chaypas sumaqtan chaskinanchis (Sant. 2:​1-4, 9). ¿Imaynatan chayta ruwasunman? Qatiqpi chayta yachasunchis.

15, 16. ¿Imatan ruwasunman chayllaraq jamuqkuna juñunakuykunapi gustowan kanankupaq?

¹⁵ Wakin runakunaqa imatachus juñunakuykunapi ruwanchis chayta yachayta munaspan jamunku. Wakintaq jamunku juj ladokunapi familiankuq invitasqanta kasuspa. Chhaynaqa, pipas mana reqsisqa runa juñunakuyman jamushan chayqa, sumaqta paytaqa chaskisun. Ichaqa ama comuntachu imatapas tapupayasun, aswanpas tapuriyta munaspaqa allin yuyaywan chaytaqa ruwasun. Chaymantapas yaqapaschá ladonchispi payta tiyachisunman. Paywan kuska tiyashanchis chayqa, mañasunmanmi Biblianchista, qosunmanmi qelqakunatapas. Tukuy atisqanchistan ruwananchis kusisqa chaypi kananpaq. Chaypaq yachasun juj wiraqochamanta. Payqa juñunakuyman chayaspas juj chhikan p’enqasqa kashasqa, imayna p’achasqachus kasharan chaymantas p’enqarikusqa. Chayta reparaspas juj hermano nisqa: “Ama p’enqakuychu, llapapas igual-llan kanchis, manan pipas kaypiqa qhawasunkichu”, nispa. Chay runaqa manas jayk’aqpas chaytaqa qonqasqachu, kunanqa Testigoñan payqa kapun. Ichaqa kallpachakusunña chayraq jamuqkunata yanapananchispaq chaypas, manan mana tapuna kaqkunataqa tapupayananchischu (1 Ped. 4:15).

¹⁶ ¿Imatawanmi ruwasunman chayraq jamuqkuna gustowan kanankupaq? Manan mana iñiq runakunamanta malta rimananchischu, manan imapichus creesqankumantapas burlakunanchischu. Juñunakuykunapi participaspapas comentaspapas allinta piensaspan rimananchis, manan munasunmanchu paykunata ofiendeytaqa (Tito 2:8; 3:2). Chayta ruwasunman chayqa, manapaschá kutimunkumanñachu. Chaymantapas manapunin imapichus creesqankumantaqa maltaqa rimananchischu (2 Cor. 6:3). Astawanqa juñunakuykunapi yachachiqkunan mastaqa cuidakunanku. Imata yachachispapas paykunaq entiendenankupaq jinallan yachachinanku, manan mana reqsisqanku simikunatapas rimanankuchu.

17. ¿Imatan ruwananchis astawan yachay munaq runakunata tarispa?

¹⁷ Kay tiempokunapiqa astawanraqmi predicacionqa aparikushan. Astawanmi tarikushan “wiñay kausayman apaq ñanninta llapa puriy munaqkunatapas” (Hech. 13:48). Chhaynaqa pitapas tarisun astawan yachay munaqta chayqa, qosunpacha estudiota, invitasun juñunakuykunamanpas. Chhaynapin paykunata yanapasunchis “wiñay kausayman apaq ñanninta” purinankupaq (Mat. 7:14).